اليوم من الصبح قاعد وأفكر بيك
انا إبتليت بعشق وأدعي الله هم يبليك
وهم مثلي تصحى الصبح ماتعرف انت شبيك
متورط بهالعشق من رأسك لرجليك
أعترف كله كذب لو قلت أنا ناسيك
شنسى شفايف عنب وطولك نبع ريحان
مملوح كلك ملح وعيون كالغزلان
والشعر فوق المتن نازل على الرمان
زرر قميصك عدل لا ينفجر بركان
تعبان واحنا سوى ولو نفترق تعبان
اليوم من الصبح قاعد وكلي جروح
مليون فكرة تجي ومليون فكرة تروح
مو قلبي وحده إنجرح كلي أحس مجروح
أختنق وأتنفسك وترجع ترد الروح
ما متت بعدك أنا بس عايش ومذبوح