وعليكم السلام والرحمة
درجة الحرارة حالياً في مراكش في النهار 36 وفي الليل 23، بالراحة على وقتك توصل 40
المسافة بين طنجة ومراكش تقريباً 600 كلم
المسافة بين كازا وطنجة تقريباً 350 كلم
المسافة بين مراكش وكازا 250 كلم
المسافة بين مراكش واغادير 260 كلم
المسافة بين كازا وأغادير 460 كلم

مفروض كان حجزت على كازا، تجلس فيها ومنها تطلع لطنجة والشمال تطوان وشفشاون، وترجع لكازا.

اذا انت راعي خطوط وما يمديك تغيير الحجز، فالله يقويك، خطتك زينة بس اذا رجعت مراكش لا تجلس فيها اسبوع حر، رح تبرد في اغادير كم يوم.

والحل الأسهل إنك تستبدل طنجة بأغادير، يعني بتوصل مراكش تجلس فيها يومين، ثمن تروح كازا 5 ايام، ثمن تروح اغادير 4 ايام، ثمن ترجع مراكش 3 ايام.

بالنسبة لميزانيتك 20 الف ريال يعني اكثر شوي من 50 الف درهم، يعني يوميتك 3570 درهم.
حط في بالك ايجار سيارة النترا ب350 درهم تقريباً، جيب سنتافي هيونداي ب 600 درهم.
بالنسبة للفنادق النظيفة فيه ب500 درهم وفيه ب2500 درهم، يعني متوسطها 1500 درهم.
يعني لو اجرت النترا 350 وسكنت ب1500 درهم هذي 1850 درهم يبقى معك من اليومية 1720 درهم تكفيك بالراحة اذا وازنتها.
وفي رأي دام معك زوجتك ماله داعي تفتح حساب، خلي الفلوس معك كاش وحول العملة كل ما احتجت.

الفنادق احجز من البوكينج واعتمد على التقييم بالدرجة الأولى، ثمن الموقع والإطلالة ثمن السعر، حاول يكون مجموع الليالي متوسط الليلة الوحدة 1500 درهم عشان تضبط ميزانيتك.

وبالتوفيق.