كازا ....



بعد انقضاء اليوم الاول في الفله ومع تعب الرحله كان للنوم حظور طاغي تلك الليله .

صحينا على الساعه 12 الظهر وكان للجوع كلمه , طلبنا من الشغاله تجهيز الشاهي والشكشوكه , طبعا الشكشوكه اللي تاكلها في بيتكم في الرياض لايوجد بينهما صلة قرابة , الفرق تلاحظه في الشكل والرائحه ناهيك عن الطعم الرااااائع .

بعدها كل واحد اخذ له شور منعش وتجهز وتعطر طلعت اشكالنا تقل عرسان , كلمنا السواق وطلبنا منه تجهيز السياره وعلى عين دياب .

وصلنا عين دياب وطلبنا من السواق وضعنا في بدايته حتى نمشي فيه من البدايه .

كانت الساعه 1.30 الظهر وأعتقد انه اجمل وقت في ذلك اليوم لزيارة الشاطئ , ولا أبالغ ياناس اذا قلت يمكن انه اجمل وقت في السنه وليس في ذلك اليوم فقط . جو عليل وغيم لطيف يزيل الهم من نفوس المهمومين , هواء يعيد للروح رونقها يجعل الابتسامه لاتفارق محياك طول فترة تواجدك هناك .

























بعد انقضاء اكثر من ساعه في المشي على الكورنيش تحت هذا الطقس الجميل , قلنا لازم ننزل للشاطئ ونكون اقرب للبحر ونمشي على الرمال الناعمه.

نزلنا من عند فندق فال دي انفا ومباشره على الشاطئ , الشاطئ كان مليان بشر, اللي يلعبون كوره وهم الغالبيه واللي يؤجرون خيول واللي جالس مع حبيبته يضحك ويلعب بشعرها :Abu Ahmed (601): وحنا 3 تماسيح بس كنا مبسوطين على الرغم من ذلك ولله الحمد :) ...



المهم انها كانت تمشيه جميله ولازالت عالقه في قلوبنا قبل عقولنا .

أصبحت التمشيه في عين ذياب يومياً واجب وطني , وكنا نمني النفس بالفطور فيه في أحد الايام في احد المطاعم الفخمه المطله على البحر ولكن تضارب موعد قومتنا من النوم في الايام التاليه منعنا من ذلك :( .

في احد الايام اذكر مشينا فيه من البدايه حتى وصلنا لموركو مول , كان وقتها جميل ولكن يوجد جزء من الشاطئ قبل موروكو مول تقريبا بكيلو نص , يصبح الوضع مخيف نوعاً ما , فالانتباه واجب .

ومرت الايام في كازا , وكان لتماريس موعد لزيارتها. تماريس تختلف عن عين ذياب غالبيتها عوائل مغربيه يكثر فيها مطاعم الشوي والمناظر الجميله الطبيعيه :Abu Ahmed (777):
طبعا ينصح بزيارتها من باب التغير ولو حاب تجرب احد مطاعمها , يوجد مطعم شوي مشهور موجود في آخر محطه بنزين قبل ماتاصل الشاطئ .

من ضمن الزيارات كان التوين تاور والكفيات الشهييييييره الموجوده في الاعلى لها نصيب الزياره , رحنا لها بتوصيه وخاصه مقهى مونتي كريستو , حنا توقعنا من اسم الكوفي الفرنسي بإن يكون فخم ويوجد فيه جلسه جميله مع المشروبات الخاصه به . ولكن كل اللي شفناه لوحه مكتوب فيها يوجد عندنا مندى وكبسه , وشيشه سيئه وغالبيه الحضور من الديناصورات المخيفه :)

أجمل ماعندهم عصير البرتقال , لاينصح بزيارتهم لا السوق ولا الكوفيات .

بالليل في عين دياب يوجد كوفيات جميله وفخمه خاصه القريبه من ماكدو , ينصح بزيارتها بعد الساعه 9 مساءً .

السهر في كازا هو عيبها الوحيد , لايوجد فيها اماكن جميله , لا ال VIP السئ , تدخله كأنك داخل مكان من السبعينات , غالبية فرش الطاولات محروق ومطربين وسماعات سيئه .
حتى البلاك هاوس لم يناسبنا , اذكر السواق لما ودانا البلاك هاوس كان يحذرنا انه اذا طلعتوا منه في آخر السهره راح تلاقي قدامه مليان شرطه وحراميه ؟؟؟؟!!!!!؟؟؟؟
كيف شرطه وحراميه بنفس الوقت والمكان :)

زرنا كم مكان آخر مثل وناسه وغيره (ناسي اسماؤهم) وكانت للاسف دون المستوى . لايوجد في كازا شي معقول لقضاء وقت جميل بعد منتصف الليل غير البنجاب .


طبعاً جلسنا في كازا 6 أيام بعد كذا طردونا من الفله :( بسبب نكبه من نفس الشخص اللي نكبنا في حجز الطيران , لانه بعد ماوصلنا كازا ودخلنا الفله جلس معنا وصارحنا وقال : ياشباب فيه مشكله بسيطه (نفس اسلوب التذاكر والحجز) المشكله هي ان الفله محجوزه يوم الثلاثاء وفيه ناس راح يجون .

طيب والحل , الحل اننا ندور فله ثانيه او ناخذ شقه. رفضنا خيار الشقه من البدايه لذلك لم يبقى لنا الا البحث عن فله وللاسف لم نجد فله مناسبه .
وكنا مجبرين بإن نغادر كازا الجميله غصب علينا .

انتهت ال 6 أيام في كازا وكان كل يوم أجمل من اللي قبله , كنت اتمنى ان تكون كل ايام الرحله فيها ولكن للاسف الظروف لم تسمح .

كازا جميله وراقيه لايستطيع أن يفهمها الكل ولكن من يقع في حبال عشقها فهو معذور . زيارتها مرة أخرى واجبه أذا الله يسر .









بقية التقرير مع مراكش الحمراء وأيضا بعض النصائح وملاحظات على الرحله بشكل عام , يوم السبت القادم بإذن الله , التقرير راح يكون بسيط لان المده كانت قصيره 3 أيام فقط .


نهاية اسبوع سعيده للجميع :) .....