رد: اجرحيني . . ادري انك : اسفـه !
اليوم الأول في اغادير ،،،، ( على فكره اكره اللي يقولها بالغين ، هي بالقاف حقتنا مو الفصحى ، تخانقت مع صاحبي الف مرة )
نشوة المدينة الجديدة للحين في صدري ، واحساس انك باليوم الأول ينعشك كثيرا ً ، استعدينا للخروج ،
وبما اننا متعبين من السفر قررنا السهر في سكاي ، مجاور تماما ً للفندق ومشي على الأرجل ،
وبالفعل توجهنا له .. .
من اول الدخول واضحة فيه انه غير مرتب بالنسبة لتوزيع الطاولات ، عشوائي جدا ً ،
قابلنا المدير وطلبنا منه طاولة كنا 3 اشخاص وبانتظار الرابع ، كان النظام ان الطاولة لازم بالمشروب وسعره
يتراوح بين 1100 و 1400 تقريبا ً ...
اعطانا الطاولة كانت ضيقة نوعا ما لاننا متاخرين ، وفعلا ً جا صاحبنا بعدها تقريبا بساعة ..
الموقف اللي حاب اقوله ان اول ماجا صاحبنا ماكان له مكان بالطاولة ، فبكل ادب التفت على الطاولة جنبنا
كان فيها شخص واحد ومعاه بنت شقراء ( مدري ليه اكره الشقراوات من يومي ) ،
المهم طلبت منه كرسي واشار لي انه تفضل ، ولما جيت اسحبه رفضت البنت !! ..
رجعت ناظرت فيه لقيته زي اللي يقول : وش نسوي ؟ ... شوره بيد البنت ،،،
سحبت كرسي ثاني من ورانا وجلسنا ، صاحبي استشاط من الغضب وكان ناوي يسوي لنا مشكلة
معاهم بسبب هالشي ، هديناه ومشت الامور سهالات وانتهى الموضوع ...
( الصدفة اننا قابلنا هالبنت نفسها بعد اسبوع في اتلانتيك وكانت لوحدها ، اشرت لصاحبي نفسه
قلت ترى هاللي قدامك ترقص هي اللي كرشتك في سكاي ، والقضا حان ياصاحبي ،،
قال وش السواة قلت جبها جنبك وسولف معها وبعد شوي جيب وحده ثانية واطلب منها هي تقوم ،،
وبالفعل صار هالشي وقامت والشرر يتطاير من عيونها بس برد خاطر خويي وقتها )
والله العظيم ، واقسم بالله اني لا احب الانتقام ، واعلم بيني وبين نفسي ان هالشي اللي صار غلط منا ،
لكن حرقة الموقف وقتها اجبرتني ولو احد عاش الموقف كان ممكن يصير اكثر من اللي صار ،
البنت بكل برود سحبت الكرسي من ايد صاحبنا وقالت لا .. وكأن المكان ملك ابوها ،
بالطبع طاولتهم ولكن بما انها ماتسامحت معنا او على الاقل رجعته باسلوب محترم كان محتم علينا اللي سويناه .. .
ما أطول عليكم ، السهرة كانت نوعا ما جميلة ،
السهرة عبارة عن 3 نمر ، الاولى مغربي ( هو الاقل سوء فيهم ) والثانية عراقي والثالثة بحريني ،
المغربي كان احسنهم صوت واداء ولكن اغانية خليجية قديمة جدا ً او مغربية ، اما العراقي فخدث ولا حرج ،
لا صوت ، ولا اداء ، ولا وقفة ، ولولا الموسيقى ماكان عرفنا وش يقول .. .
معظم الموجودين ينتظرون اوقات الراحة بين المغنين او استراحة المغني نفسه لكي يتم تشغيل الديجي وقتها ويرقصون عليها ،
سيئين جدا ً المطربين .. .
انتهت السهرة على الساعة 3 ونصف تقريبا ً ، كان موجود شخص قطري يومها حاجز 3 طاولات عالبست وهو لوحده ،
وتقريبا يومها صرف ميزانية اثيوبيا كاملة في التنقيط ، والمشكلة الأكبر انه لايبتسم ولايضحك ، ولا مجلس احد ،
مثل هانجيم مدرب الهلال سابقا ً لايوجد اي تعابير لوجهه بالفرح والحزن ... .
حتى المغني لم يقرب منه ، كان يقبل التحيات من بعيد ويكرر اسمه ،
بغيت اقول له ( ياخوي اضحك له ويجيك تراه بالع العافية منك ) !!
شخص اخر كان مودع الملاعب ، مثل سوق الاسهم مايمديه يرتفع لين ينزل ، اول مايقوم يرقص شوي يطيح ،
طاح على طاولته بجسمه كامل ، كان المنظر مؤلم جدا ً وتوقعت يطلبون له الاسعاف ، قام بعدها مباشرة يرقص مرة ثانية !!
قلت في نفسي : طيب .... بكره اول ماتصحى بيطلع هالضحك كله .. .
السهرة اجمالاً جميلة ، لما خرجنا من المكان اصحابي كانوا تعبانين من السفر والسهر ،
قرروا انهم يروحو السكن وينامون ، ماكان في راسي النوم ابد وقلت لهم انا بكمل سهرة ،
وقفت لي تاكسي وقلت له وديني صحارى ( دارس انا من النت ) ، طلب 50 درهم !! قلت له بتوديني ب 20 وديني ولا
خلني اشوف تكسي ثاني ، وافق مباشرة !! ... انا والله لما قلتها ماكنت اعرف الاسعار ولا ادري وينه صحارى
بس قلت اكاسر معه وسبحانه ضربت معي ..!
وصلت لصحاري ، الدخول بـ 100 درهم ، دخلت للمكان وتفاجأت !!
وش هالمكان ؟ العرض اكثر بكثيييير من الطلب ،
دخلت مباشرة الى البار ، قررت اوقف بعيد والاحظ واستكشف في بداية الأمر ، من الباب لما وصلت الى الباب تقريبا ً 5 مضايقات !!
وقفت اخيرا ً ، تأملت ، المارة كثير ، الواقفين كثيرين ، كلهم لهم اهداف ، الواقف والجالس يفكر ،
لا أحد فعلاً مبسوط ، مع ان الكل يضحك .. .
وقتها يشعر الانسان برخص الدنيا في العين ، صحارى هذا بالذات عبارة عن حوش كبير للأغنام ،
عرض وطلب ، سعر واتفاق .. لاشي ء أكثر ..
انتهت السهرة على السادسة والنصف ،
وصدق بن مساعد يوم يقول : والعطر في اول السهرة حلووو ... وباخر السهرة هبووب !!
عدت الى السكن ، لفت نظري قبل الدخول الزحمة عند الريسبشن ،
سألت المسؤول على باب العمارة عن سر الزحمه ، قال تسجيل الزوار ! ...
طلعت لغرفتي ، ميت تعب ، ميت تفكير ، ميت مجهود ، صاحي قلب .. .
اطفأت الانوار ، اطفأت قلبي ، ونمت .... .
