كــل أرضٍ تشـيلك يا ثقـيل الحـمـول ..... وكل وقتٍ كريمٍ بالرضا والزعل
وين مارحت تلقى لك حبيب وعذول ..... وين ما كنت تلقى مثل ياسك..أمل
اليوم الثالث عشر صحينا متاخرين حدود العصر وتقهوينا واحلى راس شيشة وحجزلنا مساج في فندق لثلاث اشخاص مساج مع حمام مغربي على الساعة 7 وجلسنا على البلكونة واحلى روقان مع غروب الشمس واغني رايقة .
لين جت الساعة 6 ونص جهزنا اغراضنا على الموعد المساج وديني اول ماوصلنا للفندق استقبلونا حقين المساج والحمام المغربي المدة ساعتين ونص ساعة ونص مساج مع جاكوزي حمام بخار وسونا وبعدها ساعة حمام مغربي واحلى روقان وطلعنا على الساعة 9 ونص وحنى جوعانين . مرينا لنا سوبر ماركت تغضينا حق طبختنا وشوية مفرحات وعلى الشقة واسرع كبسة لحم بالعالم خلال ساعة وهي جاهزة مع سلطتها ( الله يخلي الكاتم ) وبعد ما اكلنا راس شيشة على السريع وكلن على غرفتة النومة بدري ورنا خط الصبح الى شفشاون ( المدينة الزرقاء ) .
من جعل منك يا شفشاون زرقاء ..... متمسحة بالماء والسماء
خرير بخرير, صفاء بصفاء 
من السفح الخفيض ..... إلى القمة الشماء
من أخمص القدمين ..... إلى أعلى الرأس مثل حواء
قصيدة:عبدالله سهلال
اليوم الرابع عشر صحينا بدري على الساعة 6 كل من اخذله شور وبدلنا كل واحد جهز شنطة باق باق حقت يومين وجهزت العزبة وطلعنا خمس أشخاص متوجهين على شفشاون طبعا اذا بتروح شفشاون من طنجة لابد تمر من جنب تطوان وتقريبا تبعد طنجة عن شفشاون حدود ثلاث ساعات ونصف وراح تمر بالطريق على مزارع وبحيرات وجبال متلبسة بثوب الطبيعة ومناظر يصعب وصفها وأجواء يصعب نسينها وخلال مرورنا بالقرى الصغيرة وقفنا في احدى المحطات وشرينا ثلاجة من الفلين مع ثلج ؟
لان خوينا الأصلع عمة متزوج مغربية ومن سكان طنجة فدلنا على واحد من معارفة عنده مزرعة وعنده حلال فوجهنا له وكان هو بعد تطون بنص ساعة وعند وصلنا لمزرعته استقبلنا الرجال واشترينا واحد من الخرفان الصغيرة بعد ذبحة وتقطيعه أخذنا الكبدة ولحم هبر للفطور والباقي بالثلاجة وجلسنا في زاوية مزرعته الكبيرة ونزلنا العزبة واحلا فطور وبعدها ضبطنا دلة الشاهي علشان نتقهوى بالخط وحنى بالخط قبل وصولنا الى شفشاون بدت تكثر الجبال والمرتفعات وبدى يحلو الطريق وعندما دخلنا المدينة جاني شعور غريب (هل شفشاون مدينة في جبل او جبلا في مدينة ) لجمال تصميم المدينة .
وعنما كنا نتمشى في أزقة وشوارع المدينة تعرفنا على طفلين يعملون بعد مدرستهم مرشدين سياحيا للمدينة تم الاستعانة بهم لشرح تاريخ المدينة فأوقفنا السيارة في اعلى المدينة ونزلنا نمشي مع الشابين في حواري المدينة الزرقاء فيا هو من شعور ( وكأنك تمشي بالسماء بين الغيوم ).
فـــي شـــوارعها راحـــة
وفي جداولها طمأنينة
وفــي طبــعتـها هدوء
وفي الونــــــها رضــــى
للنـــــفس البـــــشرية
وبعد المشي لعدة سعات وتجول بين المحلات وتعرفنا على اهم الأماكن التاريخية للمدينة وعلى غروب الشمس جلسنا في احد المقاهي لتناول الاتاي وبعض المخبوزات الطازجة على صوت جداول الماء المنبعثة من تحت الصخور وعلى الطبيعة الخلابة من حولها وبعدها في طريق الرجعة للسيارة شرينا بعض الذكريات للمدينة الزرقاء وعند وصولنا للسيارة ودعنا المشردين الصغيرين وتم اخذ صور للذكرى وبعدها ودعنا المدينة الزرقاء الذي اطلقت عليها اسم (مدينة السماء ) .
ملاحظة : في حال السفر من شفشاون في الليل يرجى الانتباه من الطريق لنه مسار واحد وتكثر فيه الانعطافات .
الحلقة القادمة إلى تطوان .................................................. ....
__________________
مسافر في سما النسيان :