وأنا مثلك في آخر اربع سنوات ما اسافر الا مع الخطوط السعودية ، والصراحة تطورت كثير اصبحت طائراتها احدث وخدمتها افضل ..
لكن قبل 3 شهور وتحديداً في يناير الماضي حجزت فيها أنا وصاحبي رحلة من الرياض إلى كازا ، المهم رحنا للمطار ووصلنا قبل موعد الرحلة بأكثر من ثلاث ساعات وسلمنا شناطنا واستلمنا البوردنغ واعتقد أننا اول من سلّم شناطه في تلك الرحلة وكان كل شي تمام وختّمنا الجوازات ودخلنا داخل المطار ، وبما أن كان عندنا متسع من الوقت رحنا صلينا وبعدها تغدينا وتقهوينا وكل فترة نشيّك على شاشات المطار علشان نعرف في أي بوابة رحلتنا لأنها غير مكتوبة في البوردنغ ، المهم يوم قرب موعد الاقلاع رحنا أنا وصاحبي لغرفة التدخين وأخذتنا السواليف وكان صاحبي كل شوي يقولي خلنا نروح نشوف وش صار على الرحلة وأنا اطمئنه واقول يارجال لو البوابة مفتوحة كان اعلنوا بمكبرات الصوت ، وجلسنا ندخن ونسولف والنفسية عاااال العاااال ( طبيعي بما إنك رايح هناك ههههه ) ، بعد ما خلصنا وطلعنا من غرفة التدخين رحنا نشوف الشاشة والحمد لله حصلناهم حددوا رقم البوابة عندها اطلقنا ساقينا للريح وانطلقنا للبوابة ولما قربنا منها أشوفها من بعيد فاضية وما فيها أحد وجلست اعاتب صاحبي واقول ليتنا ما طلعنا من غرفة التدخين ، ولما وصلنا البوابة لقينا عندها موظف تابع للخطوط السعودية واعطيناه البوردنغ وكانت ابتسامتنا واصله اضراسنا قال على وين يا شباب ؟ قلنا كازا طبعاً ، قال وينكم من فتحنا البوابات وركبوا كل المسافرين ونادينا بالمكبرات وحتى نادينا داخل غرف التدخين ! قلنا والله ما سمعناكم ولاشي وأنتم اساساً ما حددتوا رقم البوابة الا آخر شي ، قال الموظف اسمحوا لي موضوع إننا تفتح لكم البوابة استحااااالة وقال علشان تيئسوا فعلاً شوفوهم الحين جالسين ينزلوا شناطكم من الطائرة وفعلاً لما طلّيت من زجاج صالة المطار واحصّلهم منزلين شنطتي ! وفي خضّم هذا النقاش تجمع حولنا تقريبا 18 مسافر كلهم نفس وضعنا !!
انقهرنا وتنكدنا وقلبت افراحنا اتراح وتحولت ابتسامتنا لعبوس واللي زادنا قهر أن فلوس التذكرة راحت علينا ..
بعدها أنا وصاحبي قلنا والله ما نرجع من المطار لو نحجز على الطيران الأثيوبي والحمد لله حصلنا حجز على الطيران المصري بعد 12 ساعة من رحلتنا الملغاة .
ما يُستفاد من القصة ( احرصوا يا شباب على إنكم تكونوا عند بوابة الرحلة قبل 45 دقيقة من موعد الإقلاع التدخين لاحقين عليه ههههههههه )