يقول من نفسه جزوعه كل ماهب الشمال
الله يفرجها الامن ضاقت فجوجٍ وساع
كل ماضاقت على اللي يرتكي لام الثقال
يدري ان الله عوينه وان ذا الدنيا متاع
يامل قلب يفوح كنه بن وسط الدلال
على زمانٍ يطرح الرجال فوسط النزاع
لاتعديت الهشاش اقتادني جرفٍ هيال
ولاتعديت المدينه ماتعديت الظياع
في وجه ابوك انا دخيلك يامقابيل الليال
جنبيني من صدوفك والخيانه والخداع
أقدر اكون الداهيه وارضي مفاهيم الخيال
بس المصيبه كيف ارضي من شرب دمي وجاع
المعضله في ذا الزمن انك تحاشا لك سؤال
اجابته ماهي ترد الصاع لك مثله بصاع
وياللي تنشد عن علومي هاك حالي في مثال
وانت ياوقت الغضب احسن الي الاستماع
كن حالي حال عودٍ مارزقه الله عيال
ضاق من لوع الطمان وهو عشيق الارتفاع
كن كبده صاليٍ يزيد فيها الاشتعال
الا ذكر بإن المعزه للرجال الاجتماع
ابوي يقول الدله اللي نص واردها حثال
ماتطول وجيه عطران الشوارب والشجاع
وانا اقول ان الجبال النايفه تبقى جبال
وان صرت ذيبٍ ماتوطتك الثعاله والسباع
واحده تغنيك غير الماكل اللي من حلال
شهادة الرحمن قبل تقول للدنيا وداع
وثنتين ماتوخذ بقوة لا ولا تشرى بمال
العافيه والموت يومٍ ان غيرها يشرى ويباع
والثلاث اللي ترد الطيب عن وحيه الرجال
الفقر والدين ومرافق خبيثين الطباع
وانا احمد الله مالي مع هل الشينه مجال
دامني من صلب شيخٍ مايطيع الا يطاع
من تقرب لي شبر جيته قبل يزهم تعال
ومن تجنبني شبر جنبت انا عشرين باع

__________________
لاتسمع كل ما يقال ولا تقول كل ما تسمع.