الجزء السابع:
بعد ماانمسكت وتم القاء القبض علي كلمت ضابط في المخدرات قلتله لو سمحت ابي اكلم ابوي ماقصر كلمت الوالد ونا فيني الصيحه قلتله ابوي انا ممسوك في المخدرات ابوي مصدوم وش يامحمد وش تقول وش صار ماقدرت ارد عليه سحب الضابط التلفون وكلم ابوي ووصفله المكان وجاني الوالد اليوم الثاني الصبح وقت الزياره واول ماشفت ابوي نزلت لاشعوريا عند رجوله ابكي مسكني ولاول مره في حياتي اشوف ابوي خانقته العبره ويشوف ابنه البكر مكلبش وممسوك في قضيه مخدرات صدمه وقتها لي وله.
قالي ابوي كلمنا عميد وكذا رتبه عشان يطلعوك بس في ضابط حطك براسه وعشان مايبيك تطلع حول الاوراق لهئيه التحقيق والادعاء العام.
تم دخولي للسجن ويالله ماهذا المكان وش سويت انا بحياتي ليه انا هنا انام كل يوم واصحى وافكر اني بصحى في البيت القى نفسي في السجن الاهل وضعهم النفسي مزري اصدقائي حاولوا مساعدتي بشتى الطرق كانت لي داخل السجن معامله خاصه بحكم معرفه الوالد لمدير السجن ونا جالس لوحدي في الزوايه وافكر واقول خلاص ضاعت حياتي انتهيت اندمرت بكون بدال ماتكون عندي بكالوريس هندسه تخطيط بيكون عندي بكالوريس خريج سجون.
وقتها كان عندي جوال داخل السجن واكلم الاهل يوميا طبعا انواع التساولات من القرايب وين محمد اختفى ولشده سمعه عائلتي الطيبه انجبروا يكذبوا وكان الرد محمد في القصيم يسوي مشروع تخرجه طيب عطونا رقمه نكلمه يبي يركز في مشروعه ومايبي يتواصل مع احد يالله وش سويت انا حطيت الاهل في موقف لايحسد عليه قبل لا احط نفسي تم ذهابي للمحكمه وحكم علي الشيخ بسنتين سجن صدمه للجميع نعم صدمه؟!
الوالد يكلم الشيخ من هنا وهنا وقت المحاكمه قال بحكم صغر سنه عطيته اقل حكم
ياللهي خلاص انا ضعت رجعت السجن ونا مثل الجثه الهامده امشي وكان الوالد وقتها شغله الشاغل اني اطلع واكمل الجامعه واتخرج قبل لايفصلوني امنيه حياته يشوفني مهندس .
جزاهم الله خير اثنين من اصدقائي ساعدوا الوالد في الجامعه وضبطوا اموري وقدموا اعتذار على اساس اني خارج المملكه وقبلوا الجامعه الاعتذار ووقتها الوالد كان مرتاح شوي وبتكون الراحه الاكبر وقت خروجي من السجن ولحسن سلوكي وسيرتي تم خروجي من السجن بعد سنه ونص واعفائي عن باقي المحكوميه.
وكانت احلى لحظه وقت خروجي من السجن واستقبال الوالد وابو مشعل لي خارج ابواب السجن وفرحه عائليه عامره والحمد لله رجعت للجامعه وشديت حيلي بالدراسه وتخرجت من الجامعه بشهاده بكالوريس هندسه تخطيط حضري واقليلي.
الجزء القادم:
بدايه وظيفتي والطريق الى المغرب