إن كان حاديك الزمن والمقادير
الصبر للرجال يعطي مناعة
اسمع وخذ مني نصيحة وتذكير
ذرب الكلام اللي يفيدك سماعه
صوادف الدنيا ورود ومصادير
وافضل كنوز الوقت كنز القناعة
اللي كتبه الله على عبده يصير
صبراً جميل ودبرة الله مطاعة
مادمت من روس الرجال المشاهير
مايرتخي راسٍ شمخ بارتفاعه
بكرة تبي تلقى العوض فالمخاسير
تاصل حبال الوصل عقب انقطاعه
العافية تسوى كنوز الدنانير
والرجل دايم نجدته من ذراعه
صكات بقعا لانصنّك طوابير
خلك كما ضلعٍ تقانب سباعه
شامخ شموخاً ماتهزه معاصير
لو هو محاصر بالخطر كل ساعة
صلف الهوا ماشدد طويق والنير
والحر يقدم والرعاعة رعاعة
ساير زمانك وانتبه تعكس السير
وسمح الجناب اللي يراعيك راعه
ربعك حزامك فالليال المعاسير
صدرك عليهم لايضيق اتساعه
قد قالوا اللي يحكمون التعابير
ترى يد الله مع يدين الجماعة
حذراك دينك لايجي فيه تقصير
لاضاع دينك ماش غيره طماعة
ابليس لو زيّن دروب المحاذير
أبعد عن اللي مايجوز اتباعه
عقب المنية ماتفيد المعاذير
واللي يطيع ابليس ماله شفاعة
اشر الرفيق اللي يعينك على الخير
وبيع الردي فالسوق بيع البضاعة
لازم يجي من صاحب السوء تأثير
يدوّر اللي يخشره في ضياعة
اللي يحمل المسك ماينفخ الكير
ومن جالس المقرود ياخذ طباعه
كم من كبيرٍ بالعقل عمره صغير
وكم من كبير ... بعقل سن الرضاعة
لاتستشير إلا حكيم التدابير
رجلٍ تفيدك خبرته واطّلاعه
العاقل يشاور هل العرف ويشير
وكل على ماقيل حسب اقتناعه
الطيب يبدي فالوجيه المسافير
يبدي كما نور توهج شعاعه
يشفيك حرً لانهض كنه الطير
الطيب مزروعٍ بقلبه زراعة
في طلته تلقى السعد والتباشير
واليا نخيته قال سمعاً وطاعة
تلقى الكرامة عند ريف الخطاطير
وتلقى اللكاعة عند راع اللكاعة
مافالبشر مخلوق من غير تقصير
مير القيام يكون بالاستطاعة
واليا ظهر سرك لو يقال في بير
تراه مابه بير من غير قاعة
يبدي ويبدي به من الناس تزوير
حيث إن بعض الناس مثل الإذاعة
يصبح كما جمٍ ملته الغثابير
ويمسي طعام مروّجين الإشاعة
الظلم ظلمه في وجيه المعاثير
مايفلح الظالم ولو طال باعه
يلقى الجزا لو عقب طول المشاوير
سواة ماسوّاه واعظم شناعة
من دعوة المظلوم احذرك تحذير
اليا رفع لله كف الضراعة
يجيب ربه دعوته دون تأخير
وأبو قناع يبين خافي قناعه
راع الحسد لو يندفع يمك مغير
عنّز على الله واتركه باندفاعه
كل الصعاب بعون ربي تياسير
من يتكل بالله ومَن كل راعه
قدمت لك عن واقع الحال تقرير
ببيوت شعر فيه فن وبراعة
صدرتها من صافي الفكر تصدير
وحقوقنا ماهي حقوق الطباعة
وختامها مني تحية وتقدير
شاري خوي الطيب ماعاد باعه
لشاعرها . . . رائد العالي العتيبي
__________________
لاتسمع كل ما يقال ولا تقول كل ما تسمع.