للطير تحليقه وللحر هده
والدلو ماله فايده غير برشاه

علمٍ يحجرش بالمعاليق بده
وصاحبك حذرك لاتحده على أقصاه

وبابٍ يجيب الريح لازم تسده
من شان ما تقضي حياتك معاناه

ومن يؤتمنك بسر لا تبيح سده
و ما يقضي اللازم كثير المراواه

و لا شفت هاجوسك خشير المخده
قم وتقبل و ارفع يديك لله

واليسر بعد العسر مع كل شده
و صبرك على الشده فضيله مزاياه

للطيب وقت و للمشاريه مده
ومن ينتخي بك لاتخيب نواياه

وعلمٍ يجي مابين روحه ورده
لاتعتجل لازم تميّز بمعناه

ولاجاك رمح من العدوين صده
ترى الرخامه تهدم الصيت والجاه

من ما تغداء في عدوه وضده
ليا هدفت شمس المغيرب تعشاه

وان شفت حبلٍ منكرب لا تشده
بعض الامور تحلها بالمهاداه

و من ما احتسى للدرب بدره وعده
يطيح في دوٍ خليٍ و مضماه

وبيتٍ بلا ساس العواصف تهده
لو صار في عينك هذا زين مبناه

والطيب ورث الرجل من ورث جده
ان ما مشابه مدح جده تعداه

ومن لا يعدك محزمٍ لا تعده
وكثر المجامل قارن الذيب بالشاه

والوقت غيرالوقت مفقود جِده
كثرت سواليفه وكثرة خطاياه
منقول