يا بخت من له منزلن وسط أغادير
لا مال ضو الشمس عينه كحلها
في صحبة محمد كبير المناعير
و فيصل ليا مالت بـ كفه عدلها
بنزل على الشاطي وأشوف الغنادير
و أروي ضما روحٍن تِزَاحم عللها
ناسٍن حلاهم غير وأخلاقهم غير
ما كنك إلا واحدٍن من أهلها
في زحمة العالم وفي حزة عصير
عينك تخيَّر من وعلها و حجلها
اخذت لي بالعقل سجة تفاكير
وعيني على اللي تكتوي من خجلها
يا كامله بـ الحسن يا احلى التباشير
قربك يداوي الروح ويمحي زعلها
انتي صباح الخير ونتي مسا الخير
النحل من ريقك تجمِّع عسلها
وصفي عَجز ويعجزن التعابير
عن دولتن بالعز ربي شملها
يا طير يا اللي في فضا عيني تطير
سلم على المغرب بحرها وجبلها
#بقلمي