1_ ماهية الصدفة او السبب الي خلاك تزور المغرب
بالنسبة لى صدفة عجيبة غريبة ، كانت في الجامعة وتوي قاص الجواز من فترة بسيطة ولا قد رحت الا البحرين (ثاني يوم قصيت الجواز) وسوريا بالباص ولمدة 8 ايام قضيت منها يومين ونص في الباص ومدري كم ساعة نايم ، لكن كانت تجربة جديدة وشي مثير ، المهم كان بداية الترم وبعد بما اني كنت مشتغل الصيف في شركة تدريب صيفي وزار على نفسي وجمعت الراتب وشوية فلوس من هنا وهنا ، وكان نازل لنا مكافاة مبلغ محترم حق مدري كم شهر ، المهم قابلت رفيق الدرب ومخطط السفريات في الجامعه واتفقنا نتقابل الليل في الشلال الى على طريق الفحص كان هو المركاز تقريبا ، المهم تقابلنا وجالسين نسولف ونرتب الامور وكان فيه واحد من الشباب عمرة تقريبا في 40 وشغال في احدي الشركات المتعاقدة مع وزارة الدفاع وشخصية غريبة لاهو متزوج وكل فترة يغيب اسبوعين ويرجع ولا عمر شفته في اجازة عيد او اي شي مشابه ، المهم طبعا كان فيه اثنين اعظاء جدد بس زي اعضاء شرف الاتحاد يبغون يتبروزون ببلوشي ويسافرون على حسابنا ، بعد ماراحو الشباب قال لي انت معزم على السفرية قلت الله لايعوق بشر قال كم معك فلوس قلت حوالى 12000 الف قال اجل معي ، طيب على وين قال مالك دخل جب جوازك انت وخويك وعطوني 3500 ريال عن كل واحد وزودو ميزانيتك ولا تراكم بتكونو على الحديدة ، المهم زبطنا امورنا ورحنا البطحا شرينا ملابس(قسم بالله يوم اشوف صوري فيها تقل يماني شغال في بنشر) واغرض ورجعنا رتبنا شنطنا وانتظرنا تلفون الرجال طبعا في الملحق لان هذيك الايام الجوال على بداياته ، اتصل علينا في الليل وقال تولمو للسفر باكر نتقابل في الشقة وواحد من الشباب بيودينا المطار ، طبعا انا اهلي بما انهم ماهم في الرياض فماعندي مشكلة كلمتهم اليوم الثاني علشان مايفتقدوني ورتبت اموري.
خويي ماجاه النوم ولا يدري وش السالفة ولا وين رايحين ومدري كيف صرف سالفة السفرية على اهله اليوم الثاني جاني الفجر ونام عندي ومرنا خوينا سعود وطلعنا المطار
كانت الرحلة على الخطوط السعودية الى جدة ثمن رحلة ثانية مستقلة تماماً الى المغرب مروا بتونس ومدريد اعتقد رحلة طويلة صح ، طبعا مادرينا وين رايحين الايوم دخلنا الصالة الدولية في جدة واعلنو عن الرحلة ، والله شعور لا يوصف .
عاد ماقلت لكم خويي قال جمعو القطة عندي ، قلت قوم طير زي قطة سوريا اخذ القطة يرفه عن نفسة الاخ ، والاخير في الطريق من دمشق الى الرياض ماعندنا فلوس نشرب موية ولولا الله ثم وحدة معنا في الباص الله يجزاها خير عطتنا مويه واكل رحمتنا المسكينة كان متنا جوع وعطش .

2_ اول زيارة واي مدينة
اول زيارة للرباط كانت في عام 2001 ، كان السكن في فلة في حي الرياض قريب اذكر من السفارة السعودية ، ويالها من رحلة 7 ايام من الخيال

3_ السبب الرئيسي الي رجعك للمغرب مرا اخرا
اول رحلة كانت حلوه بس حسيت اني ماشفت البلد زين ولا شفيت غليلي رغم اني ابسطت في الرباط اول سفرة الا اني حسيت انه ماكان جووي يعني احب اشوف الناس واتعرف واقنص بالركادة ، غير اني تعرفت على واحد من مزاعيط اغادير هو الى حطها براسي
لا توقعون اني رجعت بعد شهر ولا شهرين ثاني زيارة كانت في نهاية 2002 يعني بعد تقريبا سنة وكم شهر من الزيارة الاولي ومازلت الى الان محافظ على زيارة خمسة الى سبعة ايام سنويا للمغرب

4_ احلا مدينة تجد فيها راحتك
اغادير ، ونوعا ما مراكش ، طنجة مازرتها لكن الشباب يمدحونها واتمني اني اقدر اروحها

5_ ماهي المدة التي تقدر تصبر فيها عن المغرب
انا اعتقد اني من الناس الى جربت الانفلات في السفر للمغرب في 2006 رحت اربع مرات و2005 و2007 ثلاث مرات يمكن .
بس وجدت ان مرة واحدة سنويا كافية خصوصا لواحد مثلي في ظل ارتباطات اسرية وعملية والتزمات مالية كثيرة
6_ تحب تروح بوحدك وما هوه السبب تحب تكون مع رفقة وما هوه السبب

نعم واغلب رحلاتي لوحدي ، اعيش جوي على كيفي
طبعا الصحبة في السفر تكون حلوة اذا كان مزاجهم قريب من بعض لكن بعض الاحيان ماتناسب ويكون فيه مشاكل غير ان كل واحد يحاول يفرض راية واذكر مرة طلعت مع شباب على اساس انا رايحين الرباط ، لمن وصلنا وجلسنا يومين انا ماعجبني الوضع خذت اغراضي وقلت لهم سلام عليكم وعلى مراكش ومنها على اقادير وتقابلنا في المطار في رحلة العودة ، طبعا كانو زعلانين خصوصا انهم حسو من البداية اني ما ابغي اجلس معهم رغم ان كل الاشياء الى كنت اسويها لمصلحتهم مثل القطة قلت لهم كل واحد فلوسة في جيبة وكل يوم بقطته ، والاشياء الى بالى بالك كل واحد حر فيها ويدفع الى يعجبه . الفلة دفعنا حق يومين بس وهم كانو بيدفعون حق المدة كاملة 12 يوم على شان تقل عليهم الفلة ( الي سمعت انه اخر يومين الشغالة سحبت عليهم ولاجات وصاحب الفلة يقول لهم اذا مو عاجبكم اطلعو وجاب كلب وحطه في الحوش يقول على شان الحرامية وجمركة على الداخل والخارج ) غير ان فيه ناس تفرض رائيها بقوها وتحسسك انه جالس يصرف عليك تطلب اغنية قلك وش ها الاغنية غيرها بس ، تجيب سيدي يقول لو سمحت جايبين ديجي ليه
حتي الاكل نقول للشغالة سوي لهم اكل مغربي ، قال معليش انا ما اكل الاكبسة ...
بس فيه مرات العكس تماما ، تكون فلة ووناسة وشيء خرافي وهذي المرة اذكر في 2007 كنت بعد العيد في اغادير وقابلت شباب اعرفه كانو من ثاني يوم العيد وانا تاخرت اسبوع كان زواج اخوي ، هذيك الرحلة خورافية كان الشباب ماخذين السويت الى في الدور الثالث وغرفة كمان زيادة وانا غرفتي في الدور الرابع وكان فيه واحد من الشباب يعزف عود واجواء خورافية والميزة .