تقولي ااه ياحنيني وتسألي ...
تقولي مرتاح وقول مرتاح
اجاملك ولا الله اعلم بحالي ..
في خاطري كسره وفي صدري رماح..
والقلب عزالله ماهوب بخالي..
اصد اخاف تشوف دمعي اليا طاح ..
واضحك وقول اني من الهم سالي
ذي عاده العاشق لو يموت ماباح ..
السر دين وراعي السر غالي..
في غيبتك تدري وش اعد الارباح
الارباح ضيقة خاطري وانشغالي
الصبرمفتاح الفرج وانت مفتاح
همي وغمي والسهر وانفعالي
تغيرت نفسيتي والصبر زاح
وحتى طبوعي صار فيها بدالي
ماعادني راعي سوالف ومزاح
ولا عادني صدري مثل اول شمالي
قد لي زمان مضيع درب الافراح
مدري وراي الدرب ولا قبالي
وين انت ياللي كنت للجرح جراح
يامكسبي في العمر ياراس مالي
اطريك واصفق على كل ماراح
صفقة حزين غربتله الليالي
مغير اجر من الطواريق لافاح
صدري عليك من الحزن واستوى لي
بحر الشعر خضته ونا فيه سباح
شاعر ولا يصلح لي الا الجزالي
تكتبلي همومي على بيض الالواح
وانحت نتايجها بصم الجبالي
الهم مبدع شعر والقلب مسباح
اكتبه ويصفقلي اللي قرالي
ومن دون لا اخذ معك لفه ومشواح
اهديتك اخر بيت لانه مثالي..!!
من طاح من عيني نسيته اليا طاح
الا انت ..ماطحت وعادك اليوم غالي..!!