السلام عليكم ورحمه الله وبركاته
مساء او صباح الخير على الجميع
أتمنى ان تكونوا بأتم الصحه والعافيه
كعادتي بالسفر تمسك معاي مرات السفره قبلها بيوم وهذا اللي صار وأنا جالس مع خويي في مقهى بمدينه الخبر بالمنطقة الشرقيه وأنا جالس أسولف مع خويي اقوله طفشان ويبي لها سفره وكان مابقى الا أسبوع وتنتهي اجازتي والله وبنص السوالف تمسك معي الا أكون بكره مسافر بااي طريقه وعشان ابدا للرحله سويت اهم اتصال وقتها لخويي بالعمل انه يمدد لي الإجازة أسبوع وبعد مااخذت الاوكي.
عدلت جلستي بالكوفي وجلست أقول لخويي وين اروح دوله مسموح يسافروا لها السعودين بدون فيزا جلست اقلبها تركيا رحتها مرتين ومالي كم شهر من جيت والمغرب زرتها خمس مرات خلال سنتين تقريبا وكنت جاي منها من سته شهور ولزوم التغيير جت في بالي جورجيا واذربيجان بس حسيتها مو وقتها كنت محتاج لدوله فيها جزر وشواطئ بمعنى اصح رحله استجمام وريلاكس وأنا اسولف مع خويي وين وماوين إلى قالي عليك بتايلند واعطيه هذيك النظره مع الابتسامه وأقوله كيف ماكيف وممنوعه ومن هالكلام قالي توكل على الله وموضوع المنع بسيط كنت وقتها محتاج بس تعزيز ومسكت على تايلند واشيك على الحجوزات لقيت رحله بعد عشر ساعات من مطار البحرين إلى بانكوك مباشره الذهاب يوم الاثنين 2019/8/26والعوده2019/09/5 بسعر 1850 ريال سعودي على طيران الخليج وعلى طول من شفت الرحله احجز وأسلم على صاحبي وأروح البيت وأسلم على الأهل وارتب الشنطه وعينك ماتشوف الا مطار البحرين.