حكايات كويتي ... في بلاد الزعطه
نكمل معاكم الحلقه الثانيه من مواقف المغرب واللي تتعلق هالمره بتأجير السيارات
وصلت مطار كازا بروحي وهالمره ومن سوء التدبير اني قررت اغير المكتب اللي اتعامل معاه بسبب فرق في السعر خمسين درهم ... استأجرت السياره من شخص عند الباب ولاني تعبان ومستعجل لم ادقق بالعقد ولم اتاكد من وجود مكتب
المهم وقعت العقد وقالي صاحب السياره اذا ممكن توصلني علي طريقك منطقه قريبه جدا من المطار ... المهم قلتله حياك وقالي انا راح اسوق لان الطريق زراعي وانا ادل وعشان ماترهق نفسك قلت اتفضل
وفعلا تولي القياده الاخ النكبه وبنص الطريق حدث مشهد من مشاهد الافلام المصريه
سياره مرسيدس قديمه فيها اثنين بحجم الثيران واجبرونا علي الوقوف بجانب الطريق ونزلوا صاحبنا وارتفع الصوت بينهم وانا اراقب المشهد من دون تدخل وعندما حاولت الاستفسار اخبرني صاحبنا ان الموضوع شخصي لكن بعد دقايق شاهدت صاحبنا تحت الضرب واللكم واللي يحب النبي يضرب
وهنا اخذ صاحبنا يصرخ ويقول لي العقد معاك والسياره تحتك روح ومالك شغل باحد وللامانه لم يكن صاحبنا بالسهل فقد كانت معركه حاميه اخذوا هم نصيبهم منها
المهم اخذت السياره وحركت ودوخه بين المزارع حتي وصلت الطريق السيار لاغادير وهناك وبعد نوم عميق بعد تعب السفر والمشكله اللي حصلت بدت مشاكل السياره يوم كفر مبنشر ويوم ثاني البطاريه
والمشكله كانت بعقد الايجار حيث وقفني رجل مرور واحتار بالعقد وحتي اوراق السياره مومضبوطه ... المهم كانت سفره منيله بستين نيله... رجعت المطار وقبل ما اسلم السياره كنت عند صديقي اللي دايما استأجر منه شافني وضحك وقال شلون تخليني وتستأجر سياره من شخص مشبوه... قلت لحظه انت شدراك قال حنا اصحاب كار واحد ونعرف مشاكلنا ... وراح اقولك شنو المشكله اللي احصلت معاك
الشخص اللي اجرلك السياره موصاحب مكتب والعقد اي كلام لانها سيارته الخاصه وهو متعود يسرق الزباين من اصحاب المكاتب اللي يدفعون اجارات والاخ هذا يخرب عليهم رزقهم
والسياره اللي الحقتك وامسكوه بالجرم المشهود هذولا اصحاب مكتب ... وطبعا تدخلت الشرطه بينهم والحين انت الشاهد
قلت طلعني منها طيارتي بعد شوي
والحمدالله كلمنا صاحب السياره وكان وجهه مشخبط من الطق واستلم السياره وفكنا الل منه ومن شره
الخلاصه خلك نظامي وارتاح بالذات السياره والسكن وسلامتكم