كثير من الأعضاء طلبوني اكتب لهم في الخاص الأن السلبيات في منتجع " جنة الأطلس "

رغم أني كان ودي اكتبها إذا رجعت لكن حاضر راح اكتبها لكن الأن بالتفاصيل .

للأسف كنت انا من أكثر الأشخاص الي كان يمدح ويطبل للمنتجع هذا ! لكن للأسف المنتجع تغير تماماً عن السابق .

السلبيات :

_ أول ما وصلت المنتجع قادماً من أكادير ودخلت الفيلا " فيلا ٦ غرف أول فيلا على اليمين " كانت قذره بشكل كبير ! من استخدام الأشخاص السابقين وشكلهم طالعين من زمان مو اليوم ! وادخل المطبخ واحصل الخادمة والطباخه ولا كأن في شيء ابداً ! رغم ان وصولي للمنتجع كان الساعه 6 المساء وكان عندهم خبر بقدمونا يعني المفروض كل شيء يصير جاهز ونظيف لحظة قدمونا لكن ما اشتغلوا الا يوم وصلنا ! .

_ قبل لا أوصل المنتجع بيومين كلمت الي حجزت من عنده المنتجع " رضوان " ويبدو لي انه هو أحد ملاك المنتجع للأسف !
المهم بلغته بوصولي خلال يومين ان شاء الله وطلبت منه أن كل " السفتي بوكس " بكل الغرف يكون جاهز وشغال مو مثل المره الي راحت ! طبعاً وعدني وعطاني من هالكلام الحلو وأول ما وصلت المنتجع مافي الا سفتي بوكس واحد شغال بس والبقية عطلانة !!!!! وجلسنا كم يوم على ما جابوها .

_ الكهرب والماء ( المصيبة الكبرى ) انقطاع بشكل يومي في النهار فقط بمعدل ساعتين يومياً من الساعه 10 الى الساعه 12 ، طبعاا من كثر ما تهاوشت مع هذا الي يسمونه " رضوان " ما صار يرد علي ابداً لأن على كلامهم الموضوع خارج عن ارادتهم من شركة الماء والكهرب !!!!!!
طبعاً يا مالك بتسلك وانت بالمغرب ، لكن الي خلاني نصبر على هالمصيبة ان الجو ممتاز حالياً وكنت نقدر نستغني كم ساعه عن المكيف والماء اغلبنا نايم هالوقت وما يستخدمونه
طبعاً هذا الي خلاني نصبر ، ولا لو احنا بالصيف كان علوم .

هذا سابع يوم بالمنتجع والانقطاع ما زال مستمر .


- المويه الحاره انقطعت من الحمامات من ثالث يوم ! واضطرينا نأخذ شور بمويه بارده في هالجو البارد كم يوم على ما يصلحون السخانات .

احلوا لنا المشكلة بعد ٣ ايام !


- الخادمة والطباخة كانوا أقل بكثير مستوى من السابقين ، كنت مأمل أحصل الي كانوا موجودين معنا بأخر سفره اعتقد اسمها ام حبيبه الله يذكرها بالخير .

على العموم الطباخه حالياً مش سيئة لكن صار موقف امس خلانا نكون حذرين منها ، قالت لنا ان اليوم راح اطبخ العشاء وأن اللحم راح اطبخه كله لان ما بقى الا شيء قليل ! قلنا اوك رغم اننا شكينا شوي لأننا جايبين كمية كبيره ، لكن احسنا النية وقلنا شكلنا ادينا بالأكل .

يوم جينا من السهره اليوم ما ادري وش خلاني افتح الفريزر واحصل لحم يكفي اسبوع ! وقلت باتفاهم معهم من بكره .


الايجابيات :

- البوابين جداً محترمين وتعاملهم ممتاز واجواء المنتجع جداً جميلة خصوصاً الحديقة تكون كبيره مره ومهتمين بتنسيقها مع المسبح ، قليل تحصلها في اغلب المنتجعات ان الحديقة تكون جداً كبيرة ، ايضاً غرف النوم ونظافة الفرش كانت ممتازه ، رغم أن كل الغرف بالمنتجع ما كانت بنفس المستوى يعني راح تحصل غرفة أقل مستوى من غرفة.

نصيحة :

إذا كنت بالفعل حاجز بالمنتجع لا تعطيهم باقي المبلغ إلا لما تتأكد ان كل شيء سليم لحظة وصولك : حمامات والاضاءات والسفتي بوكس ومويه حاره ..الخ

انا كنت واثق فيهم للأسف ودفعت على طول من تجربة سابقة لكن للأسف كنت غلطان وغلطان مرررره .


ختاماً :
اعتذر عن الاطالة وطبعاً راح تكون هذي الزيارة الأخيره للمنتجع اكيد ومالها عوده وإذا كنت انا ظالم المنتجع انا مستعد تحطوني في مكالمة جماعية تحت اشراف ادارة المنتدى مع مديرهم " رضوان " مع اني اعتقد بيشوف رقمي ولا راح يرد هههههههههههه



الحمدلله يا رب الأمور كلها تمام وموفقه رغم المشكلات في المنتجع ، إن شاء الله وصولي يوم السبت لأرض الوطن وأول حلقات التقرير بتكون يوم الأحد القادم ان شاء الله .

تحياتي ...