الغنيمه .....
هاض الضمير وشاقني واستحبيت
ابدع بيوت الشعر وابني عمدها
فتحت صندوق الضماير وفكيت
كل القفول الي زماني وصدها
ومنّه لجزلات المثايل تنقيت
عشان في بدع البيوت اعتمدها
الشعر يالشاعر ولو به تفانيت
ينعاف دام المعرفه يفتقدها
الشبح في مغزا البيوت ان تغنّيت
لافي قوافيها ولا في عددها
لوما بدعت من المثايل سوا بيت
به فايده تنفع بها من وجدها
اخير من كثر البيوت المفاليت
لاخير لافيها ولا من قصدها
واحذر تزل المعرفه وان تحاكيت
اقنص لزينات المعاني وصدها
ولا تجيب علوم ماقد تحرّيت
عنها ترا يلزم بها من جردها
والورع والكذاب لو خبّرو (كيت)
أخبارهم حذراك تصغي لـ احدها
لو جبت منهم شاهدٍ واستدليت
شهادته ماتعتبر لو شهدها
ولا تعطي الهذار سرّك لو اعييت
ولا المره حتى لو انّك ولدها
لو تبدي اسرارك لهم جالها صيت
حتى الغريب اليا نشدته سردها
وفي طاري الغايب اذا يوم طرّيت
خل النفوس الغايبه في رغدها
لايصبح الغيّاب منك مباهيت
تاكل لحومٍ ميته في لحدها
وان بان لك في غيرك العيب وابديت
عيبه : تصيّد لك عيوب ورصدها
تراك مثله لك عيوب ان تعاميت
عنها فغيرك شافها وانتقدها
واياك عن ظلم العباد ان تبليت
نفسٍ ولا تجلب عليها نكدها
تبلا بدعوة مسلمٍ له تجنيت
يدعي بها في سجدته لو سجدها
ومن جاب لك عيب المخاليق واوحيت
هرجه لغيّاب البشر يضطهدها
قل له هبيت ويوم غابو تجرّيت
شجاعتك قدامهم تفتقدها
وان جاتك الزلّه وفيها تفاجيت
احلم ونفسك لاتخلّي رشدها
لو جالك المخطي بعذر وتغاضيت
جمالةٍٍ والنفس يجلا كمدها
وان كرر الزلّه ومنّه تشقّيت
أو جاك بالزلّه خبيث وعمدها
لقّه ردود تفتت الكبد تفتيت
وادبل بها وان طوّل الهرج زدها
خلّك عزيز ولاتجرّي الهلافيت
نسل الرخوم الّي رداها قردها
ترا عدوّك ينخذل لو تعاليت
وفعايلك تجلب لعينه رمدها
وعلى الطلاقه ثبت النفس تثبيت
بحبال عزٍ والمراجل وتدها
خلك بطيبك تنذكر حيٍ وميت
ومن يزرع امّات الجمايل حصدها
ودنياك دجها واحذر تقول ملّيت
شرّق وغرّب . دام لك ساق قدها
دروسها في كل ديره منابيت
طفها وحاول قطفها واستفدها
وانص الرجال اهل التجارب لو ازريت
تفهم صعيب الدرس واطلب مددها
تلقا بهم راي القدا كل مااشفيت
واهل التجارب تهدي الّي نشدها
والرجل مايملا يده قول (ياليت)
ومايدرك الغايات لوما طردها
غايتك لوهي في قلوب العفاريت
انزع بيدك قلوبها من جسدها
والنفس عطها شفّها لو تماديت
استمتع بدنياك واطعم شهدها
مدام راسك حي خذ مااستلذيت
وروس الحبال يحلّها من عقدها
لاخير فيمن بالمذلّه مناعيت
مات الذليل وليلته مارقدها
الذل مابه منعةٍ يوم ذلّيت
ومارد ساعات القضا عن وعدها
ولا خير في رجلٍ حياته تناهيت
يشكي ونفسه ماتبيّن جهدها
عزمه ضعيف ويرتجي مدّة مقيت
والرزق من خلف عتبه ماصعدها
ولا خير فيمن مربطه حجرة البيت
له هجدةٍ لوجيت بابه هجدها
قومٍ تصك جحورها لو تعزويت
وان فارقتها ماتعدّت بلدها
ولا خير في جاهل وله زول خرتيت
بير المراجل زلّها ماوردها
متشاغلٍ عنها بشلّة سرابيت
من شافها من خلق ربي نقدها
وشـ جاك ياوقت العنا يوم شنّيت
حربٍ ضروس ونادر الّي صمدها
حرب الجهاله طايشه لو تتقيت
لازم تنوشك بالمقادير يدها
شفت الضحايا عقبها يوم مرّيت
عقولها جرحى . سليمٍ جسدها
ومن شوفة سلوم المخاليق ضجيت
تنزف وأبر عيالها جحدها
الوقت حربه في ضياعٍ وتشتيت
لعيال من تبني الظفر في عهدها
عن سلم ابوها الّي بنا طيّب الصيت
يصدها بجيوشه الّي حشدها
عساك ياقصرٍ صمدت وتحدّيت
تبقا ملاذ نفوسنا ياسعدها
انت الوحيد الّي بقيت وتعاليت
شاهد على صبر الرجال وجلدها
نصيت رجلٍ من سباعك وناديت
باسمه واصوّت يا(سعد) يا أسدها
جاوب يبو جابر تراني تعزويت
باللي ليا منّها تشربك فردها
أنصاك يوم انّي من الوقت حسّيت
ضيقات في نفسي بعيدٍ أمدها
ان زحتها بسيف التناسي وطشيت
كل القدايم تبتليني جددها
وجيت اشتكي لك يالسنافي وحطّيت
حملٍ على متوني ثقيلٍ جهدها
وابديت لك كل الخبر واستهليت
بعض النصايح توّنا في صددها
دروس من وقتي بقلبي مناحيت
متدارجاتٍ توّها في مهدها
وابيك يوم ابدع بالابيات واصغيت
تفزع تبيّن زلّها من سددها
ماني كبير السن ويقال مرّيت
على تجاربها وماضي عهدها
لكن لوضع الناس بالعين لدّيت
وسمعت من شاف الحياه وزهدها
دنياي اراقب فعلها كل ماابديت
مشرافها وشـ عزها من مسدها
ونزلت في دارٍ ومن دار شدّيت
وعاندت ما قرّب لعيني سهدها
ياكم سنين لـ أمسها الميّت احييت
وفي يومها مسعاي واخاف غدها
واصبر لبلواها وسرت وتقاويت
والبل ما تثني ركبها غددها
وياكمّ بمزون الهموم استضليت
تبرق نكايد والمصايب رعدها
وغضّيت عيني عن بلاها وصدّيت
لو كان ترذبني بهلّة برَدها
وكم صبت من شاره وكم شاره اخطيت
وما صابته يمناي جا من ركدها
واليا ارتبشت اعليت رميي و وطّيت
دونٍ من الشارات والا بعدها
وجيت استشيرك في كلامي ولاجيت
اعلّم صقور الهدد عن هددها
إمّا تقول احسنت كفّيت وفّيت
والا تقدّم للجريحه ضمدها
وصلاة ربي عد ما اصبحت وامسيت
وعداد ما ترمي البحور بزبدها
على رسولٍ شتت الكفر تشتيت
واصنام مكّه هدّها ما عبدها
كريم سبلا .
__________________
لاتسمع كل ما يقال ولا تقول كل ما تسمع.