علي كثرو اعوان الدهر والدهر ضدي .. وذا حال من صارت ظروف الدهر ضده

تحداني الدنيا على غير ماودي .. و حبل الردا رث اذا جيت بامده

بعض الأصدقاء لا جيت باقابله صدي .. ومن كنت محتاج لوده بدى صده

ولا عاد لي غير أترك الدار واشدي .. ومن عدني والا فوالله ماعده

وصدر الفضا واسع مع الأفق ممتدي .. ومن سار في درب وصل ولو بعد مده

اليا باروا الخلان و الحظ متردي .. فلا للفتى الا يترك الدار منجده

وخلن بدل خلن وحدن بدل حدي .. وربي هو اللي يقصر العمر ويمده

تمسكت في حبل الصله وتعبت يدي .. بلا فايده والحبل ذا اليوم باهده

وباقوس ثوبي دمت حي على قدي .. و كل يفصل له ثيابٍ على قده

و من لا يسد بواجبه مات ماسدي .. ولا خير في من واجبه مات ماسده

باشد الرحال وبترك الدار من جدي .. ومن له علي فضل ومعروف يرتده

ورزقي على اللي لا عطا يجزل المدي .. و من يستعين بخالقه نال ما وده

فلا خير في من يقبل الضيم والضدي .. ويخسى الذي تقصر عن المرجله يده