على ذاك الطريق اللي يسمونه مغرب الاحباب
وطت رجلي على دربه ولا ادري وش نوى فيني

سافرت بدروبه .. ألين أن القمر قد غاب
تعب قلبي ولا تعبت مسافاتٍ توديني

لقيت لياليه هدب ظل وسما واعشاب
بعد ذاك الظلام اللي يتوهني عناويني

صدفت معجبه فيني وياليت..الغرام اعجاب
وتاريها الهنوف اللي قلت لها انتي تستحقيني

عطيتها عشق من قلبي..وسلمت لغلاها رقاب
وغيرها يحترق قلبه ولا يقدر يحاكيني

أنا قبلها صدفت عيون لكن ويش جاب لجاب؟
واثر كل العيون اللي لقتني ما تكفيني

رماني حظي العاثر عليها وجيت لها طلاب
لكن بقولك لا انتي عشقتيني ولا انتي عتقتيني

تعالي واعتقي ذاك الخفوق المولع المرتاب
مهب لاجلي ، عشان الله يجازيك ويجازيني

تعدي في سما عشقي ولو عشقي خراب أصحاب
وصوني بالهوى نفسك قبل لا انتي تصونيني

وشيليني على متنك خفوقٍ باريٍ منصاب
ومن فوق الغرام العذب .. شيليني وحطيني

ولا منك هقيتيني شجاع وما يطيق يهاب
أنا لك بالهوى والله مثل ما انتي هقيتيني

أنا ما أمشي ورا غيرك ولو أنه يطق الباب
وترى عيبٍ عليّ أطعن..ولو كثرت سكاكيني

زهودٍ ما يطيق الدم لا داين ولا طلاب
شجاع وعارفٍ نفسي وأظن أنك تعرفيني

غيورٍ ماعرفت أضحك مع الغدر ببّرود أعصاب
أبيع عيوني الثنتين قبل أنك تخونيني

إذا شد الغرام .. اتركي خفوقي بين ناب وناب
لفرقى تكسر ضلوعي .. ولا عشقٍ يوطّيني

أنا رجلٍ ولي غيره .. وإذا شفت الهوى كذاب
تثور بقلبي الفزعه ولا تهدى شياطيني

سؤالك لو يزعزع بي كياني ما قبلت عتاب
اجي لك وأسالك نفس السؤال اللي سألتيني

عن العشق القديم أبواب .. تقفيها كثير أبواب
بعد ذاك الحبيب اللي خدعني وانخدع فيني

أبي عشق تحسب له كل نظرات العيون حساب
وابي قلبٍ علي قلبي ، وابى دينٍ على ديني

وابي نظرة عطا توفي ولا تخلف بدون أسباب
وابي منك قبل لا نتي تصديني .. تحبيني

وابي دربٍ على العذال صعبٍ ومتعبٍ وغلاب
وابي نفس الطريق الصعب يبعدهم ويدنيني

ترى لو للقلوب عيون ولدموع العيون أهداب
حشى ما تنزل الدمعه لغيرك لو تركتيني

أنا أول من عرف قدرك وأنا توي صغير وشاب
وابي منك ما دام أنك عرفتيني توديني

ما دام أني لقيتك في طريق أسمه مغرب ألاحباب
دخيل الله ، وبعد الله دخيلك ..لا لا تخليني

ما دام أن كل من يحيا على وجه التراب تراب
عسى تنساني الدنيا مادام أنتي ذكرتيني .....