رد: رحلتى للمغرب ,الجديده,اسفي.الصويره,اغادي ر,مراكش
بعد ماجلسنا 3 ايام فى الجديده كانت الوجهه التاليه هي الصويره وخططنا نجلس فيها 3 ايام ومن بعدها نروح على اغادير ,ولاننا فى الجديده لازم نمر على اسفي لاننا بناخذ الطريق الساحلي ,وهي تقع فى منتصف الطريق الساحلي بينها وبين الصويره ,كان طريق الوليديه الى يطلع على اسفي صعب وضيق بس الحمدالله مرينا فيه بسلام وشفنا اصلا حادث سياره قدامنا طاحت فى حفره على الطريق لذا انصح بالحذر منه ,بعد ماقطعنا 144 كيلومتر وصلنا الى:
مدينه مشهوره بالسمك وصناعه الخزف والفوسفات وكل هذه الاشياء بيلاحظها الزائر داخلها طبعا اسم المدينه هو اسم امازيغي ويعني مصب النهر
الشاب فى اسفي ينادوه مسفيوي والبنت مسفيويه واشهر اكلاتها والتى تشتهر فيها المدينه هي كعك (النجيمات) يم يم واعره
كنا مخططين اننا نعتبرها جسر عبور فقط الى الصويره بس صارت لنا سالفه واطرينا نجلس فيها يوم
اول مادخلنا اسفي ونزلنا من الشارع العلوي بعد فندق بانوراما حصلنا مقهى (رأس الافعي) المشهور جدا وموقعه مميز وسموة بهذا الاسم لانه يطل على جزء من اليابس ممتد فى البحر على شكل ثعبان
جلسنا فيه نريح شوي واتصفح النت لان عندهم وايرلس وصادف مباره لريال مدريد فى الدوري الاسباني قلنا خلنا نشوفها يمكن يخسروا هههههههه
تراني كتلوني ,بعد ماشفنا شوط من المباراه روحنا واكتشفنا الدنيا غربت حسينا بجوع فى الطريق وكنت اعرف ان فيه مطعم مشهور فى اسفي اسمه لاتراتوريا وتعني (السلحفاه)بالايطالي لان صاحبته كانت وحده ايطاليه اسمها ايفت وباعته بعدين لواحد مغربي
مكان المطعم يقع فى منطقه باب الشعيبه المطعم حلو من الداخل وفخم ونظيف وحطين فيه ديكور ولوحات فنيه واكله بحري ولذيذ اخذنا بستا وبيزا وكولا وماي وكان الحساب 150 درهم
ونحن ناكل صادف ان مباراه برشلونه بديت وجلسنا نشوفها وكان فى المطعم واحد جالس ورانا وشاف حماسنا الزايد لبرشلونه وكان يطالع فينا والا نحصله بعد شوي يجي ويكلمنا ويقول من ملامحكم عرفت انكم مو من هذه الديره طلع الاخ قطري واسمه ابو نواف جلس معانا وتمينا نشوف المباراه ونسولف ,وهذا ابو نواف طلعت سالفته سالفه كل شهر او شهرين يروح اسفى يجلس شهر ويرجع قطر يقول انه يتاجر ويصدر خزف وعند شغله الخاص بس تميت محتار وقلت فيه شى محيرنى فيه ,المهم خلصت المباراه واستاذنا بنروح ودعانا الريال لبيته بس استسمحنا منه واتبادلنا ارقام التلفونات وروحنا والدنيا كانت ظلمت والاخس من كذا نزل المطر ورحنا وطي لان الطريق الى يودي للصويره اصلا صعب وبدون اضاءه وغير كذا نزل مطر غزير وشكلنا اتوهقنا
قلنا مافي حل غير اننا نبات اليوم فى اسفي واخترنا نرجع لفندق اتلانتك بانوراما الى شفناه فى البدايه وبعد شويه الا ويرن التلفون طلع ابو نواف يدق ويقول (مافي حد صاحي يسافر فى هذا الجو تعالو اقربو عندي بنتقهوي والشيشه موجوده ) عاد نحن سمعنا سالفه الشيشه ويفتر راسنا وخاصه فى هالجو البارد ندور شئ يدفي ,دلنا ابونواف على مكانه وطلع مستاجر شقه فى منطقه قريبه من عزيب الدرعي وبعد ماعرفنا المكان جلسنا داخل السياره يمكن 10 دقائق ننتظر يخف المطر بندخل ومافي فايده ونركض ركض لين البنايه
جلسنا مع الريال واخذتنا السوالف وطلع سالفته سالفه مع اسفي وقلنا قصته وهى بختصار انه اتعرف على وحده من اسفي من 16 سنه وهي يهوديه بس حبها وعشقها لحد الجنون وخلال كل هذه السنوات ماقطع عنها ابدا ولا يقدر يستغنى عنها واشترى لها سياره وكمل اقساط بيتها ,,,,,الخ
جلسنا ليلتها نسمع لسوالفه واخذنا الكلام وكانت الجلسه حلوة ومو ناقصنا شئ لين ما اخذنا التعب وماحصلنا عمرنا غير اننا رقدنا على الكنب بدون مانحس
صحينا على الظهر وماحصلنا ابونواف فى الغرفه وشفناه بعد شويه من الشباك يكلم وحده فى سياره بورش كايين وينزل من السياره اغراض ويدخل علينا ويقول هذا غداكم جهزته لكم حبيبت القلب (ليجين)وقالت ضروري تكرم ****ك
جلسنا نتغدى ومن بعدها استاذنا ابو نواف لان ورانا رحله وعلى امل اذا شاءت الاقدار نتلاقى مره ثانيه وبعد ماسلمنا عليه ورحنا اخذنا جوله فى مدينه اسفي ناخذ فكره عنها وعلى فكره اهل اسفي يحبو الضحك وايد وهذا الى لاحظته عليهم وناسها طيبين مثل الجديده ,ولاحظه ان استخدام الدراجه الناريه يكثر فى اسفي مثل بانكوك.
الاماكن المشهوره فى اسفي:
ساحه الطاجين الى بالقرب من عماله اسفي يوجد بها اكبر طاجين فى العالم وهذه صورته
***سوق الخزف المشهور بالقرب من الحصن القديم للمدينه
***شارع كندي هو الشارع الى يوجد به مطاعم الشواء
***اتلانتك بانوراما 4 نجوم سعر الغرفه فيه 500 درهم
***فندق فرح 3 نجوم وكان اسمه القديم السفير
***مقهى راس الافعي اشهر مقهى وبه خدمه وايرلس
***مقهى المناره وبه وايرلس ايضا
لاتوجد مقاهى شيشه فى اسفي
شاطئ جميل وانت طالع من الوليديه بتحصله قدامك
وبتحصل اولاد يبيعو صدفيات على الطريق مع ان وزاره الصيد حذرت سنه 2008 من بيعها لان بها مواد سامه وفعلا وقفنا بنشوها وطلع فيها ريحه قويه
بالقرب من مدخل اسفي الساحلي شاطئ جميل ومرتب ونظيف ويكفي ان تقف فى اعلى الجرف فيه لتشاهد سحر مياه البحر ولمعان اشعه الشمس على الامواج
بعد مغادرتنا لاسفي الى الصويره كانت معامل الفوسفات فى نهايه طريق المدينه وابخرتها والدخان مبخر الجو
