الموقف السلبي صادفني في طرف مراكش متوجه لمطار كازا ..
اتفقت مع السائق على تعبئة السيارة بنزين ب 300 درهم - 150 ذهاب و 150 عودة - وفي محطة البنزين وفيها حوالي اربعة عمال طلبت التعبئة ب 300 درهم وقبل واثناء التعبئة سلمت احد الموظفين 400 درهم , وعند الانتهاء من تعبئة السيارة حضر احد العمال بالمحطة وطلب دفع الفلوس !!!
بهدوء وطيبة بلغته بأني دفعت والسواق كان شاهد .. وجحد ابو الشباب واللي معاه كلهم جحدوا واللي سلمته الفلوس اختفى وبعد ما حضر جحد !
تنرفزت والسواق تنرفز وتعالت الاصوات بشكل ملفت وأقسمت بالله درهم واحد ما يطلع لو شو ما كان .. وطلبت من السواق ان يغادر وكان احد الموظفين واقف قدام السيار - يعني ما تمشي - والسواق كان معاه حق وطلب مني اتفهم صعوبة مغادرته .. سألته .. شو الحل ؟ قال ما فيه غير ندفع لهم 300 درهم .. وكذا يكون المجموع 700 درهم ومزروف 400 درهم !!
قلت شف حل ثاني .. قال والله ما عندي .. قلت ما تقدر تعط !! قال شو !! قلت شغل وحرك .. قال والله صعبة .
رحت في طرف المحطة اسأل عن المدير .. قالوا هذا هو .. شايب بدون ذقن ولحية ويلبس لبس العمال وشكل شخصيته قوية .. وكان راكب بالسيارة وتوه واصل لدوامه .. نزل وسلم وبلغته السالفة وكان لازم نبلغ الشيخ بالسالفة !! حاول يهديني وقال الكل يغلط .. وصايح على اثنين من المعمال وهم الاصغر سنا واحد منهم اللي حاسبته .. تكلم واحد وكان متهاوش بالحيل مع السواق وقال انهم يقولون انت ماخذ الفلوس .. صحت بوجهه وقلت ما تكلمت معاك بحرف وانت ما اخذت درهم واحد . اللي اخذ الفلوس هاللي قدامي وكان مو قادر يحط عينه بعيني .. المهم نافخ المدير بكلام ما فهمته واللي خذ الفلوس صار يرتجف على الخفيف .. وطردهم .. وقالي كلام فهمت منه انه يحلفني اني حاسبتهم .. وتذكرت صاحبنا بساحة الفنا .. وقلت الله يخلصه اللي يكذب .. الله يخلصه .. وصار يصايح معاي .. الله يخلصه الله يخلصه شوي وانقط عليه ..
وقال .. توكل على الله .. واستحيت اقول له باقي 100 درهم !!