الأثنين ٦/١٧ ميلادي
قمنا الساعة ٩ و الساعة ١٠ طلعنا من الفندق والجدول يشير إلى حدائق ماجوريل كانت قريبه ، وهذه ميزة الفندق موقعه ممتاز كل شئ حولك دخلنا الحديقة اللفه الأولى للإستكشاف والثانية لتصوير مكان زوين وتصميمها رائع فيها نباتات من كل القارات الخمس وكالعادة كلهم أجانب أنا وصديقتي فقط عرب وانا الوحيد ( أسمر ) علشان كذا سويت عليهم كوميدي ستاند اب ،، ما طولنا وطلعنا الساعة ١١:٣٠ فطرنا في ( محلبة الاسرة ) المحلبه ديالي ولازم عالفطور ( مسمن ) اللي تسويه حرمه كبيره بالسن وهي توقف في زاوية المحلبه ومعها الفرن المتحرك وتشتغل ودخل المسمن لها ، ياحليله مبتسمه لناس والحياة رغم ظروفها التي أجبرتها تقف بالساعات لتوفر لقمة العيش ( الله يرزقها دنيا وآخره )
المهم بما إني كل صبح وأنا مشقر عليهم صارت تتبسم لنا أكثر بصراحة تنحب قامت صديقتي العزيزة تغسل هي ناظرت وهي طالعه وقفتها وتكلمت معاها سألتها شنو تقول
قالت توصيني عليك وتقول آكلي زوجك وأنتبهي عليه السمر حنونين ناظرت فيها وأبتسمت وجاء على بالي ( العنصريه اللي فرقت بين شعوب ومن أكثرها هذا أسمر وهذا أبيض ) المهم بعد الفطور قمت أبي أغسل تكلمت معي مغربي بحت مافهمت شئ سكت مارديت عليها هي عرفت ألتفت لصديقتي تقولها هو من ليبيا هههههههه قالت لا سعودي ردة فعلها شهقت وتضحك وسلمت علي .
£مداخلة خارج التقرير ( تصدقون عاد سالفة الجنسيه يبيلها تقرير كثير مواقف حصلت لي سواء في المغرب مرواً بإندونيسيا والخليج آخرتها بمطار الملك خالد ، عرفت ليش أقاربي يقولون لي تشبه المصارع راندي أورتن )
& نرجع لتقريرنا &
أخذنا طاكسي والمقصد أوريكا ( مانسيتها لازم أوصل القمة وأوثق ) وركبنا الى مواقف التاكسي حق أوريكا ومشينا وسالفة الدرك برأسي بس المره ذي صدقوني السالفة توصل لسفارة المهم تحركنا وطق السماعة ياحبيبي وعلى أنغام فناني الأول أبو نوره أحاول ألتقط ما فاتني في الرحلة الأولى ولم أتفوه بكلمة وأنتظر نقطة الدرك ولكن لم يطلبوا منا الوقوف حتى عند عودتنا تأكدت إن السالفه الأولى مدبرة
--
وصلنا جلسنا وأخذنا سلة فواكه وأستغليت جلوسنا للإستمتاع والنظر لصديقتي العزيزة وأنا كلي شوق لها وأنا معاها في جعلتني أعشق المغرب فوق جمال البلد بطيبتها وحرصها وخوفهت علي ( والله لم أبالغ لكن فعلاً اغرقتني بحسن تعامله نحن لم نعرف بعض من ليله او أسبوع نعرف بعض حول السنة وأستمرت بعد العودة ) قررنا الغداء بعد النزول من الأعلى مانبي نطب بالعيشه وحنا ورانا طريق صعب المكان ما فيه زحمة مثل أول مره لأنه في نص الأسبوع لكن هالمره واجهت شباب من الخليج
--
وبما إن الوقت بدري نطلع عالرايق وفي مكان نوقف طبعاً وانت تمشي تسمع خرير الماء من كل مكان جذبني شخص يبيع عصائر ماعنده ثلاجة أصلاً ما يحتاج مكانة قريب من شلال صغير يضعها هناك لها منظر رائع وتجئ تحصلها بااارده من الشلال وصلنا عند آخر عقبه وتطلعك لشلال الكبير نفس عميق وأخذ بيد صديقتي ونطلع كل ما أقتربنا تسمع خرير الماء قوي وصلنا القمة والشلال الكبير عالطول الكاميرا وأوثق وجلسنا نستمع بالمنظر على أنغام الصوت القوي وبداخلي الحزن الذي أستعجل بالقدوم وأخذ مكان بداخلي وصارت ملامحه على وجهي فأنا هنا أعيش لحظات لم أعيشها بحياتي ألتفت لصديقتي علشان أفتح موضوع وأنسئ الحزن اذ بها تسبح في عالم التفكير سألتها قالت والو
الساعة راح توصل ٦ نزلنى متجهين لطاكسي مافيه وقت للغداء وحنا نمشي قالت أفكر في رحلتلك بتخليني وتروح كلامها فجر الحزن بداخلي حاولت أن أظهر إبتسامة وقلت : حتى لو سافرت راح نتواصل ماراح يتغير شئ وقطعت الموضوع بالمشي وركبنا الطاكسي على مراكش الساعة ٦:١٥ الطريق كله تفكير
وصلنا لساحة الفنا الساعة ٧:٢٢ رحنا ( قصر البديع ) أحد أهدافي لزيارة لقيناه يقفل الساعة ٤ رحنا نتغدئ في ( مقهى قصر البديع ) خلصنا مع أذان المغرب٨:٤٩
كان مخططين نسير ل مهرجان علي بن فلاح لكن مايمدي نروح الفندق ونطلع مع الباص
صليت المغربوذهبت لأشتري هدايا للأهل والزقرت حقين الإرقيلات مانسيتهم خذيت لهم وأنا أقول الله يستر لا يقولون ممنوع أذان العشاء ورجعنا الفندق حطيت الأغراض
وعالطول رحنا نصرف فلوس ورحنا محطة القطار مشي طبعاً علشان نعرف مواعيد الرحلات لكازا وانا ودي لو الزمن يوقف لحظه قضيت المشوار ورجعنا الفندق
--
الجو ماينفع جلسه لان الكل بداخله حزن ومانبي نقلبها دراما حزينه شفنا الوضع كذا مالها إلا نطلع علشان نغير نمط الحزن الساعة ١:٣٠ رحنا ماكدونالدزنتعشى أكتشفت إن ماكدونالدز اللي بكليز موقع لصيد هناك الطيور وااجد وتخيلوا لقيت من ههههههههه
الشيبان اللي بالطائرة صاحب الإتكيلا وخويه أول ماشفتهم ضحكت خلصنا ومشينا اتفقنا نروح مكان عكس البارح يعني الليله مانبي عرب نبي أجانب نشوف جوهم طبعاً مانعرف ولا عندي نت أسوي بحث قررنا على ذوق صاحب الطاكسي
--
وأحنا ماشين التكاسي واقفه قدام المطعم حنا وقفنا عالشارع ونأشر وقف طاكسي جينا بنركب مدري من وين طلعوا عالم ويصارخون ههههههه طبعاً مدري شسالفه واللي يروح من جهة السواق طلعوا حقين التكاسي تهاشوا معه شلون تأخذهم من هنا وحنا واقفين هو عارف الشغله راح قالنالهم السعر المتعارف عليه لا تقولي انا واقف هنا من زمان وماني عارف قال لا ماعليه اللي عنده الدور راح يقرب الطاكسي واحد منهم كان جنبي عمره أتوقع في نهاية العقد الثالث قال :
you speak ench
قلت : no وأنا طبعاً مابيه يعرف إني خليجي
وأفكر باللغة صعبه وراكبه علي إني اتحدث فيها
قال : you speak Portuguese
قلت : No يقلب في ملامح وجهه دليل عالإستغراب وأنا في نفسي أقول يخرب بيته ذا محجرلي
قال: you speak English قالها وهو يبتسم
وأنا والله فيني ضحكة بس مسوي ثقل
قلت : No أنفجر ضحك قال الأخ عربي
هو ضحك وأنا فكيتها ضحك ههههههههه
قال: خليجي/ قلت : نعم وهو يتبسم يرحب فيني ليش ماقلت من أول وأنتم أهلنا شكرته وجاء الطاكسي وركبنا علمناه بشنو نبي قال بوديكم كلوب سلفر مشهور بالمغرب مكانه شارع فرنسا وصلنا المكان واضح انه شغل على مستوى عالي فيه أعلام لبعض الدول كلها أوربيه
الدخول لشخص ٢٠٠درهم غيرنا جو وحاولنا نستمتع بأخر ليله في مراكش ونؤجل الحزن طلعنا أخذنا تكسي ب ٥٠ درهم ورجعنا الفندق
جلسنا مع بعض شوي بعدها محاولة نووم
باقي الجزء الأخير وداع مراكش وفراق المغرب البلاد الساحرة