بعد ما طلعنا من سان دييقو .. وصلنا الى جنوب لوس انجلوس ..

كان حجزنا في منتجع Marriott's Newport Coast Villas

حجزنا فيه مدة يومين ..

المنتجع حلو للي ما يطلع واجد .. لان مكانه بعيد عن اماكن التمشيه و المطاعم ..

طبعا الاجنحه اللي فيه تختلف في مواقعها الافضل تكون قريب من المسبح .. والمنتجع كبير هذي خريطه للمنتجع ..



وهذي صوره للمنتجع من موقع الفندق



تقييمي له ممتاز في كل شي ما عدا الموقع اعطيه 6 من 10 ...

طبعا لحظة وصولنا سوينا الشيك ان وكل شوي نروح نشوف جناح وما يعجبنا موقعه ونغير واخر شي خذينا واحد قريب من المسبح لكن مشكلته مطل على المواقف ..


المهم وصلنا نزلنا اغراضنا .. بعدها طلعنا نبي نتعشى .. لكن الصدمه كل المطاعم اللي حولنا مقفله ... ومافيه الا المطاعم اللي داخل البارات .

هذا عيب Newport تغيب الشمس لا تطلع كل شي مقفل حتى بالويكند الحركه خفيفه بالليل ..

تعشينا رجعنا على المنتجع وكملنا سهرتنا فيه وبعدها نوم ... ورانا بكرى ديزني لاند ..

صحينا الصباح افطرنا وصحصحنا ... وعلى ديزني لاند ..

كان يوم ويكند عندهم يعني زحمه ... وصلنا لديزني لاند وقفنا بقرب موقف على طاري المواقف لما طلعنا دفعنا مدري كم بس شي مو قليل حتى اللي حاسبنا قال مفروض توقفون في مواقف للي يبي يوقف لاكثر من ثلاث ساعات ارخص لكم ... بس حنا ما كنا ندري وقفنا عند ابو ساعه ...

طبعا ديزني لاند معروفه ولا تحتاج الى تعريف ..

اول ما دخلنا من المواقف جتنا ساحه خارجيه فيها بعض المحلات والمطاعم و الكوفيهات .. مشينا حتى وصلنا شباك التذاكر لدخول دزني لاند ..

لما جينا نشتري التذاكر قالت اي قسم تبون ديزني لاند ولا كلفورنيا ؟؟!!

قلنا وش الافضل قالت انتم اول مره تجون قلنا ايه قالت كلهم راح يعجونكم والسعر نفس بعض مافيه فرق بينهم ..

فأخذنا تذكرة ديزني لاند ..



بعدها اتجهنا يسار على ديزني ... لما دخلنا كانت الصدمه ان اغلب الالعاب ان لم تكن جميعها للاطفال .. اخذنا فيها لفه كامله ولا اعجبتنا ..

اتجهنا للاداره وقلنا هل نقدر نحول الى قسم كلفورنيا .. اخذ تذاكرنا واحد وسألنا كم المده اللي قضيناها في ديزني لاند قلنا ساعه .. قال طيب دقايق ..

شوي رجع لنا تذاكرنا كاتب فيها كلام مدري وش المهم قال تقدرون تدخلون قسم كلفورنيا .. توجهنا ودخلنا وكان افضل بكثير من ديزني لاند..

اكثر شي اعجبني قطار الموت ..






وفيه العاب كثيره واقسام حلوه .. تمشينا في ديزني لاند حتى غروب الشمس ...

بعدها طلعنا وتوجهنا لمطعم عربي كان قريب من ديزني لاند و تعشينا وشيشنا ... بعدها توجهنا للفندق بدلنا ملابسنا وطلعنا نتمشى وسهرنا ولا رجعنا الا في وقت متاخر..

في اليوم الثاني كانت تمشيتنا على الشاطئ ..

وكان وقتها في عروض طياران المهم استنفار امني وشعبي زحمه وشوارع مقفله ..

كان اخر يوم لنا في جنوب لوس انجلوس ...

راح اكمل التقرير عن الشمال و مع الصور الحصريه لجميع الاماكن اللي زرناها .. وان شاء الله اغطي اي تقصير حصل فيه تقرير جنوب لوس انجلوس او سان دييقو ..

تابعوني ..