بعد مغامرة حلوة بالدباب والطعوس رحت للي بالمطعم قلت له ودي اتكي فوق طعس دبر لي زولية وزمزمية اتاي منعنع قالي ابشر والله ويدبرهن لي واروح اتكي على راس طعس هواء يرد الروح وجلسة اخر روقان تكيت لين بدت تغرب الشمس وارجع للفندق كعابي طبعا الرمل قريب من الفندق واتعشى وادخل غرفتي وانام قمت من نومة حلوة افطرت قالي اللي بالمطعم ليش ماتروح للريصاني عندهم سوق حلو طبعا مرزوكة يجونها سياح اوروبيين بالصيف يسوون حمام رملي ينفع للي عندهم مشاكل بالمفاصل خلصت فطوري والقط عفشي واحرك على الريصاني وصلت للسوق حقهم هالمدينة تشتهر بالخزف والتمر والحناء عندهم السوق ٣ ايام بالاسبوع الاحد والثلاثاء والخميس طبعا اهالي مرزوكة ومدينة ارفود يتقضون من عندهم هالمدن تابعة لاقليم الراشدية خلصت تمشية بالسوق خذت لي شوي تمر يسمونه الفكوس حسب كلام اللي شريت منه افضل تمر ونوع بالمغرب واتكل على الله الوجهة الراشدية طبعا طريقها تطلع من الريصاني وتمر ارفود وصلت الراشدية طبعا هالمدينة تحتصن اكبر واحات افريقيا اسم الواحة واحة زيز هالواحة تصدر اكبر انتاج للتمور خذت لي لفة فيها بالسيارة بس ماش ماحسيت براحة قلت بنفسي خلني اجلس بكافي واخذ واعطي مع نفسي واقرر وين اروح طلبت لي قهوة نص نص قلت ياولد شكلي بقلبها شمال شرق صوب وجدة وفعلا مزمزت على القهوة واشغل سيارتي والوجهة وجدة