يابن الحلال ان طعتني خل الأسراف
واترك جمال الغيد لأهل البصيره
الزين موبس الملامح والاوصاف
الزين روح وعفـه وطيبه سيره
مانيب من يهوى (سريا وأنصاف)
أنا هواي وبس بنت الجزيره
بنت الخليج اللي تماري بالأعراف
وحنا نماري بأسمها كل ديره
مالي غرام بقول وخــــا وبالزاف
أذبحني عند الطرحه المستديره
أحب قوله ياهلا وعل ماخلاف
من بنت ثوبي بنت الارض النضيره
اللي تحلاها الظبي حلو الاطراف
جمال في عفـــه ورقــه وغيره
واللي بها سحر مهو سحر عراف
ياعــلًً عيـن مـاتـراها ضريره
عطف وحنان وذوق في لين الأعطاف
والي كشفت لثامها شفت أميره
صعبه على اللي بالردى شاف ماعاف
وحلوه على اللي سنة الله ضميره
شمس الى من أشرقت والدجى طاف
غابت نجومك غصب لو هي كثيره
السيف مايزهى سوى كف سياف
والخيل دون حصانها مستخيره
بس انت دورلك على قدك لحاف
وان طعتني دور بدلنا عشيره
الله يرحمك يا طلال الرشيد