لتصحيح تاريخ السفر كان ٢٣/٥/٢٠٢٤
والمطعم اللي اسمه باب جمعة ،، اسمه الصحيح مطعم الحاج بو جمعة
وبخصوص الاجواء كان فرق كبير بين كازا ومراكش
مراكش كانت في النهار درجة الحرارة ٣٥ وكازا ٢٥ والليل تصل الى ١٥

ونسيت اذكر انطباعي على المدينتين
مراكش اشوفها زي ماكانت في ٢٠١٧ لكن ممكن تحسنت شوي صار فيه بدائل كثيرة في السكن
السهرات لا جديد يذكر لكن من ناحية اللاونجات فيه تحسن كبير
والاسعار ما اشوف الفرق اللي الناس تتكلم عنه
صحيح فيه ارتفاع في الاسعار بس مو كثير مره
الارتفاع في الطيور غالباً

بنسبة لكازا حقيقة ما توقعتها كذا
مدينة جميلة وجوها عليل ويرد الروح بارده جداً مقارنه بمراكش
وعندي احساس يبغالها اكتشاف وزياره اخرى احس هالمدينة ما تصلح الا اللي يعرفها زين
ويعرف مداخلها ومخارجها
احس كازا مثل الرياض دهاليزها كثيره واللي مايعرفها بيبلش


وفي الختام
تجربة السفر وحداني او مع مجموعة
جميعها لها سلبيات وايجابيات

ايجابيات السفر وحداني
١- يومك ملكك بالكامل ماتشاور احد وتقدح من راسك لا احد يصحيك ولا ترتبط باحد
انا متعود اني اكون لحالي بحكم عملي وتنقلاتي كثير فاعرف كيف اصنع يومي واخلي جدولي مليان.
٢- التغييرات المفاجئة للخطة تكون سهله ومرنة .
٣- سهوله اتخاذ القرار يا ابيض يا اسود عكس السفر مع مجموعة .
٤- الراحة النفسية احياناً الواحد يحتاج يطلع من الروتين لحياتنا اليومية
تقضيها تبطح وتسدح حتى لو ماعندك شئ تسويه تجلس جلسة مع نفسك علاج روحي خخخ
طلعت انا اللي فيه نفسيه هههههههههههه

سلبيات السفر وحداني
١- في حالة لا قدر الله مرضت او تعبت او صار شئ من امور الدنيا منت لاقي احد يفزع لك خصوصاً اذا ماتعرف احد .
انا جاني هبوط حاد في الضغط لما سويت حمام مغربي
مع البخار تسبب لي ضيق شديد في التنفس
الحمدالله قدرت الحق عمري وتخارجت بسرعه بفضل من الله
كان معي بعض العلاجات والحمدالله عدت الامور على خير .

المصاريف حقيقة راح تصرف كثير مرررره اذا انت تبي تفلها صح
انا حسبت حسبة سريعه اذا معي شخص واحد فقط راح اوفر تقريباً ١٠ الاف ريال
طبعاً التوفير هذا على حسب المستوى اللي انت تبي تعيشه ممكن اقل او اكثر
والمصاريف هي ( السكن + السهر + المواصلات ) فقط .

السفر مع مجموعة كحد اقصى ٣ اشخاص اذا كان القروب زقرتيه صح وعلى قلب واحد !!
الايجابيات
١- بيطيح عنك من مصاريف الرحلة الشئ الكثير .
٢- بعض اللحظات الجميلة ودك تشاركها مع شخص عزيز عليك كذكريات .
٣- احياناً تتكاسل في بعض الامور مثل انا كنت بروح لـ اقادير لو معي واحد صامل ويحمسني شوي كان رحت .
٤- في حالة الطوارئ لا قدر الله يكون معك واحد تستند عليه .

سلبيات السفر مع مجموعة
١- البعض يذبحك في البخل ، الدرهم الواحد يحاسبك عليه او يسألك وين راح
حقيقة اللي بيسافر لا ينشد عن الفلوس اذا تبي توفر وبتحسب اجلس في بيتك ولا تطلع .
٢- البعض سبحان الله يختلف عليك تشوفه معك في الاستراحة عسل ولا فيه اطيب منه
تروح هناك تتفاجئ بشخص غريب الاطوار تحس انك توك تعرفه او توه جاه مرض نفسي نادر ، ما اقدر اوصف لكم لاني شفت عجب العجاب في رحلات سابقة .
حالياً نفس الاشخاص يعطوني عروض ميم ميم ميم والله ما افكر لو يعطوني وزني ذهب .
٣- البعض يزعجك يصحيك بدري تحس ان عندك توصيل مدارس ،، اذا الجو سهر وطهبله لا تصحي احد ارقد وخلك في حالك اللي بيقوم يقوم واللي يبي يطلع يطلع تبي تخت قريب درب السلامة الطريق قدامك والسيارة موجوده اطلع وروح ولا تزعج خلق الله
٤- كثرة اختلافات الأرآء خصوصاً اذا ماهم على قلب واحد وكل واحد يصر على اللي في راسه
عن نفسي بتتنازل مره مرتين ثلاث لكن لين متى ؟؟

هذا اللي في بالي حالياً
واعتذر على الاطالة مره اخرى
سواليف المغرب ما تنمل هذا انا لي شهر من وصلت احس اني باقي هناك ههههههههه
يازينها من ديرة الله يحفظها ويحفظ اهلها

والسلام عليكم …