راح ابدأ بالسائق طبعا لسلامة بعض الاشخاص ماراح اذكر اساميهم

نجي الان نكمل لكم تم استلام الشريحة وتم الاتصال على السائق تقريبا ساعه ١٢:٠٤ ليلاً
انا الووو سلام عليكم
رد السائق وعليكم السلام اخويا
انا قلت معك عبدالعزيز ماكلمك
ابو ادم
رد السائق قال ايوا اخويا
برسل لك الرقم وقال لي كلمة وراح يزبطك ..
انا بيني وبين نفسي ..
افا اول منكح ..!
قلت يلا زين انه رسل لي احد
انا مشكور ماقصرت ..
انا هنا مافهمت وش يقول غير هذا رقم اتصل عليه واقوله من طرفه وفعلا اتصلت
انا الو فلان انا جايك من طرف السائق الفلاني
رد علي حياك اخويا ورحب فيني
ثم قال لي وينك قلت
انا عند البوابه الثانيه
قال لاتطلع من المطار خلك انا بجيك
قلت اوووك اخويا
انا هنا قلت هذا الي ابغاه اني مااطلع لان لما صرفت في اشخاص تطارد وراي وتقول تبغى سيارة اجار تبي تكسي والخ وانا اقولهم خالي راح يجي ياخذني وهو مغربي فعيب اجي بتكسي
طبعا هذي تصريفه لكن وش اسوي
معهم ينشب ولما اقولهم كذا خلاص يروحون على طول لكن بعضهم يجلس يراقبك خاصه اذا كنت وحداني
وفعلا شوي واتصل علي وقال اطلع سالته وش لابس اعطاني اوصافه وطلعت وحصلته امامي مسك عفشي ورحب فيني طبعا انا نظام شياب مااحب احد يخدمني ههههه فمسكت الشنطه وقلت معليش اخويا انا احب اخدم نفسي وبينت له السبب وضحك المهم مشينا الى ان ركبنا التكسي ورحنا وجلست اسولف معه الى ان وصلنا طريق بدايه كازا وهنا وقفنا ثواني ويجي السائق اول ماشافني فرح والله واخذني بالاحضان وذكرني وقال انا مانسيتك انت من الاشخاص الغريبين الي يمرون علي وصعب نسيانهم " لا انا مااسهر واصحى بدري" قلت لكم نظام شياب
حاسب السائق التكسي اعطاه ٢٠٠ درهم وراح طبعا هذا الشخص جدا محترم وخلوق واول مره اشوفه واتعامل معه
المهم ركبت مع سائق صديقي وقلت له وش سالفه احسبك سحبت علي قال لا ياخويا ممنوع طاكسي كازا احق قلت ايوا كذا خوفتني ياشيخ وقلت له اسمع انا نمت بالطيارة وراحت على وجبتي ثانيه وماحبيت اطلبها لما صحيت لن انا نظامي امريكي خلاص لازم احترم عمل المضيفات ومااشغلهم قال ابشر
قلت شف انا بطني مو اي اكل يصلح له وعندي التهابات فاي بهارات وفلفل وخرابيط اروح فيها وقلت له سنه الي راحت في محطه بالطريق وقفت فيها انت ابي توديني لها قال ابشر
مشينا سوالف وضحك شوي سمعنا ميوزك وروقنا بالخط شوي قال وصلنا للمحطة قلت له شف ننزل وانت اطلب لنا بالنسبه لي دجاج لحم مايصلح لي وابغاه تكفى بدون فلفل وابهارات والخ قال ابشر
دخلنا كلمهم طلب لي وجبه بدون بيبسي مع مويه وهو قال انا متعشي فباخذ كافيه قلت له بالعافيه " ضحكت وطالعته وقلت له عافيتنا مو عافيتكم " هههههههه
طبعا اسم المطعم اعتقد افريكانو
جلسنا دقايق وشوي جا الاكل اخذناه درفري دفعت الحساب طلع تقريبا ٦٥ درهم
ركبت سياره مشينا فتحت الساندوتش سميت اكلت اول لقمة قلت ياحسافه ليتني طالب ثانيه بصراحه لذيذ وطازج وبدون بهارات ومايونيز وكاتشب
المهم مشينا الى ان وصلنا مقر السكن

وهنا اقف لا اذكر لكم بعض اسباب والنصائح وسبب اختياري الطريقه هذا

نظراً لعدم ذهابي كثيراً للمغرب وهذي المره ثانيه فالحذر واجب وعدم التهور في اتخاذ اي قرار لعدم وقوع في سرقه او احتيال والخ " وهنا انصح الي يسافر اول مره عليك بالمعلنيين ووثق حجزك وتوكل على الله " لذا كان علي ان اتوجهه لا اناس ثقه لذا بعد عناء وبحث اخترت ان ينقلني نفس الشخص الذي نقلني من كازا الى مراكش السنه الماضيه وانا اعتبر هذا الشخص صديق كونه ينصحك ويحذرك من بعض الامور والاخطاء التي يقع فيها شبابنا فوقع الاختيار على سائق يعمل بالروز قاردن وعندهم خدمة واحدى خدماتهم توصيل من كازا الى موقع السكن في مراكش ولم يقصر جداً ابو ادم للامانه لما طلبت منه السائق (بالاسم ) وقلت له السبب طبعا السعر ثابت وبقيمة ١٤٠٠ درهم طبعا السعر انا اعتبره لاباس به وكما ان هناك في رسوم خط تقريبا ٥٠ درهم تقريبا وفي ٢٠٠ تكسي ينقلك من المطار الى بدايه طريق كازا
طبعا في وسيلة اوفر وهي القطار وفي اشخاص تقدم خدمات توصيل ارخص لكن كل واحد يختار الامن له والي تعرفه احسن من الي ماتعرفه واذا كنت من مرتادي المغرب دايماً وتعرف دهاليزها استاجر سياره او استاجر سيارة مع سائق اذا كنتم اكثر من واحد

اتمنى اكون افدكم بخصوص ووسيلة النقل من كازا الى مراكش

قريبا السكن باذن الله