رد: اول سفرية للمعشوقة المغربية
( الجـــــزء الثاني )
المهم طلعت من الدوام الساعة 12 وعلى الحلاق
وبعدها اخذت اغراضي من البيت
وسلمت على الاهل على اني مسافر( CAIRO )
وكان الخبير مصمّل انه يوصلني المطار
قلت اخوي موجود والامور بسيطة
قال : حشوما عليك صاحبي راك اول مرة تسييير المغرييييب
وخصني نكون حداك دابا
المهم قلت : الله لايهينك
و مرّينا خويي في شقته
وعلى مطار الملك خالد الدولي / صالة الرحلات الأجنبية
وقصينا ( boarding)
الرياض – دبي – كازا
وودعنا الخبير قبل كونتر الجوازات
وقال لنا بالحرف الواحد : استغلو كل دقيقة في المغرب
تراكم اذا جيتو بتحسفون عليها
واشوف دموعه بدت تنزل
( الله يالمغرب وش سويت بالمزاعيط )
ماعلينا
اقلعت الطائرة 9 مساء وصلنا دبي 11 مساء
( مشكلة ترانزيت الخطوط الاماراتية 8ساعات انتظار)
يوم وصلنا دبي على طول على شارع المرقبات في فندق
( kings park) واحلى راسين معسل تفاحتين
وبعدها اخذنا لفة على البار
وعلى الساعة 3 اتجهنا لمطار دبي
وتعشينا في المطار من ماكدونالدز وبعدها اتجهنا لصالة الرحلات الدولية
يوم جت الساعة 6 صباحا الا المذيع يعلن عن موعد اقلاع رحلة كازابلانكا
انا في حلم ولا علم
آه ياحلو ذيك اللحظات
خصوصا لما تروح لمكان وماتدري عن المجهول الرائع
المهم اقلعت الطائرة في تمام الساعة 7:15
خويّي ماصدق خبر حط راسه ورقد
اما محاكيكم (حالته حاله) صار لي 48 ساعة ماذاقت عيني النوم وحاولت انام لكن بلا جدوى
و بيني وبينكم في الخطوط الإماراتية
مش حتئدر تغمض عينيك
خدمات حلوة – مضيفين زي العسل – برامج مميزة- عصيرات
وعند اشارة الساعة الى 11:15 ظهرا
اعلن قائد الطائرة ربط الاحزمة تأهبا للهبوط في
مطار محمد الخامس بالدار البيضاء
وعلى مطار محمد الخامس اشرفت # مثله ولا كل المطارات ماشفت
في ذمتي في جيتي ماتحسفت # شفت الذي ماشفت في ساحل الصين
نزلنا من الطائرة وعلى الجوازات واطيح لك في واحد نشبة
ومن التلميحات والبثارة الزائدة وقولته انتم كرماء
عاد انا ماسك الوصية اني مااعطيه ولادرهم
( بالملّي متر ياحبيبي )
درا ان مافيني طب
وختم جوازي ونفسه في راس خشمه
ومن بعدها على العفش ومن ثم الجمارك
ابو الشباب نكش العفش ويلقى 3 كروز وعطورات
ويلمح لكن ( العهد اللي بيني وبين الخبير مااعطيه ولادرهم )
قام يهدر هدرة مااعرفها ونهايتها قال : سير
تنفس الصعداء
وافتح جوالي السعودي الا عشر مكالمات من الخبير
وادق عليه
قال : الحمدلله على السلامة وترى السائق مصطفى ينتظركم برّا ولا تعطيه اكثر من 200 درهم
وهو بيوصلكم لشقة ( زبيدة ) اللي في حي المعاريف بكازا
وهذا رقم جواله .....
دقيت على مصطفى الا الرجال يحترينا برا
قلت عطني عشر دقائق ونكون عندك
قال : صافي
رحت صرفت وكان سعر الصرف
000ا ريال سعودي = 2460درهم مغربي
وطلعت شريحة مغربية ب 50 درهم
وشحنتها ب 100 درهم وكان عرض الدبل موجود
المهم سلم علينا مصطفى وحط اشناطنا في سيارته
وتل سيرها عدل على كازا
وخذ لك انواع المدح عن خوينا الخبير
مع ان ثلاث ارباع الكلام مافهمته
اللي اذكره ( سعد ... عزيز عليٌا)
والمدح كله ماهو لله
وصلنا شقة زبيدة على الساعة 2:30
وكانت عبارة عن غرفتين وصالة ودورة مياه اعزكم الله
ومطبخ وفيها شغالة
ونقابل زبيدة فيها وهي في الاربعينات من عمرها
وقالت لي : كم بتاخذون يوم قلت : يومين ويمكن نمدد
قالت : السعر ديالها 1000, قلت لها سعد قال :800
قالت : اليومين لها سعر والاسبوع له سعر
وادق على الخبير استشيره قال عطني زبيدة
المهم وافقت على 800 قابلة للتمديد
وانا وقتها مايهمني السعر لكن ماودي انها تضحك علي
الشقة بشكل عام جيدة جدا
ويوم حطينا اغراضنا ورتبنا امورنا
رحنا شرينا الاغراض من سوق اسيما
وتغدينا
بعدها كلمت مصطفى واتفقنا على 200 درهم في اليوم
لجميع المشاوير
هنا وقتها معاد فيني قطرة
وحط راسي وماصحيت الا الساعة 12 ليلا
اويلي السهرة بتروح علي
اشيٌك على الجوال الا اتصالات من الاهل ومن الخبير
ومرسل لي رسالة نصها
( قم يامهبول بلاك هاوس بيفوتك وانت باقي نايم
واذا في راسك نوم خله اذا رجعت للسعودية )
وافزلك زي الحصان واصك لك شاور واروح لخويي الا هو غاطس في سابع نومه واصحيه
ويالله صحى
( عارف جوه النوم الكثير وشرب العصير)
المهم كلمنا مصطفى وجانا بعد 5 دقايق
وفي هذه الاثناء كلمت الخبير الا الرجال ضايق مني ويقول
ياخي احد ينام وهو توه واصل المغرب
قلت : النوم سلطان ولكن
مالك الا اللي يطيب خاطرك في البلاك
قال : شكل ماعندك احد
جانا مصطفى في الموعد المحدد وعلى كنتاكي ومن ثم الى
وفي بلاك هاوس سايقين ضعنا # وهبت هبوب الشوق منٌا ومنٌا
يامحلا في بلاك هدرة جملنا # بين السمر والشقر غادة ونسرين
حزة دخلنا بلاك حالي ماهو حال # جاني هبال وحيٌروني الغنادير
شفت الطيور انواع والوان واشكال # كل على مذهب ومبدأ وتفكير
خويي اللي معي تعرفون جوه وخاويته الى سوريا ومصر
ماهو اكبر همه الطيور
لكن عقب اللي شافه ناظر في وقال
ياوجد حالي من مزايين كازا # اللي غنجهم يحيٌر كل الاذواقي
المهم حاولنا ناخذ طاولة لكن المشكلة جينا متاخرين
فكل دفع 150 درهم دخولية مع مشروب مجاني
انا جلست اراقب الوضع واصدق اكذب
القي نظرة على البست الطاولات البار
وبصراحة تحتار فيمن تختار
وذيك الايام توٌها نازلة اغنية ( التاكسي ) لمشعل العروج
وماتشوف غير قوة تفحيط في البست
وايضا اغنية ( تنحط عالجرح يبرا ) للعملاق الكبير
راشد الماجد كانت ماكله ام الجو
يوم انتصف البلاك ناظرت الا خويي ومعه طير جاي على جوٌه
تقول يعرفون بعض من زمان
وشف هبال وشطح وضحك
المهم قلت في نفسي ( حان وقت الهدد )
الا يوم طاحت عيني على احد الطيور الكازاوية
من قلب درب السلطان
جوٌه خطير واسلوبه مثير
وبعد نظرات الإعجاب والتلميحات وافلام الاكشن
سلمت عليه وعزمته على عصير
وقال : انت كريم وحنا نستاهل
وخذلك جو وعباطة وفلة على غير ملة
عند الساعة 15 :4 حان وقت انتهاء البلاك هاوس
بصراحة كن وقت البلاك دقيقتين
وادوٌر على كحيلان الا الرجال خاش ام الجو مع طيره
في احد الزوايا بحال روميو وجوليت
خربت عليه وقلت له : يالله مشينا
قال : وين
قال : السعودية
بغى ينجن هههههههههههههه
قلت له السواق يحترينا برا
علمنا الطيور عنوان الشقة وحركنا
قبل لا نجي الشقة كان فيه تفتشيش من الدرك
ويستلمونا طقطقة لين فككوا ام الجو
وفي اثناء النقاش مع العسكري دق علي طيري واقفل بوجهه
ابي الفكة من القلق اللي طحت فيه
وبصراحة اللي بنيته في البلاك هدموه الدرك في 5 دقايق
وبغيت ادهن سيره لكن مافيه شي يستاهل اني اعطيه
يوم شافو مافيه فايدة مشونا
وصلنا الشقة ولقينا الطيور قدامنا
كيف وصلوا قبلنا
اهل كازا ادرى بشعابها؟؟؟
ويجيني طيري يتشرٌه من تقفيلتي بوجهه
خاف اني اسحب عليه
وشرحت له موقفي من الدرك
الحاصل بدينا سهرتنا باجود انواع العصيرات
واحلى دي جي
وماتشوف غير الرقص والهبال والضكك والسوالف
الين وصلنا الى طبقة الارتفاع المسموحة
ونمنا على الساعة 7 وعليها
وعلى الساعة الواحدة ظهرا صحيت من النوم
وكلمت الشغالة تجهز الفطور
واجريت اتصالي بالخبير وعطيته العلوم من الالف للياء
وقلت له ( اشهد اني يوم الومك على المغرب كنت غادي )
قال : توّك ماسميت قلت : ليال العيد تبان من عصاريها
المهم افطرنا وواعدنا طيورنا في مقهى الديوان
جانا مصصفى على الساعة 3 واخذنا لفة على كورنيش عين ذياب
وانا اشهد انّ نسيم البحر يرد الروح
لكن عيب كورنيش عين ذياب كثرة الشحاذين
المشكلة انهم انواع الامراض النفسية
لدرجة ان خويي بغا يعطي واحد من البزارين كف على وجهه
يوم شفنا الوضع كذا قلنا لمصطفى آجي
وودانا على التوين سنتر
وناخذلك لفتين على السوق وبعدها شربنا شاي مغربي
في احد المقاهي
مالكم بالطويلة وانا اشرب الشاي اللي جاني اتصال
من الخط الساخن ( الخبير )
وقلت له : كازا ماتخارج معي
وهو من الرياض كان يقولي خلك بكازا يومين واذا جازت لك مدد
وبشكل عام كازا حلوة لكن عيوبها
الزحمة وكثرة الناس ونظرات الشعب ومضايقات الدرك
ونظام الشقق يخوف شي ولا تاخذ راحتك
المهم دق علي بعد 10دقايق
وقال : اتفقت مع واحد اسمه جمال وبيعطيكم شقة غرفتين
في منتجع النخيل ب 1000 درهم بمراكش
قلت : توكلنا على الله
عاد اتفقت انا وخويي نتلّها من بكره الى مراكش
الحاصل طلعنا من التوين سنتر وعلى الشقة
ونتعشى احلى طاجين لحم بالبرقوق من يدي ( عائشة )
لبى قلبها اشهد انها افضل شغالة بكازا
يوم جات الساعة 8 الا طيري ينشد عن الحال
ويقول : وافينك يالزيييييييييييين انا في الديوان دابا
قلت : 10 دقايق ونكون عندك
طلعنا من الشقة وعلى الديوان
وهو مقهى عبارة عن جلسات مرة يغني فيه فنان ومرة دي جي
الوكاد طلبنا معسل وبعض العصيرات
وكان طيري جالس حدايا وانواع السواليف والروقان
لين الساعة 30 :10
بعدها قلت : الشقة الشقة ياهملالي
وصلنا الشقة وماتشوف غير المكسرات والعصيرات مرصوصة
وقبل لا ابدأ الاحتفالية وصيت مصطفى يحجزلنا طاولة
ماودي يصيرلنا مثل ماصار البارح
ويكفي اننا دفعنا اكثر من 2000 درهم طلبات وحنا واقفين
المهم بدينا الحفلة وخويّكم في الله ماسك الدي جي
وانا نظامي اول الجو لزوم ابو نورة واشغل من اجمل اغانيه
( يوم اقبلت صوت لها جرحي القديم ) (ماعاد بدري )
( لي ثلاث ايام ماجاني خبر) ( اواه ياقلب عليل تعلقت )
( رحت يم الطبيب اللي يداوي الجروحي )
بعدها حسيت اني اطلق واحد في العالم
وقلت للطيور ( you have control)
وشغلونا غربي على مغربي وشوية خليجي
وانا وقتها ماتفرق معي لو يشغلون اغاني هندية
كان جوي حزتها خطييييييييييييييير
ومن زود الوناسة بغينا نكنسل الروحة للبلاك هاوس
ولولا الحيا من مصطفى كان صارت علوووم
مالكم بالطويلة جانا مصطفى على الساعة الواحدة ليلا
ونركب حنّا و الطيور في السيارة الا يوم مصطفى كعععع
وجته ام الركب وقال لي : مايمكنش
قلت : يامصطفى هي خاربه خاربه خلينا نخربها
وادفه ب 100درهم وهو يتلّها
وصلنا البلاك واتجهنا لطاولتنا وكان سعرها 1850 درهم
مع العصير
وعلى الساعة 2:30 امتلى البلاك عن بكرة ابيه
وبيني وبينكم كنت استرق النظرات من فترة لأخرى
لان طيري مسوي محجر لي ( يامن شراله من حلاله علٌّة)
لكن الورطة الكبرى وقعت يوم شفت لي طير من مواصفات
(full option)
وش الحل ..... وش الدبرة
واللي رفع ضغطي زيادة ان الطير شغال قوة نظرات
درا انّي خقييييييييييييييت
المشكلة ان طيري الكازاوي ناشب وذابحته الغيرة
قلت في خاطري مالها الا كحيلان
وكلم خويي ابيه يجيب لي رقمه وأشرله على الهدف
قال : غالي والطلب رخيص
الزبدة انه اجتاز المهمة بنجاح
يلوموني صحيبي فيك # صراحة قمة الروعة
ولكني كنت متورط في اللي معي
والادهى والامر ان اغراضه في شقتي
يعني بصريح العبارة دخلت في حرب عارف نتيجتها
اكييييييييد خسااااااااارة
وفكرت بالمنطق وقررت اني اكمل ليلتي مع الكازاوي
والصباح رباااااااح
المهم على نهاية البلاك هاوس بلغت طيورنا الوعد في الشقة
وعلى طلعتي من البلاك الا (full option) يناظر فيني مبتسم
وكان م...... آه ياقلبي آه
كان خوفي اني اطلع من المولد بلا حمص
مشينا شقتنا وكملنا سهرتنا الى الساعة 6 صباحا وخاطري في الطير الثاني
عاد صحيت على الساعة 12ظهرا واكلم مصطفى عشان يكون عندنا قبل مغادرة الشقة
وصحيت خويي والطير ديالي
الحاصل يوم بلغت طيري انا بنمشي مراكش اليوم قعد يصيح
( ماأدري أي نوع من الدموع؟؟؟؟؟؟)
ويقول لي : لاتسير حبٌي ونا ماعمٌرني حبيت خليجي بحالك
ياحلو افلامهم
قلت له : كلها يومين اشوف مراكش وبعدها برجع لكازا
واعطيه من الرخيص والبكش لين هدت الامور
ومن ثم وادعني وداع الاحبة
وافطرنا وجهزنا اغراضنا وقبل لانمشي الا زبيدة داخله الشقة
وقالت : مابغيتو تمددو ولا كازا ماعجبتكمش
قلت : لا حلوة لكن بنجرب مراكش واذا ماجازت لنا
بنرجع لكازا , فقالت : طريق السلامة
المهم نزلنا مصطفى عند محطة القطار وعطيته حسابه
و زيادة عليها دهنت سيره ب 200 درهم
وقصينا تذكرة كل واحد ب 125 درهم وحرك القطار
على الساعة الثالثة عصرا