السلام عليكم ورحمة الله وبركاته ،،،


شدتني بصراحة الردود اللي قريتها بعد الحلقة الأخيرة ، والاعضاء اللي ثارت قريحتهم الشعريه أو ذكروا بعض مما حفظوا من ابيات ، يالبى قلوبكم والله انها خضر مثلي : (216): ، بصراحة كان ودي التقرير يطول اكثر بس والله حاولت قدر المستطاع اعصر مخي طول الفترة الماضية واتذكر تفاصيل التفاصيل وارجع لرسايل ومكالمات عندي عشان اشوف الاوقات اللي نسيتها واتذكر بعض المواقف اللي غابت عني ، اتمنى اكون بالنهاية وفقت في طرح تقرير مرضي ، حاولت اذكر تفاصيل الحياة اليومية ومثال لنمط المعيشة اليومية هناك ،اتمنى اني اكون نقلت شي جديد ومختلف ومفيد ، اتمنى ما اكون ثقلت على احد ولا ضايقت احد بتقريري ، واختم بطلب بسيط بعد هالجهد الكبير ( اتمنى اشوف رأي الأعضاء بالطرح سواء كان سلبي او ايجابي وملاحظاتهم لأنها تهمني كثير ).


الحلقة الثالثة عشر والأخيرة ( مشاهدات و شي ماشفتوه - نصائح )







# مشاهدات و شي ماشفتوه :

1:- صار لي موقف غريب في أحد السهرات ، جاني واحد خليجي وانا بديسكو يقول ممكن تحاسب عني الطاولة : (45): ، اليوم اخر يوم لي ومابقى معي الا فلوس قليل بشتري فيها هدية لصاحبي ، قلت طيب كان ماسهرت اليوم عشان توفر الفلوس لهدية صاحبك : (216): .


2:- احد المتسولين الصغيرين في السن جدا في كورنيش أغادير نط على صاحبي الأولاني الخقه : (492): ، وقاله ترى حبيبك اللي معاك يخونك ، انا طارت عيوني قلت ليه كذا ياحبيبي وش سويت لك انا ، قال انت ماعطيتني حاجه ، قال صاحبي هذا مو حبيبي هذا اخوي ، قال اخوك خليجي يعني ابوه مصيدك هههههههههههه : (92): ، بصراحه مت من الضحك وعطيته .


3:- واحنا في طريقنا من مراكش لأغادير بنشر علينا الكفر ، وكان وقتها الشاب اللطيف ماعمره غير كفر سيارته وتوهق ، وطلعت انا البطل المغوار وطلعت العفريته والاستبنه وخاق مع نفسي مره اني انا اللي بنقذهم ، اول ماجيت ارفع السياره ويدخل اصبعي في المدخل حق عصا الرفع : (712): ، اول شي سويت نفسي ماعورتني بس بعدين ماقدرت اتحمل قلت تعال كمل ارفع اصبعي يعورني ، واعترفت لهم اني ماكان ودي اقولهم عشان اصير قوي ومسكوا علي هالسالفة لين رجعت : (203):.


4:- فيه واحد نصب علي نصبة محترمة ، جاب لي شريحة انوي وقال هذي عليها عرض ب 350 درهم انترنت لمدة سنة وكان يشتغل في محل جوالات في اغادير في طريق الحسن ، واخذتها وكلمت انوي وقالوا هذي مافيها لا انترنت ولا حتى رصيد ، رجعت للمحل مالقيته ولقيت المحل مقفل ، حاولت امره بعدها ما امداني ، بس ياشينها اذا لعب عليك احد تنغبن ماودك تحس بهالشعور ابد : (710): .


5:- خلال سفرتي وانا بأغادير عورني حلقي ورحت للصيدليه ، عطوني مضاد حبه باليوم مدة يومين بس ، بصراحة زعلت قلت قطو انا : (827): ، قلت ابي مضاد صدقي حق ثلاث حبات باليوم خمس أيام قالوا مافيه الا هذا : (775): .


6:- وانا في شلالات اوريكا جاني واحد خرشني ، اول ماوقف قالي اسم امي ، قلت اسسسسسسسمع ، اسسسسكت لي ، يرحم امك خذ فلوس وفكني من شرك لا تجلس تفلسف على مخي ومستقبلك مظلم وتقعد تروعني اهوجس شهر ، وأشوى تروع وراح : (96):
































# نصائح



1:- النقطة هذي مهمة جدا الحقيقة واللي هي اجراءات الدرك المتبعه في حال واجهت مشكلة لا سمح الله ، لما كنت في مراكش زارنا صاحبة صاحبي وكانت مهنتها محامية ، وبحكم الاوضاع اللي كانت في مراكش تناقشنا كثير بهالموضوع ، الحقيقة نورني لنقاط كثير كنت اجهلها فحبيت افيد الشباب فيها :

* هناك قانون واضح وصريح في البلد ، ولكن للاسف كثير من الدرك لا يطبقونه وذلك بسبب الجشع ومحاولة استغلال السياح الخليجيين بالذات ، لذلك في حالة مواجهة أي مشكلة مع الدرك في كل مره ستسمع قانون جديد .

* لا يوجد في القانون بند يمنع مرافقة المغربي للأجنبي في الاماكن العامة ، باستثناء تصرف من احد الطرفين أو كلاهما يخدش الحياء العام وهذا نادر الحدوث ، لكن مايحدث من مطاردات وابتزاز في جميع وسائل النقل والأماكن السياحية كلها هدفها الابتزاز ولا غير .

* المشكلة العظمى أن موظف الدرك بإمكانه ايقافك وتعطيلك حتى لو لم ترتكب ذنب ، وذلك يعتمد على مايكتبه في المحضر ، لذلك في حال حدوث مشكلة اجعل هدفك الأول انهائها قبل كتابة المحضر وفي حال عدم الاستطاعة عدم التوقيع على المحضر إلا بحضور محامي أو يتم الاتفاق على الانتهاء من القضية ، وذلك بسبب انه عند توقيعك على المحضر ذلك يعني انها اصبحت قضية لابد أن تعرض على المحكمة وسيحاسب قسم الشرطة في حال لم يتم رفع المحضر للمحكمة بحكم وجود دفاتر محاضر مرقمة ومجرودة على كل قسم .

* في حال لا قدر الله قمت بالتوقيع على المحضر ، لاتقبل بعدها بأي محاولات ابتزاز ولا تدفع أي درهم لأن القضية اصبحت عند المحكمة وأي شخص ستدفع له لن يستطيع تخليصك وستذهب نقودك سدى .

* في حال كنت متزوج لا تعترف ابدا بهذا الشي لأنها ستندرج تحت جريمة الخيانة الزوجية وعندها سيتم طلب ورقة تنازل خطية من زوجتك تسلم لقسم شؤون الرعايا السعوديين في المغرب ومن خلالها تسلم للمحكمة .






2:- السيارة الخاصة خصوصا في الأماكن اللي فيها تشديد راح تريحك كثير من عصابات التكاسي والدرك ( توقع الخيانة من موظفي الدسكو - التكسي - العساس - الصاحب ....الخ ) ، لذلك في حال كنت مضطر لاستخدام تكسي حاول انه ماينزلك امام سكنك مباشرة وامشي على رجولك المشي زين مع العصير : (91): .




3:- الناس اللي عايشة معاك وماشفت منهم شي شين ، حاول تعطيهم الثقة في بعض الامور واحرجهم بذوقك العالي ، حتى لو كان فيهم خصال سيئة صدقني راح يخجلون منك ويسعون بشتى الوسائل يظهرون ولائهم ، عاملهم باحترام ، بعد الله في مراكش كان العساس له دور كبير في اني اكون مرتاح لما ادخل الشقه وساعدني في امور كثير ، مثل هالأشخاص اكرمه مو بس بالمال ، يعني انت طالع تتغدى برى اذكره وجيب معاك اكل له ، لما تروح سوبرماركت جيب له بعض الأغراض مو شرط تكلف على نفسك بس امور بسيطة تحسس الشخص اللي معاك بقيمته ويستميت عشان يكسب صداقتك ، والأكيد لما تثق وترتاح مع اللي معاك رغم كل المشاكل الخارجية راح تحس انك اسعد واحد بالكون.




ماراح اكثر نصائح لأن اغلبها مكرر والشباب ماقصروا اثروا المنتدى بالكثير منها ولكن هذي اللي حسيت انها مهمة وتستحق التذكير .








في الختام شكرا من الأعماق للجميع ادارة ومراقبين ومشرفين واعضاء على كل المجهودات المبذوله ، وبحاول انقح الصور يمكن اطلع بكم صورة اضيفها مسقبلا بالموضوع،،،،


إلى اللقاء ،،،