الصمت في بعض المواقف الى أخطيت
أخير من عذراً يجيب الفشيله
لاصار عذرك مايجمل الى جيت
تراك من صمتك تحوش الجميله
والصبر نعمه من نعم حامي البيت
يرفع مقامك والقناعه فضيله
لا ضاق صدرك من ديارك ومليت
مناكب الدنيا عراضً طويله
روح والى منك عن الناس صديت
يقل هرج أهل النفوس الغليله
تذكر بخير وعند ربعك الى الفيت
حطوك في منزال شيخ القبيله
والمزح له عند النشاما تواقيت
واخطوط حمرن في طرفها فتيله
فتيلة ماهيب تحتاج كبريت
تقدح بها بعض المزوح الثقيله
والصاحب اللي يخلط الماء مع الزيت
حاول تخارج منه بأيت وسيله
مايوفي حقوقك الى منك أوفيت
جفير سيفً يتعب اللي يشيله
ان زدت له بالطيب والا ترديت
والله ماتقلى لطيبك حصيله