ركبنا السياره وقرأنا دعاء السفر وتوكلنا على الله
ليش يا حمامه عندج ميه سياره ليش على سياراتي



عمله 100 درهم



دخلنا محطة البترول ..صبينا غازولين



اول ما طلعت منها وقفني شرطي المرور ( الدرك)
نزلت الدريشه..قلت له تفضل
قالي اوراق السياره..عطيته
الليسن والجواز..عطيته
سالني تعرفين شنو المخالفه اللي ارتكبتيها..
قلت له لا..قولي
قال طلعتي من محطة البترول وكان موجود اشاره قف stop وما توقفتي
قلت له ما وقفت لان الشارع فاضي مافيه احد
قال لي لا هالاشاره تعتبر عندنا مثل الاشاره الحمرا ولازم توقف المركبه توقف تام
بعدين قام يهدر..قال لي فهمتي علي قلت له لا..
تفهمين فرنسي...لا ما افهم
قلت طيب كم المخالفه..طلع لي دفتر مكتوب عليه 700 درهم
نصااااب
فتحت البوك وطلعت 200 درهم..عطيتهن ايااه وكانت عينه داخل البوك
طالعني بنظره حنان ووناسه الله يحفظج
قلت يعلك ما تتهنى فيهم لانك ماخذهم عن غير وجهه حق
وايد زعلت..وحاولت اغير مودي عشان ما يخترب اليوم علي
خبرت صاحبتي شيلي كل الفلوس اللي بالبوك خلي فيه بس 100 درهم في حال بندخل محطة بترول نشتري لنا ماي او عصاير بارده

في طريقنا صادفنا هالموقف..فوقفنا نصوره



جانا رجال قال لنا انزلوا تصوروا مع العنز..رفضت رفضا باتا
قلت له شكرا مره ثانيه
الصراحه خفت



صور من طريقنا لمراكش



قرية من القرى
طبعا الدرك ينشطون في الصبح بشكل مو طبيعي
بتلاقهم في بدايه ونهاية كل قرية
وعند الدوار ( الرمبو ) يتوزعون 2 إلى 4 من رجال الدرك عليه
يعني اذا الله سلمك من الاول..الثاني لا محاله بيوقفك يغلس عليك









واحنا طالعين من هالقريه وقفني شرطي المرور ( الدرك) هاليوم نحيس
مع اني كنت محاسبه جدا في موضوع السرعه
كنت اسوق من 40 إلى 50 داخل القريه والمسموح به هو 60 كلم
نزلت الدريشه قلت له تفضل
سالني تعرفين كم سرعتج؟؟
قلت لا بس ما تتجاوز 60 كلم
طلع لي الرادار وقالي كنتي مسرعه وسرعتج 72 كلم ومب هذي سيارتج
بلمت وفجيت حلجي..اقول بخاطري وين كنت منخش
والسياره ما تدورسها الا لما تكون قريب من الرادار ..شنو هالنحاسه
قلت لكم المخالفه؟؟
قال لي 300 درهم
قلت لصاحبتي عطيني البوك..
فتحت له البوك ..قلت له ما عندي صرف ما عندي الا 100 درهم تبيها؟!!!
انصدم من ردة فعلي..قال خلاص توكلي بس التزمي بالسرعه
قلت له شكرا
وقفت في محطة البترول نشتري ماي وعصاير



صورة من الطريق



قرية اعجبتني وايد







دخلنا على الطريج السيار..وهذي تذكرته







سرعتي 120 كلم



مراكش تامنصورت



قيمة الشارع اللي مشينا فيه 14.00 درهم



فلل للبيع والايجار



وين ماخذنا النفيجيشن





وقفه وفيني حيره وين انا



نكمل على وصف GPS





وياخذنا النفيجيشن للطريق رملي OFF Road هلا بووووي
ضيعت هههه





والحمدلله اخذت سياره كبيره ..لان لو كانت صغيره كنت بغرس في بعض الاماكن



دخلت بين المزارع..وشفت حمسه ( سلحفاه)
نزلت اباعدها عن الطريق عشان ما ادوسها



هني خليتها على الطرف



تخيلوا بعد ما باعدتها على الطريق..ركبت السياره وتوني بربط الحزام..
سمعت كائن ينبح بقوه وعنف
طاح قلبي في ركبي
صاحبتي تضحك والدموع اربع اربع..وانا اقول لو بعدني برع السياره اباعد السياره
وهجم علي الكلب؟؟
شنو مصيري

كملت طريقي داخل المزرعه وصاحبتي تقولي طريقنا خطأ وهي ما تعرف وين بنروح



شفت مزارع وسالته عن وجهتي..ويزاه الله الف خير دلني على الطريق
والكلب عزكم الله مصر يلاحقني وانا بالسياره

وصلنا للطريق الصح





الحين بخبركم السالفه ووين انا رايحه
ياطويلين العمر..انا في كل سفراتي احب اخصص يوم او يومين ( على حسب ايام السفر) ادلع فيهم عمري ..واسوي ريلكسيشن وابتعد عن الازعاج
وانا الف بين المواقع والفنادق..شفت فندق اسمه القصبه
kasbah tamadot
لتابع لسليه فنادق فيرجن..والمالك بريطاني

https://www.kasbahtamadot.virgin.com/

تواصلت معاهم عن طريق الايميل لان ماعندهم حجز عن طريق الاون لاين..
وكان الرد يوصلني بعد يومين او 3 ..المهم بعد الاتفاق على غرفة ديلوكس
جا وقت كيفيه الدفع..وصلني ايميل من عندهم ان عندهم إجازة لمدة اسبوع ومكاتبهم في بريطانيا بتسكر..وفي حال عندي استفسار عطاني رقم المدير بالمغرب اقدر اتواصل معه
حاولت اتصل عليه اكثر من مره مافي رد
وانا هالحركات ما احبها
فبديت مره ثانيه في رحله البحث عن فندق ثاني يحقق لي الشي اللي ابيه
وبعد يومين بحث ..حصلت مبتغاي

منتجع اسمه ( قصر نمسكار)
namaskar palais

https://www.palaisnamaskar.com/eng/welcome/

قصر فرنسي بنكهه مغربيه
حجزت غرفة ديلوكس مع جاكوزي (المياه ساخنه فيه) لمده ليله واحده
سعر الليله 580 يورو شامله الافطار فقط

العامل كان باستقبالنا..وانصدم من شكل السياره فسالنا تبون نغسلها لكم؟؟
قلت له اكيد غسلها



الريسبشن وقابلتنا مديره المنتجع الفرنسيه







خلصنا تشيك ان بسرعه والمعامله ما يحتاج اوصفها
صور من المنتجع













في طريقنا للغرفه



وصلنا للغرفه



اول ما تفتح باب الغرفه تشوف الكابينه فيها الميني بار







غرفه النوم







الضيافه ( مكروون لذيذ)





المدفأه





الحمام عزكم الله ...كافة المنتجات المتواجده بالحمام من ماركة بولغاري





نطلع برع ونشوف الجاكوزي
المكان ابدا مافيه خصوصيه بس من حظي الحلو..ان الغرف اللي تجاورنا مافيها احد



ماي الجاكوزي حار









جهزنا لليلسه







هذي الستاير اللي تفصل بين الغرف والسويتات



تابعوني
بخلص الجزء بكرا باذن الله

تصبحون على خير

اتمنى من الاعضاء الكرام زياره تقريري الثالث

عندما يجتمع الجمال في حضرة الفخامه

https://www.mza3et.com/morocco35703.html#post863401