ياحبي ذكرك عن طعامي وعن ماي
ذكرك صبوحٍ لي وذكرك غبوقي
يا بهجة الدنيا ويا غاية مناي
ذوقي رفيعٍ وأنت عنوان ذوقي
يا وجد حالي يا عذابي وبلواي
يا جادلٍ عن كل جادل تفوقي
آموت لا من داعب شفاه بشفاي
واموت بأشياء ذكرها ما يلوقي
ما همني راي البشر دام لي راي
ما أتركه لو تنزف دماها عروقي
والشامت اللي شمت في جرة عواي
شامت بخدٍ جرحه دمع موقي
ليته تحقق وش ورا حرة بكاي
ليته من اللي ذقت قبله يذوقي
يمديه يدرك شي من أسباب شكواي
يمديه يدري إن المفارق صدوقي
يمديه يشهد لي على صدق دعواي
ثمٍ يردد ماضيات النطوقي
مشتاق للمغرب وانا توني جاي
والله يصبرني على حر شوقي