اتصلت على صاحبه الفيلا وردت علي بنت من صوتها ما اعطيها 30 سنه ؟
استغربت في الحقيقه معقول صاحبة الفيلا ما وصلت 30 سنه ؟
اممممممم فيه سر وجاري اكتشافه ..
انا : السلام عليكم
هي : وعليكم السلام
انا : كيفك ان شاء الله بخير
هي : بخير مين ؟
انا : انا بدر الي كلمك صاحبي بخصوص الفيلا
هي : اهلا وسهلا بيك
انا : اهلا بيك .. في الحقيقه الفيلا زوينه بس السعر غالي بزاف ممكن لو تنزلي منه شوي
هي : لا لا لا ماكاين هذا اخر شي
انا : انا زبون راح استمر في الفيلا مو مره وحده وخلاص
هي : مرحبا بيك أي وقت
انا : طيب فيه فيلا ارخص بنفس المواصفات ؟؟؟؟
هي : أي فيه عندي 4 فلل
انا : اربع فلل !!!!!!!!! <<<<< اذا ماخاب حدسي البنت سمساره
هي : ايش قلت ؟
انا : توكلنا على الله اخذت الفيلا بسعرها <<< الوعد اذا وصلت لك ان شاء الله
هي : اوك
انا : باي
هي : باي
كلمت صاحبي وقلت خلاص اتفقنا ناخذها وانا ان شاء الله اتصل بيك وانا في المطار ابلغك امتى الوصول علشان تستقبلنا .
اجتمعنا مع بعض وحددنا مبلغ الرحله على كل شخص 8 الاف ريال المجموع 32 الف ريال وتم الاتفاق على امير للرحله والي هو محدثكم .. وقلنا خلاص كل واحد يخلص شغله والوعد يوم الرحله الساعه 1 الليل في المطار .
ماطول عليكم انا خلصت بعض اشغالي والشباب بعد خلصو وجاء اليوم الموعود الى كازا الحب ..
انا جهزت نفسي وشنطتي وعلى مطار الملك خالد الساعه 1 الليل واقف قدام الكونتر حق الشحن للخطوط القطريه انتظر الشله توصل لان التذاكر معهم ..
وصلو بحمد الله الساعه 1,15 لليلاً .. ابراهيم وعزوز وصلو .. واسالهم وين محيميد قالو ورانا .. شوى الا اخينا في الله عند جهاز التفتيش وشنطته مفتوحه وملابسها نصفها في الارض ؟
انا : خير ايش فيك !
محيميد : والله انفتحت شنطتي وانا شايلها .
انا : وهذي شنطه تسافر فيها الله يهديك ؟ جايب شنطة ام طياره منتهيه صلاحيتها من 20 سنه
محيميد : وش فيها عادي
انا : عادي اجل .. طيب قفل شنطتك هذا اذا تقفلت والوعد الكونتر
شحنا الشنط وقصينا البوردنق ومحيميد ترك شنطته ومشى من عندنا ما شحنها ؟
وين راح ذا الدعله هذا وقته بس ..
شوي الا هو جاي ومعه قفل وشريط بلاستيك ويلفه على الشنطه ويقفلها خخخخخخخخخخ
انا : محيميد من جدك الي تسويه ؟
محيميد : أي من جدي اجل ايش اسوي ؟
انا : كان نزلت تحت وشريت شنطه من مصباح او المحل الي قبله وريحت راسك من ذا المطرسه .
محيميد : هذي ام الجمايل ما افرط فيها ابد
انا : منك المال ومنها العيال ان شاء الله .. واتفل بوجهي لو وصلت لكازا وفيها قميص واحد الا على فكره وين حصلت القفل هذا فيه ؟ هذا مستعمل ؟
محيميد : جلست ادور ادور مالقيت قفل وانا تحت شفت هندي يدف قطار كله عربات الشنط وجالس يقفلهم على بعض وأروح عنده قلت صديق أنا يبغى يشتري واحد قفل وواحد شريط بلاستيك .. رفض أول شي .. قلت يالله شيل 10 ريال مره كويس صديق .. قال لا 20 ريال قلت 15 ولا يشوف نفر ثاني .. قال شيل صديق مافيه مشكل .
انا : عز الله تباركت الرحله !!
توكلنا على الله ونزلنا تحت وتعشينا كودو .. وطلعنا وختمنا الجوازات وشريت علك علشان اذاني في الطياره ما تتقفل وتسبب لي مشاكل .. وتوكلنا على الله الى الطياره وكان خط السير الرياض – الدوحه ساعه – كازا ..
اقلعنا وسوالف في الطياره وسعت صدر وتنكيت لان المقاعد جنب بعض المهم وصلنا الدوحه بعد 40 دقيقه من اقلاعنا .. وننزل في مطار الدوحه ونركب الباص ونتبع الارشادات .. الكرت الي معك ازرق تنزل صالة الدوحه واذا اصفر او برتقالي تنزل صاله الترانزيت .. وصلنا الترانزيت .. والا قدامنا طابور ذكرني بالعبت المتاهه يمين يسار يمين يسار يمين يسار .. انا والله شفت الموضوع مسخره وكل واحد يقول ابي الحمام والي يقول معي دوخه ويركض ويتعدانا قلت مابدهاش ياولد .. وانا الي امشي تحت وفوق تحت وفوق تحت وفوق شوي وانا قدام التفتيش .. واخلص وادخل واطلب الكفي لي ولشباب واتقهوى شوي الا متصلين وينك قلت انا فوق تعالو .. جلسنا تقهوى ونسولف .. شوي الا الساعه انتظار صارت ساعتين ! شوي الا الرحله فيها انتظار بعد في تونس ساعه ! وجع وجع وجع واحسب من اقلاعنا الساعه 3 الفجر من السعوديه الى وصولنا لكازا مع الوقفات والانتظارات الا الرحله كلها راح تاخذ 45دقيقه من الرياض الى الدوحه + 2 انتظار + 7 ساعات الى تونس + 1 ساعه انتظار تونس + 2.30 الى كازا = 13,15 ساعه طيران !!!!!!!
الله لايبارك فيك يابراهيم .. كيف ما انتبهت للوقت هذا كله .. صارت امريكا مو المغرب حسبي الله عليك ..
المهم سكتنا وقلنا خيره الشكوى الله هذا نصيبنا ايش نعمل .. والله ونركب الطياره ولا الشباب مع بعض وانا مقعدي بعيد عنهم قلت والله الحظ القشر .. واجي ادور مقعدي الا ذاك العصفور الي يجنن جالس فيه .. واطالع البوردنق ورقم المقعد الا صحيح .. قلت مدري هذا مقعدي ولا الهوى رماك علي خخخخخ .. قالت انا اسفه بس صاحبتي مقعدها جنبك وقالت تعالي جنبي نسولف مع بعض حتى نوصل تونس .. قلت وانا من يسولف معي حتى اوصل تونس ؟ ضحكت وقالت تحب اطلع مقعدي عادي مافي مشكل .. قلت اخسي والله اقومك من مقعدي .. عطيني البوردنق حقك خليني ادور مقعد الجميل .. واخذ البوردنق واطالع الا اسمها ساره ويطري علي قصيدة ساره .. واجلس اغنيها بيني وبين نفسي وهي :-

هـيـض بــن حصـيـص فــي تـالـي نـهــاره
ألـــــف قـــــافٍ مـــــن ضـمــيــره دارجــاتِـــي
راكـــــبٍ مـــــن فــــــوق مــنــبــوز الــفــقــاره
آركـــــــــي وحــــبـــــال كـــــــــوره كــالــفـــاتِـــي
آركـــــــــــــــيِ ومـــربــــع عـــشــــب الـــقــــراره
مــاعـــلاه الــشـــد لـــــه ســـبـــع ســنــواتــي
كــــن فــــي عـيـنــه مــــن الـفــرقــا شـــــراره
أو مــخــالــيــب الــــوحــــوش الــطــايــراتــي
ولـعــتــنــي بــالـــهـــوى والــــزيــــن ســــــــاره
واخـلـفـتـنــي عـــــــن غــنــاديـــر الـبــنــاتــي
مــــن خــبــر جــــارٍ ذبـــــح بــالـــود جـــــاره
بـالــمــبــيــســم والــثـــنـــايـــا الــمــرهــفـــاتـــي
الـمــطــوع لـــــو يــشـــوف خــديـــد ســــــاره
طــبـــق الـمـصـحــف وعـــجـــل بــالــصــلاة
ريــــق ســــاره مثل ســكــر فــــي غــضــاره
أو حـلــيــب ابــكـــار عــــــربٍ مـسـمـنـاتــي
والــثــنـــايـــا قـــحـــويــــانٍ فــــــــــي زبــــــــــاره
نـــافــــلٍ نـــــــوره عـــلــــى كـــــــل الـنــبــاتــي
والــنــهــود زبـــيــــديٍ فـــــــي لـــغــــد قـــــــاره
عــلــهـــن وبــــــــل الــحـــيـــا ومـصـلــعــاتــي
حالفِ مـــــــــــا اسلى ولا انسى حب ساره
لــيـــن اهـــــل شــقـــرا يـخــلــون الـــصـــلاة
ديــــــرةٍ بــالــوشــم مـــــــا فــيــهـــا صـــقــــاره
غـــيــــر شــيــبـــان وعـــجــــز مـحـنـدبــاتــي
مـــن خـشــوم كـمـيـت إلـــى حـــد الــزبــاره
جـــعــــل تــمــحـــل والـــوشــــوم مــربــعــاتــي
صــاحــبـــي بــالــجـــو مـــــــد هـــالــــه وداره
مــــا ربــــى فــــي ثـــــر مـــــدا وإلا مــراتـــي
جـعــل ضـلــع طـويــق يـمـحـل هــــو وداره
جـــعــــل يــمــحـــل والـــوشــــوم مــربــعــاتــي
حـيــث يـنــزل عـنــد نـــا مـظـعـون ســــاره
واهـــنـــي صـويـحــبــي عـــنــــدي يــبــاتـــي
واوجــــــودي وجــــــد مــكــســور الــجــبـــاره
ســـاهـــرٍ تـسـعــيــن لــيــلــه مــــــا يــبــاتـــي
أو وجـــود الـلــي فــضــى الـحـاكــم ديــــاره
وخــــــــذ مــــالــــه والـــحـــريـــم مـســلــبــاتــي
عــقـــب مــاهـــو تــاجـــرٍ راعـــــي عــمـــاره
صـــــــــار فـــــــــلاح وامـــــــــوره هــيــنـــاتـــي
لا يــمــي يـعـطــى حـنــيــشٍ فـــــي خــبـــاره
ســمــهــا يــشــظــا الــعــظــام الـصـالـبــاتي

المهم وانا اردد الأبيات الا مقعد ساره قدام في الصف الاول .. قلت ياسلام ساره كلها بركه .. وانا الي اجلس ومدد رجيلاتي قدام .. والشله الي تضحك علي لاني لحالي صارو يطالعوني بنظرات الحقد والكراهيه .. والي موتني ضحك صار قدامهم صينيين وهات ياضرب في العصير وانواع الازعاج وتنزيل الكراسي عليهم خخخخخخخ , طبعا بعد ما اقلعنا صار فلم الصينيين معهم .
نرجع لمقعد ساره المهم .
شوي وانا ادور اسفنجت الاذان في كيس مقعدي الا الي تقول ممكن لوسمحت !
واطالع الا وحده لا راحت وحده ولا جت وحده .. قلت امري .. قالت ممكن اعدي مقعدي جنبك , قلت يابركات ساره .. قالت ايش ؟ قلت ولا شي تفضلي اهلا بيك والله , ان شاء الله على كازا معنا ؟ قالت لا والله تونس , قلت والله شكلي بنزل في تونس معك خخخخخخ
المهم اقلعنا وانا الي التفت عليها ودق سوالف وضحك , شوي واحنا نتباحث العلاقات التونسيه السعوديه .. الا قالو اربطو الاحزمه قلت انا معقوله وصلنا تونس ؟ بسرعه هذي ؟ قالت الوقت بسرعه راح .. قلت اجل ايش اقول انا .. بعدها تم توديعها بكل ما استقبلت به من حفاوة وتكريم .. ووعدتها بزياره لتونس الشقيقه ان شاء الله .
نزل ركاب تونس وجلسنا ساعه انتظار .. وصعد ركاب كازا من تونس .. وتوكلنا على الله واقلعنا قلت ازور الشله اشوف ايش اخبارهم مع جيرانهم الصنيين .. الا اشوف ان العلاقات الصينيه السعوديه متدهوره .. والتنين الصيني عافلها عفله يحبها قلبك وسادح المقاعد على النسور السعوديه .. ونسورنا حفظهم الله بالعين العافيه وساكتين وذا المقاعد راصتهم خخخخ .. قلت تستاهلون وحقكم وماجاكم .. اجل تضحكون علي لما صار مقعدي بعيد عندكم ؟ الحين انا الي بضحك عليكم حتى نرجع الرياض يارخوم مو النسور خخخخخخخخخ .
احساس بارد دخل جسمي .. وبديت ارتعش .. وحسيت بأن لي نفس اطالع من نافذة الطياره .. شوي واقوم واروح لمقعد فاضي وافتح الشباك .. والا كازا الحب .. الماء والخضره والغيوم والاجواء الي تخليك تنسى اسمك ايش .. واجلس اطالع لحد مانزلت الطياره المدرج .. على فكره انا ماعمري جلست عند شباك طياره لاني اخاف من المرتفعات .. بس وربي المره هذي غير مدري ايش جاني .. صرت اتابع واطالع لحد مانزلنا المدرج .. ومحمد عبده في اذني يردد الاماكن كلها مشتاقه لك ....

مطار كازا وشنطة البنقالي محيميد الي وقفونا بسبب شكلها المريب والبحث عن مفتاح القفل .. قصة السياره المستاجره وتوقيف الدرك لنا عند اول تفتيش بعد مطار كازا بسبب بلاغ من صاحب تاكسي .. الوصول للفيلا ومقابلة صاحبتها لدفع قيمة الإيجار .. انتظروني في الحلقه القادمة