إليا شكيت أشكي على جيّد الحيل
اللي كسر صلب العظام وجبرها
يقطعك دنيا كلبوها عراقيل
ترمي على النفس العزيزه قشرها
ما تآسم ألا فالرجال الحلاحيل
بيض الوجيه مكرمة من خطرها
عامٍ ورا عام ، وجيلٍ بعد جيل
وشيوخ قوم ما بقي غير أثرها
ومجالسٍ فيها دلال ومعاميل
صدت ورا البيبان محدٍ سبرها
عقب الحطب والنار والبن والهيل
اليوم يآرثها بخيلٍ هجرها
ياخوي أنا بعطيك للعلم تفصيل
وأرسم لك الأهداف وأعرف قطرها
الحنظله لو هي على جاري السيل
تنقص حلاوتها و يكثر مررها
ومجالس الأنذال والقال والقيل
مثل السهوم اللي سريع خطرها
انشد عن الأجواد ذبّاحة الحيل
وأجلس مجالسها وساير ديرها
النذل لا يلقى علينا مداخيل
وسود الليالي لا تجي في نحرها
واصل حبال مقطّعين المواصيل
لين الليالي البيض يطلع قمرها
خلك مع اصحابك بعيد المناويل
لا تبدي أسرارك لمن يختبرها
ترى أكثر الأصحاب قومٍ حناشيل
ما عاد تعرف صوفها من وبرها
إخذ الصحيح وكب عنك التعاذيل
نصيحةٍ من شاعرٍ لك سطرها
تجاربٍ ما هي هروج وتماثيل
حكمة حكيم قالها واختصرها