الجزء السادس:
بعد العوده من الدوله الخليجيه والانتهاء من فتره الزيارات المتكرره لها والعوده الى مقاعد الدراسه الجامعيه التي لااطيق الحضور لها في ذاك الوقت كنت على تواصل مع صديقي علي شبه يومي وبعدها اتصل عليه مقفل جواله واكرر الاتصال جواله مقفل ورحت اسال عليه وين علي وينه ماالقى جواب !
عندي صديق عزيز علي جدا يدرس معاي وهو يعرف علي عن طريقي وكنت اقابل صديقي في الجامعه تقريبا يوميا جاني اتصال منه بعد صلاه المغرب:
أبو مشعل: محمد وينك
انا: جالس بالكوفي
ابو مشعل: تعال عندي الشقه الحين ابي اكلمك في موضوع مهم
انا:خفت واستغربت ماهي من عوايده يكلمني كذا قلتله خير ان شاء الله وش فيه
ابو مشعل: تعال ومافيه الا كل خير بس حاول تعجل
انا: اوكي نص ساعه وانا عندك.
تنويه:
ابو مشعل هذا أعز واغلى واقرب صديق لي على مر الوجود نعرف عن بعض جميع الاشياء مثل الاخوان ومعظم قرايبه مناصب في الدوله ورتب عاليه.
رحت البيت عنده سلمت عليه جلسنا وكنا لوحدنا
ابو مشعل : محمد تعرف وينه علي
انا: لا والله صارله كم يوم مقفل جواله وسالت عليه مالقيت جواب شافي اختفى الرجال
ابو مشعل: ولد عمي نقيب في المباحث العامه وكان عندي هنا ومستلم قضيه أختلاس بمبلغ خمسه ملايين ريال والمتهم الرئيسي فيها علي والحين هو موقوف في سجن المباحث للتحقيق.
انا: مصدوم وبنفس الوقت تلعثمت وبنفس الوقت تبلمت مخي وراسي دار من جدك ياابو مشعل تتكلم ولا تمزح ولا وش.
قالي انت عارف انه كان يشتغل في الشوون الماليه وبحكم قربه من صاحب الشركه الكبرى كانت عنده صلاحيات والرجال ضرب ضربته وانمسك الله يهديه واللي كنتوا تسووه في البحرين من الفيلم اللي سواه
انا: سالته كم مره عن الفلوس قالي جبتها بالحلال وتعبت فيها بس ماتوقعت انه يختلس طيب ياابو مشعل الحين وش بيصير عليه قالي بتابع موضوعه واعطيك الخبر انتظر مني اتصال.
بعد كم يوم تقابلت مع ابو مشعل وقالي ان صاحب الحلال مستعد يتنازل بشرط يرجع جميع المبالغ الماليه الخمسه ملايين او ماله الا السجن .
بعد فتره من الزمن تم الحكم عليه بالسجن لفتره طويله وفتره سجن علي تم جمع المبلغ من قبل بعض الاشخاص وتم خروج علي من السجن وبعدها غادر السعوديه وأختفى الى يومنا هذا ماشفته من عام 2007الى2016.
الفتره اللي رجعت منها من الدوله الخليجيه ومعرفتي بسجن علي وتعلقي بالفتاه الحسناء اصبحت كالمجنون الذي لا يملك عقل جميع تصرفاتي كانت عبر العاطفه كنت عايش في حزن والم وفراق وعذاب تعبت كثير ولاحظ أغلب من حولي في تغيري الين ماقبلت احد الاصدقاء وشافني متغير وحزين وكئيب قالي تبي تضحك وتنبسط وتطلع من الجو اللي انت فيه قلتله ياليت قالي دواك عندي ويفتح بكت الدخان ويطلع سيجاره ولعها وهو يولعها قالي هذي مو بتنسيك الهم هذي بتنسيك الدنيا كلها بعد ماولعها مدها لي واخذتها وشربت منها وياليتني ماشربتها انواع الافلام صارت واحنا بالشارع ماسكين خط انواع التخيلات ونا اشوف زجاجه السياره مره اشوف حصان يجري جنبنا ومره اشوف وجهه خويي صاير معين وعيونه طالعه انواع التخيلات والهبوط خلصت من هذيك الليله ومن بكره كل يوم على هالحال يوميا يوميا افكر اني لما اشرب منها بنسى كريمه وعلي واللي صار والله وطحت فيها طيحه وادمنتها صرت اصحى ونا شاربها وماانام الا ونا شاربها والدراسه وينها في تخبط معها انجح في ثلاث وارسب في ثنتين ومرات انجح في خمس وارسب في ثنتين وكل الرسوب بسبب الحرمان عدم حضوري للمحاضرات مرت السنين اختفى علي وراحت معاه كريمه ومابقى الا ذكراهم .
بعد ادماني الشديد يوميا والله وبعد شده حيل شويه مني بعدم الغياب في الجامعه ونصحي من قبل اعز اصدقائي وصلت الى السنه الرابعه في الجامعه يعني باقي لي سنه واتخرج وصارت الطامه الكبرى؟!
جاني اتصال من الشخص اللي كنت اشتري منه ال وقالي محمد وينك قلتله موجود قالي عمرك طلبتني شي وقلتلك لا او ماعندي او مااقدر قلتله لا ماصارت قالي انا اليوم مقطوع وابي تعطيني من اللي عندك الين مايجيني شي قلتله ابشر تم رحت وقابلته وعطيته وكان وجهه متغير مو مثل العاده لما اقابله كان نظرته لي تقول سامحني مو بيدي غصب عني.
كان هو وقتها ممسوك ومحاط من بعيد برجال مكافحه المخدرات!
بعد ماعطيته تم القاء القبض علي من مكافحه المخدرات بتهمه اهداء قطعه ال وكلبشوني وركبوني السياره وعلى مبنى المكافحه وكان راكب قدام ضابط برتبه ملازم اول شاب قالي وينك يامحمد نبيك من زمان قلتله هذا انا عندك قالي والله وجيتنا بنفسك قالي كم سنه لك بالجامعه كان وقتها متاخر سنه بسبب الحرمان ببعض المواد جلست في الجامعه خمس سنين وكنت في السنه الرابعه قلتله لي خمس سنين في الجامعه قالي بتروح عليك الخمس سنين حقت الجامعه وخمس سنين في السجن يعني عشر سنين من حياتك ضاعت وانا وقتها لما قال هالكلام مااشوف قدامي الا امي وابوي يالله جلست اكلم نفسي شريط حياتي كله مره قدامي بمعنى اصح مت من داخلي واصبحت وقتها جسد بلا روح؟!!!
الجزء القادم:
مالذي حدث في فتره سجني وتدخل عده اشخاص في القضيه؟!