استكمالا للموضوع
حاسبنا صاحب الشقه و طلعنا شارع نظامي الشهير .. الحقيقه مكان حلو و لكن من ناحية المطاعم و المقاهي كان اقل من المتوقع .. درنا الشارع كله و قلنا لازم نتغدى .. حصلنا مطعم عنده جلسات خارجيه . كان استقبالهم لنا اقل من العادي و تحس انه مو بحريصين عالزباين .. طلبنا مشاوي و اكلنا و الحمدلله عالنعمه لكن ذوق الأكل كان اقل من المتوسط .. رحنا ندور مقهى و طحنا في واحد عنده جلسات و اغاني عربيه .. هو صغير المحل لكن قلنا مو مشكله يمكن نستانس .. طلبنا براد شاهي و قطعة بقلاوه صغيره مثلثه .. جتنا البقلاوه بارده و شكلها بايته و لكن مشيناها و يوم جينا نحاسب قال 25 منات !! استغربنا قال البراد ب 10 و البقلاوه ب 15 !! قلنا له مو معقول اسعاركم غاليه .. قال هذي اسعارنا و ما غلينا عليكم و جاب لي المنيو و فعلا وجدتهم حاطين السعر و لكن عندي احساس انهم نصبوا علينا لان المنيو بلغتهم و لا ندري اش مكتوب فيها بس كلمة بقلاوه اللي عرفناها .. حاسبنا و قلنا نروح للكورنيش لربما نجد شي حلو .. و فعلا كورنيش مرتب و طويل و فيه مقاهي و مطاعم لكن ايضا الاكل عندهم اقل من المطلوب .. طلبنا نوع قهوه معين قالوا مافيه و تحس انهم مبسوطين لمن ما تجد اللي تبغاه .. لاحظنا هالشي عليهم طول رحلتنا .. كل الاشخاص اللي تطلبهم شي و ما هو موجود عندهم تحسهم يفرحون و يشعرونك بخيبة املك .. مالكم في الطويله ..رجعنا شقتنا و استقعدنا لتفلزيونهم الين شغلنا فيه مباراه في الدوري السعودي .. نمنا لانا مو حقين سهلر او بارات لو مراقص .. اليوم الثاني رحنا شارع نظامي و افطرنا فطور ممتاز الصراحه و بعدها طلبنا بولت و رحنا لابراج اللهب و المطل اللي حنبها .. كان مكان حلو ينقصه عدم وجود مقاهي عالمطل .. فيه مطعم واحد كبير بس ما دخلناه .. على المغرب رجعنا مشي و رحنا الكورنيش تمشينا شوي و رحعنا الشقه على انا اليوم الثاني بنغادر الى قابالا .. فكرنا نستأجر سياره الى قابالا و بدينا البحث عن شركات تاجير .. اغلبها لم نجدها عالموقع المحدد في الخريطه .. شي غريب !! محل واحد فقط حصلناه فاتح و قال عندي جميع انواع السيارات و بعد نقاش طويل طلع عنده سياره وحده النترا موديل 2019 .. شكلها سيارة صاحب المكتب او الموظف نفسه .. قال ارجع لي بعد ساعه تكون السياره جاهزه .. رحنا نفطر في مطعم صغير و حلو قريب من المكدونالد .. الصراحه استقبالهم و اكلهم و ترتيبهم مطعمهم جميل جدا .. تديره سيده محترمه و تتابع الطلبات بنفسها .. شغل ممتاز الصراحه .. خذينا سيارتنا و قال صاحب المكتب لا يضحك عليكم البوليس .. اذا وقفكم و طلب فلوس لا تعطونه و اذا قال لكم اي شي لا تطيعونه .. اذا فيه مخالفة يسجلها فقط .. قلنا له ليش ؟ قال هم كذا يقولون لك انت مسرع و ادفع قيمة المخالفة و هذا موصحيح لان السرعه مسجله في الكاميرات .. راح يقول لك راح امسح المخالفة من الكاميرا و اعطني 50 منات و هو كذاب ما يقدر يمسح شي .. خوفنا الصراحه لكن قلنا خلاص قدها وزت .. مشينا طريق طويل غير الطريق اللي فيه الحفريات . استخدمنا نطبيق WAZE لانه افضل من قوقل مابز .. يظهر لك نقاط التفتيش و الكاميرات .. الطريق يروح لمدينه اسمها KURDAMIR و هو مزدوج و مريح لكنه ممل و لا عليه مقاهي و لا مطاعم و لا شي .. بعد ما مشينا ب 300 كلم طلع عندنا صوت للفرامل .. تبين لنا بعدين ان الفحمات منتهية تماما .. صرت امسك الجلنط و احط السياره في نمر ثقيله اذا صرت بأوقف .. على بعد المسافه و طول و سوء المناظر و عدم وجود مقهى واحد عالطريق رغم ان الطريق مليء بالسيارات طلعت لنا سالفة الفرامل .. راسلت مكتب التاجير قالوا لي امش عليها عادي ما فيه مشكله .. وصلنا قبالا بعد 5 ساعات من العنا و كان السكن كوخ كبير و جميل و نظيف و مرتب و لكن صاحبه يقول حاسبني كاش مع اني حاجزه من بوكينق .. راح و الغى الحجز و قال مافيه الا كاش .. قلنا طيب الله يعيننا.. ريحنا شوي و طلعنا نتعشى في مطعم جيد و لكن اسعاره خيالية .. انا تفاجأت من غلى الاسعار عنهم مع ان كثيرين يقولون بلد رخيص .. عشا مشاوي و اكله مدري اش اسمها تجي رز و خضار و لحم ل 3 اشخاص بحوالي 300 ريال .. رجعنا نمنا و الباقي في نكمله لاحقا .
تحياتي للجميع