بالبدايه وقبل لا أبدا التقرير طبعا تقريري هذا مختلف كليا عن تقاريري السابقهـ لما فيه من مغامرات وأحداث كثيرهـ وببتعد عن التكلم برسميه وبكون على طبيعتي طبعا في امور لاحقهـ بالتقرير ممكن الاغلب مايتقبلها واحداثها بس كل شخص بالحياه له نمط معين وتفكير معين فدائما توجد اختلافات بالافكار والاراء .
(الجزء الأول)
(( ماقبل السفر))
بعد رجوعي من سفرتي الثانيهـ من المغرب بتاريخ 2016/11 جلست بيني وبين نفسي أفكر طبعا قبلها مستبعد نهائيا فكره أني أتزوج سواء من السعوديه او الخارج يعني ماني متهيأ من جميع النواحي وعمري صار بالثلاثين فقلت يامحمد من اربعه شهور رحت المغرب مرتين كذا الوضع ماينفع ومرات أقول وش اللي خلاني أروح المغرب وأفتح لنفسي باب أنا في غنى عنه وبعد تفكير طلعت بثلاث خيارات:-
١:- أني أكون سردادي مردادي على المغرب وأجلس عزوبي ( أستبعدت هذا الخيار).
٢::- أتزوج من السعوديه وأكون رايح جاي على المغرب وهنا فيها ظلم للزوجه المسكينه ( أستبعدت هذا الخيار).
٣:- أتزوج من المغرب وأكون كذا ضربت عصفورين بحجر منها تزوجت مغربيه ونفس الوقت أروح للمغرب دايم ( قلت بس هذا هو الحل) .
أول شي سويته قلت أبدا بالسليم وأطلع أوراق رسميه وتصريح زواج وأجرب حظي بيطلعلي التصريح ولا بينرفض طلبي مثل أغلب الناس بديت أسال عن الطلبات وشفت الشروط وأنطبقت علي وجمعت الاوراق وقدمتها أنا حطيت ببالي بيجيني الرد مو اقل من سنه ياقبول يارفض
جلست شهرين بعدها سافرت المغرب بتاريخ 2017/2 رجعت من السفر بعدها بااسبوعين طلعلي التصريح كان شعوري وقتها فرح على بسطه على أستغراب انه طلعلي بدري .
الحين التصريح وطلع جينا للمغامره الثانيه كيف تقنع الاهل طبعا عانيت جدا جدا جدا جدا في أقناعهم جلست شهور وتمت بحمد لله .
حاليا نص المهمه قطعتها باقي الاهم اللي هي الزوجه كيف ووين ووو بدات بالمقربين مني والاصدقاء اللي متزوجين او تربطهم علاقه بالمغرب ويعرفوا ناس متزوجين
طلعت بعده عوايل تحسبا للظروف .
(( الأستعداد للسفر))
قبل موعد السفر تقريبا بعشر أيام تاكدت من جميع الاوراق اللي تخص الزواج ولما تاكدت انها كامله بعدها حجزت على الخطوط السعوديه من تاريخ 2017/10/14 الى 2017/11/17 وكان في عرض جميل بسعر (( 1415 ريال سعودي)) وخط سير الرحلهـ:-
الذهاب/ عرعر- الرياض - كازا
العوده/ كازا - جده - عرعر
الحجز خلصته.
الاجازه من العمل :/
طبعا وقتها بحكم الزواج والاجراءات في المغرب كنت محتاج أقل شي شهر عشان ارتب أموري دخلت على مديري بالعمل وأقدم أجازه 35 يوم قالي هالمره الاجازه طويله وش عندك قلتله مسافر المغرب قالي لاتقولها لايكون مسحور هذي رابع مره بالسنه ضحكت انا قلتله لاسحر ولا شي رايح عندي امور بخلصها ضحك وقع على الاجازه قلتله احتمال اتصل عليك واخذ شهر او شهرين زياده ضحك وانا ضحكت قالي خذ راحتك ماعندك مشكله توصل وترجع بالسلامهـ.
بعد ماخلصت تقضيت لي بعض الشغلات من (( ملابس تكرمون أحذيه عطور ساعه تمور بخور واغراض من الصيدليه وامور اخرى)).
جلست واقول حاليا الامور تمام وخلصت من هالشغلات:-
١:/ اقناع الاهل.
٢:/ تصريح الزواج والاوراق.
٣:/ اجازه من العمل.
٤:/ تذاكر طيران.
٥:/ مستلزمات السفر.
٦:/ الامور الماديهـ

الحين جاهز ومستعد نفسيا ومعنويا وماديا للسفر الى المملكه المغربيه بس من وين ابدا اي مدينه وكيف والوقت محسوب علي ووووو بالجزء القادم
دمتم بود