بالنسبه لطنجه أنا نسيت اكتب عن اماكن السهر فيها

طبعا مع الأسف طنجه اماكن السهر الي فيها جميعها اغلقت او هدمت بسبب التطوير الحاصل على الكورنيش تبعهم طبعا جلستي في طنجه كانت 3 ايام واماكن السهر قليله او معدومه فيه الديوان وفيه وناسه وفيه مكان اسمه بلاك او شيء من هالقبيل قريب من فندق الشيراتون
طبعا يوم سهرنا بوناسه صراحة كلمة زباله قليله بحقه اخذنا طاوله بـ 1000 وندمنا والله وصارت لنا مشكله مع السيكوريتي فيه وحنا طالعين مسكونا قالو عطونا اكراميه عطيته مخرج وطلعت ومسكو صاحبي ورفضو يطلعونه دخلت مره ثانيه انا والسواق وطلعناه بالقوه مكان سيء جدا والطرب فيه اسوء شيء والخدمه زي الزفت وفيه رقاصه غثيثه وثقيله دم تتلزق بكل من راح وكل من جاء وجات عندي قالت نقط علي فلوس عطيتها ابتسامه صغيره كذا وكرشتها

اليوم الثاني طبعا سهرنا بالديــوان يعني مقارنة بوناسه هو افضل وبكثير صح انه سيء بس يعني افضل منه اخذنا طاوله بـ 500 درهم مشاريب وبنص السهره جانا واحد قال ياتطلب ياتقوم قلت له انا متفق مع صاحبك انت وش تبغى .. قام يرفع صوته وجاء صاحبه قال انا متفق معهم وخليهم جلسنا كملنا سهره طبعا هو مخيس بس كملنا وطلعنا
وحنا طالعين مع الباب جانا 3 يبيعون ورد ولزقو فينا وجاء واحد لزق فيني ودفيته دخل يده بجيبي الخلفي كان جوالي فيه وامسك يده واصكه بكف وتقلب هواش ويتجمعون علي جاء السواق والسيكوريتي فكو بينا ومسكوهم تلطموهم شوي وقلعوهم
لذلك الحذر ثم الحذر ثم الحذر اذا طلع الواحد من ديسكو او مطعم او اي مكان عام انتبه لأغراضك وخاصة الديسكو يتجمعون حول الواحد يحسبون انه سكران يحاولون يفشخونه
تقريبا هاذي النطقه الي نسيت اني اكتبها وهذا الموقف الي نسيت اكتبه
طبعا المغرب بلد جمميل وبعد زيارتي له ندمت اني مازرته من قبل يعني انا سافرت اماكن كثيره وسهرت في اماكن كثيره واحتكيت بناس كثيرين بس المغرب صراحة واهلها وناسها شيء ثاني لها رونقها الخاص فيه سلبيات وفيه تصرفات سيئه من بعض الخليجين هناك وفيه هالشيلات الي غثو امنا فيها وفيه هياط وفيه حركات من البعض مالها اي داعي في نهاية الامر انت في بلد ويجب ان تحترمه وفيه هالشحاذين الغثى والشرطه القلق ولكن ايضا فيه ايجابيات وهل بازورها مره ثانيه طبعا نعم وبكل تاكيد