صراحه أحترت من وين أبدا بس ببدا تدريجيا عن المغرب بشكل عام:-
١- المغرب بلد جميل وعن نفسي أحس براحه نفسيه وانا بالمغرب طبعا أنا من عشاق كازا وزرت خلال رحلاتي كلها عشرين مدينه وبعد زيارتي الأخيره اذا ربي عطاني عمر وزرت المغرب بتكون الوجهه الشمال (( طنجه وتطوان وشفشاون ومارتيل)) هالمدن جميله وراقيه ورايقه وناسها طيبين وتعامل حلو أرتحت فيها كثير .
٢:- المغرب ياأخوان رخيصه اذا كانت سياحتك نظيفه ماتكلفك شي اما اذا فيها كذا وكذا لا تكلف ونص .
٣:- تعامل الشعب بصفه عامه جميل وحلو الا بعض التصرفات الفرديه وهذي تحصل بكل الدول يعني اذا صارلك موقف معين لاتخليه ياثر عليك ويغير نظرتك للبلد.
٤:- في أمور تتطلب حزم وقوه للاسف بعضهم يستغلوا الطيبه هناك ويفهموها غلط انها سذاجه وغباء.
٥:- جينا لزبده الموضوع عن الزواج:-
احنا كسعوديين او خليجيين بشكل عام محافظين مو الكل بس الاغلب والناس تختلف بعقلياتهم وتفكيرهم بس اتكلم بشكل عام والزواج بالاول والاخير توافيق من رب العالمين ونصيب بالنسبه للزواج من الخارج بشكل عام والمغرب خصوصا كل شخص له الحريه يختار مين او الطريقه اللي يبي يسلك فيها طريقه ويتخذها بس بوضح بعض النقاط بشكل عام وفكر فيها قبل لاتفكر انك تتزوج من الخارج وليس معنى كلامي هذا تنفير او ضد لا بس احسب حسابك وحط احتياطك لكل شي :-
١:- اختلاف عادات وتقاليد:-
المغرب دوله اسلاميه وبحكم الاستعمار سابقا صار فيه تاثير بالمجتمع وانفتاح واختلاط ابتداء من المدارس الى العمل الى كل شي يعني الاختلاط توارث من جيل الى جيل ولا يعني ذلك اننا ننقص من اخلاقهم او تربيتهم اذا كان عندك هالشي عادي ومتقبله وماتفرق معاك بيناسبك الوضع طبعا كلامي هذا لاني تعايشت معاهم سواء كان بالاماكن اللي زرتها ودخلت بيوت كثيره وجلست وشفت بعيوني يعني هم شي عادي عندهم والكل محترم نفسه وعارف حدوده وبما انه حنا مجمتع مختلف كليا عن هالامور ممكن لما تتعمق تتغير نظرتك مجرد اختلاف عادات وتقاليد.
٢:- اذا جزمت وصملت للزواج بقولك شغله قصه انك تروح تشوف بنفسك وتدور وووو ماينفع هالكلام اذا كنت فعلا تبي تختار من بيت طيب ياانك تعرف حد من عائلتك متزوج ويزكي لك عائله وبعدها تشوف وضعك مع البنت واهلها وفوق هذا كله اسال عليها اما اللي عادي عنده انه كون علاقه مع بنت ويبي يتزوجها على طول هذا شي ثاني .
٣:- فكر فيها من ناحيه اقتصاديه اذا وضعك المادي لك عليه ماانصحك تتزوج اذا مرتاح وعندك قدره ماديه توكل على الله الموضوع بيكون بعد الزواج فيه ارتباط بينك وبين المغرب وروحات مع زوجتك ومصاريف وتذاكر وطبعا هدايا لاهلها ومصاريفك هناك احسب حساب لكل شي لانك لما تتزوج من حقها هي تزور اهلها وشي طبيعي مارح تقطع صله الرحم بينها وبين اهلها احسب حسابك وخل جيبك جاهز لكل وقت .
٤:- اهم نقطه قبل لاتفكر بالكلام اللي قلته فوق ركز معي لاتفكر بنفسك ورغبتك فكر مستقبلا اذا جاك اولاود اعرف انهم نصهم سعودي ونصهم مغربي يعني بيكون في تاثير
من كل ناحيه ولازم تكون متقبل لكل شي وجميع الحالات وشي طبيعي الام نصيبها اكبر واكثر في التربيه الاولاود وبيكونوا ماخذين منك ومنها كعادات وتقاليد.
وبالنهايه
الشعب المغربي بشكل عام طيبين واخواننا بالاسلام الله يوفق الجميع ويكتب لكم اللي فيه كل خير
واسف اذا طولت عليكم بالتقرير العذر والسموحه.
اخوكم المحب/
محمد
دمتم بود