وصلت طنجة الصبح وأول النهار واستلمت سيارة من المطار هيونداي i20 جديدة ومطوره ب400 درهم اليوم ولكن وقعت بمشكله التامين .
المطلوب خمسة آلاف درهم أو رهن الباسبورت .
فكرت وشاورت ورسى الراي اعطيهم الباسبورت لو عطيتهم فلوس أكلوها بفلم يصدع الرأس لكن الباسبورت مايؤكل .
انطلقت من المطار الى باركن ماكدونالدز على البحر والكورنيش وقفت السيارة بالباركن ودقائق حتى وصل راعي الشقة يسلمني إياها وإذا بعمال الباركن مكلبشين عجلة السيارة بالقفل .
وادفع غرامة خمسين درهم ويحلونها وكان عليه دفع أربعة دراهم للآلة المعدنية والحصول على كرت أضعه على طبلون السيارة بشكل واضح .
مشيت لشقه ادور النوم والعالم هنا فائقه توها ليوم جديد كفاك الله شره .
استلمت الشقة غرفتين وصالون ومطبخ وحمام وشقة فخمة خمس نجوم جديدةوأعطيتهم فلوسهم اليوم ب750 درهم وقفلت الباب وعلى السرير مااشوف اللي قدامي.
وإذا بالباب يطرق قمت فتحت إذا هو المدير العام للعمارة ويملي عليه شروط وتعليمات وبعد ماسكت قلت انا طلبت شي تكلمت قلت شي تبي شي .
واقفل الباب وارجع انام للمغرب .
واصحى واتجهز للخروج وأقرب سوق كارفور وأحلى مطعم بالطابق العلوي واتغدى واتقهوى .
واشتري بعض الأغراض من السوق وعلى الشقة انزلها وأنادي مالك العمارة واقلطه لصالون وأعطيه كلام طيب وتوصلت معه الى حل يرضينا جميعاً والحقيقة اشكره على تفهمه وقبوله لاستقبال ضيوف .واطلع للكورنيش اتفسح على البحر بسيارة وبعدها أوقفها بالباركن . وانطلق على الأقدام والجو بارد في طنجة وشفت كثير لابسين لبس شتوي .
بعد منتصف الليل رجعت الشقة استعداد لسهرة في سكاي طنجة وقررت اترك السيارة وأركب تاكسي
قلت له بكم قال ثلاثين درهم وأركب وعندما وصلت عطيته خمسين درهم زيادة هدية عشان اسلوبه الفكاهي رغم انه تكلم بما لايعنيه لكن أسلوبه طيب.
دخلت سكاي واطلالته الزجاجية على البحر ومكان راقي وفخم ويحتوي على أجنحه وفئات .
جلست انا على طاولة مع الوسط وطلبت طلبات وحاسبتها كل طلب ب80 درهم و بعد ماانتهت السهرة خرجت وأخذت تاكسي ما اتفقت على الثمن وعند الوصول لسكن أعطيته أربعين درهم اخذها وراح .
الحقيقه اجمل مدينه بالمغرب هي طنجة وافضل مدينه رايتها .
ندمت اني ماقضيت فيها اكثر الأيام ومن الصعب عدم العودة لاكادير لان العودة لسعودية ضروري من مطار المسيرة اكادير .
اعجبني جو طنجة البارد وجمالها وروعتها .
وحدائقها وشوارعها وخدماتها وبحرها ومحيطها وكل شي فيها جميل .
وحتى المأكولات البحرية الأسماك أطيب وأحسن سمك لقيته في طنجة .ومن المطاعم النقيه واكلها لذيذ مطعم النجمة . وفيه مطاعم على طريق القصر الصغير لكن لوحاتها مكتوبه بلغة أعجمية ماحفظتها لكن اعرف مكانها جيداً كررت الذهاب اليها عدة مرات .
هناك التسول والتصرف الغير لائق عند ماكدونالدز والكورنيش استغرب من الأمن ساكت عنهم ليتهم عشرة ولا عشرين لكن كثيرين .

اغلب الديسكوهات بطنجة مااعجبتني خصوصا اللي على الكورنيش الشمالي
حتى الحضور بالسهرة عادي واقل .


لكن بالأماكن العامة والكورنيش شفت جمال خورافي من الاخر لكن صعب التفاهم والتواصل بسهوله من غثاء الناس بالمكان .

لكن يكفيني نظر ماوراها الجميلةوالفاتنه الا بقعا وصكاتها.
أربعة ايام قضيتها في طنجة وأطرافها ورجعت رحلة طيران لاكادير وخاطري طيب من طنجة وهي بالذات اكثر جاذبيه وشوقاً لها بالجايات بعد الذي رايته وحصلته فيها والذين تعرفت عليهم .

وصلت اكادير الساعة السابعة مساء وكان في استقبالي سايق من طرف مكتب السكن وانطلقت معه الى العمارة واستلمت الشقة بسعر 600 درهم لليوم .
اترككم مع هذا الجزء من التقرير واراكم على خير

__________________
ليت لي من عناء البعد راحه
يابهجة الخاطر وكثر الأمنيات