رد: الأمـيرْ ألشَـآعر/ بدرْ بنْ عبدْ ألمحسنَ
نجمٍ يشع وباقي الليل مطفي
واحاكي الجدران عن مثل غرفه ,
ماتشبه الجدران ويطول وصفي
وتملني الجدران واظهر لشرفه ,
تحت السماء واسكر الباب خلفي
ريحٍ تهب وتسكن العظم رجفه ,
وتموت ريح وتسكن اوراق نزفي ..
على الروابي تهطل دموع وطفه ,
وتصب لمع بروقها وسط طرفي ..
ياطاري الغدران والعمر رشفه ,
مع قلها ياليتها يوم تصفي ..
ليت الشوارع تجمع اثنين صدفه ,
.لا صار شباك المواعيد مجفي ..
الحب واجد مير الاقدار صلفه ,
والأرض واجد لكن العزم منفى ..
واللي اعرفه راح ماعاد اعرفه ,
ولاظن يذكرني الى أقبلت مقفي ..
ماهو حبيبي مورد القلب حتـفه ,
ولا هو حبيبي يفرح بوقت ضعفي ..
مر ثمر هالليل وأمر قطفه ,
يالحنظل اللي صرت اذوقه بكفي ..
هذا وتو الليل ماراح نصفه ,
يالليل بعض اللي مضى منك يكفي!