رد: يوميات مخاوي الشنطه بالرباط
مرت الساعه ورا الساعه مبسوطين ننتظر الهبوط طبعا الدنيا مشاء الله حولك تفتح النفس في الطيارة طبقة طريقة دائما اطبقها السفرات الماضيه اذا كان الحجز على الخطوط السعوديه وثبت صحتها وأنصح فيها وبشده حتى تمر عليك الرحلة بسرعة وقت ماينزلون وجبتهم اغصب نفسك عليها وابلع عليها حبتين بندول نايت ثلث ساعة إلا وأنت فاقد الوعي نمت اغلب وقت الرحله بعدها جاء دور تسجيل اوراق الدخول وزعوا علينا أوراق التسجيل قبل الهبوط وسلجنا البيانات وأنا أتذكر الأفلام الهندية الى صارت للشباب مع الجمارك والجوازات في مطار محمد السادس خصوصا واحد من الأعضاء يوم يقول ان وضع المطار اعتبر نفسك مشارك في مسابقة الحصن طبعا الخليجييين وباقي شعوب الأرض يتفرجون علينا والله شي غريب وأذكر اني تحديت عبسي إني ماراح ادفع ولا درهم في المطار خصوصا أن أحد الأعضاء الي سافروا قريب قال الوضع أحسن من أول قلت أجل راح اكسب التحدي مع عبسي .
نزلنا المطار وعلى طول على الجوازات طبعا أنا قبل عبسي في الصف حق الجوازات وموظف الجوازات يناظر نظرات غريبة و ألتفت كل شوي على عبسي شفني ماعطيته شي الرجال شك في وضعي مايدري وش السالفه كل شوي ملتفت على عبسي النكبه قال أخويا ليش ماكتبت العنوان ضروري عنوان السفر قلت له أنا إلى الأن ما حددت ماكان السكن كتبت اسم المدينة الرباط قال لي موظف الجوازات إنت مسجل سائح وأول مره تسافر المغرب ضروري إنك تعرف محل السكن ياليل البعارين عبسي مبسوط يناظر قالي موظف الجوازات اتصل على الفندق أو الإقامة وبعدين ارجع مره ثانيه
راح عبسي لنفس موظف الجوازات ونفس الاسطوانه وش الحل ياعدنان وش رايك أدهن السير يسير ادفع ياعدنان مسوي فيها قوي ادفع قلت له شف ذا العالم كلهم يدخلون الا حنا ووضعنا في السليم ليش ندفع اصبر خلنا نشوف لنا حل.
واتصلت على الخادمة وأشوف وش راح تقول قالت اكتب أي شارع أي زنقة ولأني ماأعرف ولا شارع قلت لها طيب وش تقترحين ياسعادة الخادمة أسعفتنا بحي وشارع وقالت اكتب هذا العنوان.
رجعت لموظف الجوازات ناظرني وغير أسلوبه معي ياحاج عدنان كيفك إكرامية ياحاج وكأني ماسمعت شي العالم حولي في كل المسارات دخول سلس وجميل أنا بصراحة كبرت في راسي أني مااعطيه شي نظره اخيره من موظف الجوازات كلها احباط بعدها قال سير خويا .
عبسي وقتها قد وصل لسير الشنط لأنه ختم جوازه قبلي وأنا أول ما طلعت من الجوازات في موظف في اعلى السير الكهربائي إلى ينزل على الصالة إلى تحت وقفته هناك وطريقته مالها معنا ولا لزمه لكن ينتظر أي واحد من المشاركين في اللعبه ويبدأ المسلسل المتكرر أكرامية ياشيخ عدنان صرت شيخ وقتها قلت له ماكاين والوا ناظر نظرة تحدثه بأن هذا من الرعين الاول مافي فايده معه سير أخويا ابشر راح اسير ولا راح تشوفني ماطلبت شي .
نزلت لصالة وصاحبنا عبسي ينتظر الشناط طبعا هو مايدري أنه راح يبلط المطار الين توصل الشنط قلت له لما تأخذ الشناط رح شوف لنا بطاقة اتصال محلي وكنكت تحميل مفتوح و قلت له أنا راح أحول دراهمنا من وفا كاش إذا طلعت من ذا الصالة أسئل عن البنك وراح يدلونك.
فيه قبل الخروج مجموعة من موظفي المطار قلت هذولا اكيد جمارك المطار آخر خط في اللعبة مريت من عندهم ولا قالوا لي شي وقتها عرفت إني كسبت ال مع صاحبنا عبسي .
رحت لبنك وفا كاش وهنا طلبت البطاقة الي نزلها أخونا قناس نجد البطاقة السياحية ب99 درهم وتعبيها رصيد 20 ألف درهم والحد الأعلى السحب 6000 درهم في اليوم
للفائده
ميزانية سفرتنا كانت تقريباً 34 الف ريال وزعناه على اربع حسابات حسابين لي وحسابين لعبسي والباقي كاش معنا حولت تقريبا مايعادل 18 الف ريال في المطار من الكاش الي معنا والباقي في الحسابات البنكيه وقلنا نشوف كم يمشينا ذا المبلغ اخذنا عشرين الف درهم ووضعتها في البطاقة السياحية وباقي الدراهم كاش بعد نهاية السفره اكتشفنا أن الميزانية ضخمه على النظام الي كنا ماشين عليه.
ومسلسل الإكراميات مازال مستمراً مع عدنان تخيلوا فيه موظف بنك يطلب إكرامية صارت مع موظف بنك وفا طلب إكرامية شي عجيب لكن ماعطيت الجوازات ولا الجمارك أكيد موظف البنك راح يكون معهم مافيها كلام .
وصل عبسي لبنك وفا وحنا ننتظر إنهاء التحويل وفتح الحساب وقتها اتصل علينا السواق إلي راح يوصلنا الشقة
اتجهنا الى الرباط طبعا سواقنا العزيز كان مبسوط وبشوش لدرجة غريبة قلت ياولد أكيد الرجال يدور الاكراميه لكن شكل نظامه غير عن جماعة المطار لكن اكتشفت في مابعد السبب وراء هالإبتسامات بصراحة ظلمته وراح تعرفون السبب خلال سرد الإحداث.
انطلقنا من المطار مسرعين نبي نمر على المحمديه ونخلص امورنا من المرجان سريع سريع لكن كان الطريق مزحوم شوي واتجهنا على الرباط والسواق الي معنا مشاء الله عليه طربان من يوم طلعنا من كازا الين وصلنا الشقة اقول يمكن ذا الرجال مبوق ولا شي ونفسيته حلوه وانا وعبسي نطالع في بعض مستغربين.
لحظة دخول زنقتنا الي قضينا فيها اسبوعين طبعا ذا الاسبوعين مرت مرور الكرام قال لي السواق الطربان عيط على الخادمة خليها تساعدنا في الأغراض قلت له حنا وصلنا الشقه قالي ايه وصلنا اتصلت على الخادمة واستقبلتنا بحفاوة وأخذت إغراضنا ورتبتها لنا بعد مرور نصف ساعة وصلت صاحبة الدار ورحبت فينا ترحيب حار الله يذكرها بالخير وارتحنا شوي انا وعبسي وجلسنا نخطط للأيام الجايه .