السلام عليكم ورحمة الله وبركاته


من جديد أشكر كل الاعضاء المتفاعلين باستمرار في هذا التقرير ، اشكر تحفيزهم ودعمهم فهو الوقود الحقيقي لكتابة هذا التقرير في وقت قياسي .


الحلقة الثانية عشر ( المغادرة :Abu Ahmed (712): )

بعد السهرة الحزينة في مساء البارحة ، صحيت من النوم الساعة 11 صباحا ولقيت كل الشله صاحين ، طبعا ما لحقنا ننام ولا ساعتين ، رحت لقيت صاحبي الله يعطيه الصحة رتب اغراضي كلها ، اخذت شور سريع ولبست واكلت الساندويتش اللي مجهزينه لي ، بعدها رحت اساعد الشاب اللطيف في ترتيب الأغراض في السيارة نزلت لقيت صاحب الفيلا عند الباب شكرته على كل شي وهو بعد شكرني اننا مرتبين الفيلا واننا كنا كويسين ومو مزعجين ، وحنا جالسين برى انا والشاب اللطيف وصلوا اصحاب اخويانا السعوديين وقالوا ان اصحابي السعوديين في الطريق جايين في تكسي ثاني ، دخلت الفيلا معاهم وتوادعنا بالأحضان والدموع ، وبعدها جو اصحابنا السعوديين وبصراحة والله حسيت كني اودع اخواني ، بس قالوا هم حنا اللي مصبرنا اننا لاحقينك الرياض بعد اسبوع ان شاء الله ، جاني صاحب صاحبي اللي مع اخوياي السعوديين وقالي ابغاك لحالك ، قالي انا مره اشكرك لكل شي سويته لنا وحتى على انك عرفتنا على الشباب ، لانهم مره طيبين وكويسين قلت عموما انا ماسويت شي من راسي لو ماكنتوا تستاهلون الاحترام ما احترمتكم الدنيا أخذ وعطا ، المهم نزلت دمعه منه قلت بعد انت يرحم امكم حسيت اني بموت بعد شوي كل ماقابلت واحد منكم بوجهي تسابقت دموعه خلاص ماعاد باقي الا انا ماصحت والشاب اللطيف اتوقع باقي شوي ويخقها ، حضني بغى يكسر ضلوعي وودعتهم وقلت للشاب اللطيف شغل شغل تأخرنا ، كانت رحلتي على الخطوط السعودية الساعه 7.30 مساء ، وكان ودي احرص اني امشي بدري تفاديا لأي مشكله ممكن تواجهنا بالطريق يكون معنا مساحة وقت شوي .

قلت لهم جيبوا عصيري وحطوه بالشنطه اتوقع اني بحتاجه لأن المود حقكم واضح انه يبيله كرتون عصير ، مشينا ووقفنا عند اول محطة وانت طالع من اغادير ، كانت مشاعر كثيره مختلطه فيني وانا اودع اغادير ، بس حاولت اني اتجاهلها حفاظا على البرستيج وعشان ما اخقها ، نزلت للسوبرماركت لقيت عندهم الكوب اللي يحفظ الحرارة ودبر لنا كيس ثلج صغير ما يسوى بس قلنا خير وبركه ، جهزت عصيري وحاولت اني ادعس في البداية قبل ما يذوب الثلج واخلي المزمزه في الأخير ، بدى يزين الجو ونزلت المرتبة شوي وكان معنى سي دي ابو نوره ، التفت على صاحبي كم مره لقيته مو هنا ولا يبي يطالعني حتى ، قسم بالله طول الطريق من اغادير لين مراكش وهو يطالع الشباك ولا فتح فمه بكلمه ، جلست اسمع ابو نوره واسولف مع اخوياي في البي بي ، طبعا الطريق من اغادير لين قبل مراكش يمكن ب 30 كيلو مره متعب ، كله جبال وطلعات ونزلات وبلاوي زرقاء ، والشاحنات تمشي صفر بالطلعات وشاحنات تطوف وهي تمشي 10 ، يعني لو اني اسوق كان انهبلت ، لما وصلنا قريب من مراكش كنت وقتها قضيت على العصير ، وكانت الساعه تقريبا 2 الظهر ، اول ماعدينا من اللفه حقت مراكش جتنا محطة دفع حقت الطريق السيار وبعدها فيه محطة حلوه ، وقفنا فيها وتخلصت من آثار العصير وكل شي يتعلق فيه ، بعدها راحوا السوبر ماركت وجابوا اغراض موية وحلويات وخلافه ، لما مشينا عكست الجلسه حقتي وصرت اشوف اصحابنا ورى ، جلسنا نسولف ونتذكر مواقف ونضحك صراحة لطفت الاجواء شوي هالسواليف ، بعدها جانا اتصال من اخويانا اللي في كازا اللي كانوا معانا في مراكش ، شغلوا السبيكر وجلسنا نسولف وقالوا انهم بيجيون المطار ، سألوا عن صاحبي وعيا يرد وقالوا له انه مره متضايق وماله خلق ، جلسنا نسولف ونستهبل معاهم شوي وبعدها قفلوا ورجعنا نكمل سواليفنا ، كان الطريق ولله الحمد خالي من المشاكل ولا كان فيه درك ابد والامور مريحة الحمدلله ، الشاب اللطيف يوم صار الطريق زين بعد مراكش زاد السرعه واخذ راحته ، قربنا من كازا وكانت الساعه تقريبا 4 وربع العصر ، المخرج حق المطار كان على الطريق قبل ماندخل كازا دخلنا معاه وكان فيه محطة دفع اعتقد ، وبعدها دخلنا في اتجاه صالات المغادرة ، وقفوا السيارة نزلت انا والشاب اللطيف واخذت اغراضي والبقية اخذوا السيارة راحوا يوقفونها وبيلحقوننا .

دخلت المطار وتوجهت للكاونتر قصيت البوردنق ودخلت اغراضي وجلسنا ننتظرهم ، تأخروا شوي علينا وكانت الساعه وقتها تقريبا 5 الا ربع ، بعدها دخلوا وكانت معاهم الشلة حقت كازا ، دخلوا المجموعه كلها مع بعض وسلموا علي اصدقائنا القدامى ، بعدها كان فيه كم كوفي شوب على اليمين وقررنا نروح لواحد منها ، رحنا وجلسنا في مكان جوى داخل شوي ، جلسنا نحكي للمجموعة حقت كازا وش سوينا في اغادير والمغامرات وكل شي ، اخذنا الوقت وما انتبهت الا الساعه صارت 6 تقريبا ، طلعنا كلنا للجهة الثانية حقت الجوازات واللي هي المدخل اتجاه صالات المغادرة ، خلاص طبعا في هالمكان لازم نودع المجموعة ونفترق ، سلمت عليهم بالترتيب ، مجموعة كازا كانوا هم البداية ، بعدين اصحابنا اللي كانوا معي في اغادير ، وكان باقي الشاب اللطيف وصاحبي ، سلمت على الشاب اللطيف وخقها ياحبيله ، قالي والله اني ماكنت اعتقد اني بتضايق لهالحد بس والله اني اعزك كثير وانك اكثر من اخ ، طبعا صاحبي اصلا خلقه منهار ولما خقها الشاب اللطيف طاح بحضني صاحبي وقدام الناس كلها وصياااااااااااااااااااااا ح ، طبعا انا ماعاد ادري وش اسوي وقتها الصالة مليانه سعوديين بيروحون معانا بالرحلة والموظفين وحق وزن الشنط وحق تشييك الجواز كلهم قدامي ، وهذا متعلق فيني ولا ادري وش اسوي ، حاولت اهديه واقوله خلاص الناس كلها تطالع فينا ولا كأنه يسمعني اصلا ، المهم جو اخويانا حقين اغادير وتكلموا معاه وسحبوه وجلسوا يهدونه ، ودعتهم على السريع ومشيت وكان والله قلبي يتقطع على فراقهم وانا ماشي ومخليهم ، وصلت لموظف الجوازات اللي يشيك على الجواز في البداية ويشوف انت عبيت البطاقة ولا لا ، قعد يتميلح وانا مالي خلقه خلاص المود الحين صفر مكعب ، لما شافني ماعطيته وجه قالي الكرت مو كامل روح عبيه ، قلت مو مشكله انا وياك اليوم والله ماتاخذ فلس ، جلست اعبي الكرت على مزاجي اكتب شوي والعب بجوالي شوي لين جا وسحب الكرت وقالي سير سير ، المهم مشيت وانا ماعلي منه وصلت لموظفين التختيم ، كان فيه واحد شكله وماعنده احد رحت له اخذ جوازي ختم لي وقالي مافيه حلاوة ، قلت مامعي دراهم ، قالي اي شي يا أخي عشان حبيبك اللي جالس يبكي عشانك ومتقطع قلبه لك ، ابتسمت ابتسامة صفراء وقت له وش دراك انت وانت هنا ، مستحيل انك تكون شايف الموقف ، قالي ياحبيبي المطار كله درى وانت تقول ايش دراك ، بصراحة كان اسلوبه حلو رغم انه يبي اكرامية بس ما اعرف حبيته لأنه ضحكني ولانه محترم ، عطيته 50 درهم ومشيت .

وصلت عند كاونتر تفتيش الأمتعه والتفتيش الشخصي ، كانوا فيه اثنين كل واحد يقول انا اقذر من الثاني ، حطيت شنطتي في الجهاز حق الشنط ولما جيت بطلع اغراضي اللي في جيبي عشان امر انا من الجهاز قالي لا لا تعال وجيب جوازك ، رحت له وعطيته جوازي ومريت من الجهاز قالي اكرامية وما ادري ايش وبنفس خاااااايسة ، قلت مامعي شي :Abu Ahmed (786): ، المهم حاول فيني قلت ما معي شي ، قالي طلع الاغراض من جيبك وحطها بالجهاز وارجع انت مر بالجهاز ، قلت طيب ، طلعت اغراضي وحطيتها بالجهاز ومريت وماصفّر الجهاز حقهم ، رحت باخذ اغراضي قام اخذ المحفظة قالي بفتشها ، قلت فتشها بس اقسم بالله العظيم لو ينقص منها ربع درهم وانت عارف ان فيه كميرات والله لا أرفع شكوى وقضية وانك كنت تطلب رشوة وكل هذي واضحة بالكميرا ، دخلتني ولما ماعطيتك رجعتي وطلعت اغراضي وخليتني امر مره ثانية على الجهاز ، المهم قفل المحفظة على طول ورجعها لي وقالي سير سير ، اخذت اغراضي ولما جيت اخذ شنطتي قالي الموظف اللي جالس على الكمبيوتر لحظة لحظة افتحها ، قلت حاظر وفتحتها له ، قالي وش فيها قلت لاب توب ودخان وشواحن جوالات ، قالي بس ، قلت مو انت تقول تبي تفتش ، فتشها وشف وش فيها ، قالي طيب عشان ما تتأخر اعطيني حلاوتي وسير ، قلت لا انا ابغى اتأخر ولو راحت على الرحلة برجع لإدارتك هنا واطالبهم بتعويض عن التذكرة ، قالي واحنا وش خصنا ، قلت لما تروح الرحلة واقدم شكوى راح يشرحون لك وش خصك ، قالي طيب ابي اخذ دخان ، قلت لو نقص من اغراضي شي ان شاء الله ولاعة اقسم بالله لا ارفع شكوى رسمية واصلا انا ودي اجلس زيادة كم يوم بالمغرب ، قام رمى شنطتي وراه بشكل قذر وقالي سير ، قلت والله لو ارفع شكوى ان تتحاسب على الحركة هذي خصوصا ان الشنطة فيها لاب توب وممكن يتضرر من هالحركة بس احمد ربك ان الشنطه ماطاحت من الطاولة ، ناظرني بحقد وده يسوي شي ومهوب قادر ، كانت معي تقريبا 600 درهم ومالقيت صرافة جوى ، شريت من محل حق اكسسوارات جنب السوق الحر ، وبقى تقريبا 200 درهم ، كانوا اللي يشتغلون في المحل واحد ووحده مره محترمين ومؤدبين قلت والله تاخذونها انتم ولا ياخذونها هم ، عطيتهم الدراهم اللي باقيه معي وقلت هذي هدية مني ، ورحت للبوابة انتظر الإعلان الأخير للرحلة ، وانا جالس عند البوابة جتني الموظفة اللي كانت بالمحل وجلست جنبي وجلست تسولف ، بصراحة هفني الشوق وانا قلبي قايلكم اخضر :Abu Ahmed (159): ، مره مره مره ماكانت شينه بس خلاص الرحلة تلفض انفاسها الأخيرة ، عرض علي المساعدة في أي مره اقرر اجي فيها المغرب بعدين وعطاني رقمه ومشى في حال سبيله ، طبعا وانا في الانتظار كم واحد حاط عينه علي من السعودين اللي راجعين وواحد يناظرني ويتبسم عرفت انه شايف الموقف قبل ما ادخل صالات المغادرة بس قلت سو نفسك ما تدري ، كان النداء الأخير للرحلة يسابق رسايل صاحبي اللي فجرت جوالي ، دخلت الطيارة قفلت جوالي بعد ماودعت صاحبي ، طلعت الشريحة المغربية وحطيت الشريحة السعودية اعلانا لهدوء جوالي من الرسائل والمكالمات ، كانت تذكرتي رجال اعمال والكرسي مشجع جدا للنوم ، اخذت الوضعيه المثالية للنوم طلعت سماعاتي الخاصة وشغلت مجموعة من الأغاني وجلست اسمعها لين نمت ، صحتني المضيفه وكان باقي تقريبا ساعه ونوصل جده ، جابت لي عشى تعشيت بسرعة وبعدها نزلنا في جدة ، نزلوا الركاب اللي يبون جدة وجلسنا في الطيارة تقريبا ساعه ونص وبعدها اقلعت الطيارة للرياض ، وصلت للرياض وانا احس اني محتاج ليومين نوم بعد رحلة اعتبرها من الرحلات الجميلة في حياتي رغم كل المغامرات اللي عشتها فيها .


في الحلقة القادمة والاخيرة ان شاء الله راح اتكلم عن ملاحظات ونصائح ومواقف ماذكرتها بتقريري .

إلى اللقاء في الحلقة القادمة ،،،