يا صَاحب كُن صَبّار ** اُصبر على ما جرَى لَك
اُرقد علَى الشُوك عريان ** حَتّى يَطلع نهَارك


لا تْخَمّمْ لا تْدَبَّر ** لا تَرْفَدْ الهَمْ دِيمَة
الفَلك ما هُو مْسَمّر **و لا الدُّنْيَا مْقِيمَة


لا تخمم في ضيق الحال ** شوف عند الله موسعها
الشدة تهزم الأرذال ** أما الرجال لا تقاطعها


من يامنك يا كحل الراس ** ماشينك بطبيعة
السن يضحك للسن ** و القلب فيه الخديعة


سافر تعرف الناس ** و كبير القوم طيعه
كبير الكرش و الراس ** بنص فلس بيعه


طاقوا على الدين تركوه ** و تعاونوا على شريب القهاوي
الثوب من فوق نقوه ** و الجبح من تحت خاوي


لا تسرج حتى تلجم ** و اعقد عقدة صحيحة
لا تتكلم ختى تخمم ** لا تعود لك فضيحة


الصمت الذهب المسجر ** و الكلام يفسد المسالة
إذا شفت لا تخبر ** و إذا سالوك قول لا لا


نوصيك يا واكل الراس ** في البير ارم عظامه
أضحك و ألعب مع الناس ** فمك متن له لجامه


يا ذا الزمان يا الغدار ** يا كاسرني من ذراعي
طيحت من كان سلطان ** و ركبت من كان راعي


الشر ما يظلم حد ** غير من جبده لراسه
في الشتاء يقول البرد ** و في الصيف يغلبه نعاسه


يا الي تعيط قدام الباب ** عيط و كن فاهم
ما يفسد بين الاحباب ** غير النساء و الدراهم


لا يعجبك نوار دفلى ** في الواد داير ظلايل
لا يعجبك زين طفلة ** حتى تشوف الفعايل


حيط الرمل لا تعليه ** يعلى يرجع لساسه
ابن الغير لا تربيه ** يكبر و يرجع لناسه


الخيل هبة من الريح ** و البل هي الشريفة
البغال قرصة من الهند ** و الحمار هو العيفة


اللي يركب يركب أشهب ** طرز الذهب في لجامه
اللي يدور يقول كلمة الحق ** يدير هراوة في حزامه


أنا اللي رقيت في رقوب ** و قعدت مثل الرصاص نذوب
من لا يقرأ للزمان عقوبة ** يجي على راسه مكبوب


جحش البغل لا تغنجيه ** و بالزيت تدهني جلوده
الصك و العض فيه ** هذيك عادة جدوده


كيد النساء كيدين ** و من كيدهم ياحزوني
راكبة على ظهر السبع ** و تقول الحداء ياكلوني


تخلطت و لابات تصفى ** و لعب خزها فوق ماها
رياس على غير مرتبة ** هما سبب خلاها


من خالط الاجواد جاد بجودهم ** و من خالط الارذال زاد عناه
و من جاور برمة انطلى بحمومها ** و من جاور صابون جاب نقاه


لا في الجبل واد معلوم ** و لا في الشتاء ريح دافي
لا في العدو قلب مرحوم ** و لا في النساء عهد وافي


الزيت يخرج من الزيتونة ** و الفاهم يفهم لغات الطير
اللي ما تخرج كلمته موزونة ** يجحرها في ضميره خير



<< من أجمل ما قال عبد الرحمن المجذوب >>

__________________
كلآم الناس بالنسبة لي ،، مكآلمة لم يتم الرد عليهآ ..!!!