ياحبيبي يالمشتاق والله قلت اللي بالخاطر بالضبط
ومشكلة اللي مسوين فيها اهل خبره وينكبون خلق الله يتسببون في كوارث ، ومهما كان الواحد خبره مستحيل تجي بالتكلفه هذه !! المقيمين هم اللي لهم وضع خاص ومختلف

لكن السائح اللي مثلي ومثلك لازم يكع والحمدالله يديينا ماهي مفلوته بالعكس نصرف صح واطنخ شئ ولكن في محله

ذكرتني برحله لمراكش في ٢٠١٦ معي اثنين من الشباب طول الوقت في الشقة مايطلعون يادوب ستار بوكس ويرجعون

اقولهم خلونا نطلع يقولون ماله داعي مخدوم كل شئ يجيك لين عندك ، ويوهمون ويقنعون انفسهم باعذار مدري وش اقول عنها ؟؟

اقولهم ياشباب وش سوينا كان تكينا في الاستراحه ونجيب كراتين وطيور وخلصنا الموضوع

يقولي الوناسه في البيت معك طيرك وبعيد عن الازعاج وقروشه العالم ! ويتفلسف ويقول لا تجيبها كل يوم ، يوم ايه ويومين لا يقول علشان تشتاق وتتحمس ههههههه وهو طول المده ماجاب الا مرتين وسحب عليها في الحساب هههه

اقوله وش ذا الجو يقول وش عرفك كنا نقول كذا قبلك انت توك ومسوي فيها خبره السنين الله يقطع ذا الجو المخيس !
وهو حتى قطة الاستراحه له شهرين يتصدد مادفع !!
ياناس خلونا نسهر يقولون مالها داعي قلت على هواكم واخذ نفسي وعلى السهره

ويوم رجعت قلت فاتتكم السهره دنيا بطمه في الديوان والسهره واعره وهم ساكتين متنكدين

وعزمتهم على السهره في اليوم الثاني لقيتهم قدامي في الصاله متجهزين من الساعه ١٠ ههههههه
وخذ لك انواع المدح والقصايد هههههه
وانا بيني وبين نفسي اقول اول واخر روحه معكم

انا صرفت ٢٢ الف وواحد صرف ١٢ والاخير حدود ٩ لمده اسبوعين بس علشان تشوف الفرق

ومره كنت رايح لاحد الدول شرق آسيا وسكنت في منتجع على البحر وكان راقي والله مو شوفه نفس او مسوي فيها من الطبقة المخمليه لا والله
يارب لك الحمد عندي استطاعه ووضعي طيب
واحب اكرم نفسي

قالي مضحوك عليك وقاعد يتمصخر يقول انا سكنت بالمده اللي قعدت فيها ب ١٥٠ ريال ههههههههههه بالله هذا وش تقوله !!

البخل من ابشع واوصخ الصفات الله يجيرنا وياكم منها
واسف على الاطاله