رحلتي لا اغادير بالتفصيل تقرير من يوم 28 ابريل 2012 + شكرا من القلب محمد عاطي+ملاحظه مشاركه رقم 40

ستارة · 2012-04-30T04:04:48+00:00

من لا يشكر الناس لا يشكر الله ممن القلب الى الاخ الكريم محمد عاطي اول شي اللي زعلني ما قمت بامقابله الاخ محمد والتشرف بمعرفته تم الاتصال على الاخ محمد يوم 18 /4 واخبرته عن موعد وصولي كنت راح اروح لوحدي يوم الاربعاء يوم 28 الى الحبيبه اغادير وصاحبي يوم الخميس 29 اتصلت على الاخ محمد وعمل اللازم كما اريد مشكور في يوم الاثنين بتاريخ 26 جد جديد صاحب ثالث قال بروح معك والله وحصلنا له حجز على رحلتي الاربعاء قصينا التذكره اتصلت على الاخ محمد وكنت في غايه الحرج منه يوم الثلاثاء لتعديل الحجز الا انه برحابه صدره عمل لي ما اريد حجز غرفتين وصاله بدايه من وصولنا ليل الاربعاء وحجز غرفه وصاله بدايه من يوم الخميس لصاحبي اللي بيجي وصلنا ولله الحمد للمعشوقه اغادير بجو لطييف مصحوب بزخات المطر القليله في مطار اغادير ركبنا مع التاكسي ووصلنا الى مارينا دخلنا على الرسيبشن وقلنا له لدينا حجز كذا وكذا قال اوكي 5 دقايق وتدخلون الغرف بس نعتذر منك مافيه الا غرفه وصاله وغرفه وصاله مافيه غرفتين وصاله حقيقه كدرنا الموضوع وبنفس الوقت التمست عذر لاخوي محمد مابلغته الا الثلاثاء وبعد قلت احسن عشان خويي اللي بيجي الخميس مايجلس الحاله نصير كل واحد بغرفه وبعد اني جاي ما ابي اكدر خاطري بشي ابي انبسط في معشوقتي اغ*ادير رحنا الغرفه كانت الساعه 12 ونص تسبحنا وبدت الرحله ذهبنا الى الامراء اقرب مكان للمارينا فاتح كان 1 ونص الوقت دخلنا وجلسنا نتقهوى يمكن نص ساعه وقلت لخويي نروح مخيطو مشينا ورحنا مخيطو وجلسنا فيه الين الساعه 3 وقت ماسكر خويي قال انا تعبان بروح الغرفه قلت الله معك انا بروح الكازار اتقهوى فيه واذا سكر بجيك رحت الكازار وجلست اتقهوى مع الشيشه الين قالوا يالحبيب ضف اغراضك اتكلت على الله ورحت ودخلت وكمل قهوه في الفندق الين 8 نمت الين تقريب 12 الظهر صحيت لاكلم السواق يجيب صاحبي من المطار موعد وصوله 2 اتكل على الله وانا قمت ورحت اتمشى واخذ اغراض من المرجان رجعت ووقفت عند المويد واخذ لكم هذيك الشوربه الكريمه بالدجاج يحبها قلوبكم تلين البطن واتغداء واروح يا حبايبي لمقهى دريمز اه يادريمز عاد الشباب اللي يشتغلون هناك لي معهم ذكريات في سفراتي السابقه قلت لهم جيبوا لي شيشه مزبوطه ولا توصي حريص بدريمز وجيبوا لي قهوة واجلس الا جاء صاحبي وصل بالسلامه واتصل علي صاحبي الراقد وجاني وجلسنا نضحك وننبسط ونرتب امورنا طلعنا نتفسح ونشوف الشباب وش علومهم وامورهم المهم رحنا المارينا خذ صاحبنا اللي جا اليوم غرفته ورحنا غرفتي وحلفت عليهم السهر بغرفتي كريم شرايكم فيني جلسنا تسامرنا اتصلت على السواق يجيب لزوم الجلسه شبينا الفحم صلحنا الشيش تقهوينا الين جت الساعه 10 يالله كل واحد يضف نفسه نتسبح بروح لمخيطوا رحنا مخيطو خذنا طاوله بقهوتها وجلسنا نردح مع الرادحين الين جت 3 ( والتلفزيون يشتغل انتبهوا هاه ) طلعنا ورحنا سهرنا بالغرفه طربانين ومسفهلين الين جت 9 ونمنا الين الساعه2 وبدا يوم جديد رحنا يالربع وخذنا لكم شوربه وطواجن وهالاشياء اللي يحبها قلوبكم من مطعم ( تراني جلست خمس دقايق ابي اذكر اسمه ولا ذكرته ) عموما ولا لكم بالطويله هو جنب المويد بصفته وخلصنا وقلنا نروح ناخذ لنا اتاي من دريمز ونشيش ونسمر هناك جلسنا فيه الين الساعه 7 الين الطواجن والشوربه راحت تهضمت قلنا نروح البحر نغطس رجولنا الله يكرمكم بها الليل كننا مهابيل ونجلس نتراشق بالماء حول النص ساعه بااااارد الله يكفي الشر بس سعوديين مخبل طلعنا رحنا المارينا ودخلنا الغرفه وجلسن نتقهوى الين جت عشر ونفس الحكايه دش سريع ولبس على مخيطو اه يا مخيطوا على قوله الشاعر المتنبي وما مخيطوا الا للصدر شارحو ههههههههه لا تصدقون شطحة ونتهزهز وننبسط ونضحك وخلصنا يوم سكر طبعا اخوكم اول واحد يجي واخر واحد يطلع كني ام العروس ههههههه طلعنا وقلنا لنذهب الى صحارى نكمل هناك رحنا لصحارى والديجيه اللي فيه تعرفون اللي يقول يجيب راسك يعني يجيبه ونفلها الين جت الساعه ال6 ويجي السواق ونروح الى الشقه ونكمل سهرتنا والتلفزيون شغال هاه ادري فيكم بتقولون اذيتنا بتلفزيونك هههههه بس صبر صبر جايكم ونطلب من مطعمهم بيتزا ااااه يازين بيتزتهم تهبل انصحكم بها جلسنا الين تقريبا 12 الا جاني اتصال من شخص عزيز علي تعرفت علي في رحلتي السابقه با اغادير يبي مني شغله يوم دق الا يسمع الطرب والهيصه قال ذكرتني ايام اغادير قلت انا هناك جعلي فدى لك قال يالخاين تروح ماتقولي قدمت له اعتذاري بخجل شديد وبنفس الوقت تحسفت اني نسيته لان خوته تنشرى شرواكم ودعني على امل لقاء قريب بعدهم طرت اللي عندي قلت يالله غرفكم نرقد كلنا ضف نفسه وعفشه معه وخلدنا للنوم طبعا شوي فصحه شوي عامي عشان اعلمكم اني اعرف هههههه المهم جت الساعه 4 صحينا من النوم ماتلاحظون اننا كل يوم يزيد النوم بس لام الله من لامنا ديره تشرح الخاطر مابي اقول اكثر لانه بتخنقني العبره صحينا ورحنا نتغداء وننبسط مثل كل يوم بدريم بتقولون ليه دريم اللي سبق راح له بيعرف ليه كل يوم فيه واللي ماراح له يروح وبيجيه هوس دريمي طبعا دريم هذا ياشباب للي مايعرفه مقهى ع البحر مرتفع فوق شوي وانت جالس فيه تشوف البحر خلصنا من دريم وقلنا شباب حمام مغربي ومساج رحنا وسوينه في فندق اماديل مع اني ما انصح فيه اللي في الشوارع احسن خلصنا ويجيكم هاك الاتاي اللي يسرسب بمعدتك الخاويه بعد الجهد طلعني نتلاصف او نلق او نلمع قل ماتشاء رحنا السوق اللي في المارينا ناخذ لبس لان الجو بارد صراحه ولا خذنا احتياطنا خذنا اغراضنا ورحنا للشقه ودخلنا والتلفزيون شغال على روتانا من جينا ياليلك انت وتلفزيونك ادري تقولونها بس صبر وجلسنا نتقهوى ونتبادل الاحاديث مع الشيشه وسعه الصدر ووين نروح اليوم وهيك يوم جت ال10 والله ونطلع نروح لماكدونالد حسينا بالجوع قلنا خل نتمشى بدون سياره والله ونتمشى لابسين زين ومتدفين بالقهوة رحنا وجلسنا ناكل وقلنا يالله لمخيطوا وتذكرت مقوله عنتره في مخيطو لما قال يا مخيطوا تزين بالمغاتير وكفاك ان عبله منكا ههههههه عز الله راح الادب فيها المهم دخلت ام العروس ورفقتها لمخيطوا ويبدا الطرب واطلب اغنيه ودع الياس وسافر واغربي وهلي يادمعتي وانا باقادير وننبسط الين سكروا وولعوا النور ونطلع الى الكزار طبعا الكازار صار محد يبيه من بعد ماصار الادريسي معاد يطربه ماش صاروا ربعنا مايبونه ونجلس الين سكر ونروح الشقه وتبدا حفله جديده هناك والتلفزيون لحد الحين شغال / اذيتنا بتلفزيونك قل السالفه ولا انطم / جت الساعه 12 ونرقد المفروض اصحى 4 هيك الا اخترشت التلفونات ناسي اسكتهم وارد لانه جايتني مكتوب رقم غير معروف قلت يالله الخيره وارد الا هو خويي اللي قلت لكم عنه قال ياعمي انا الحين بمطار كازا ياحبي له جاني قال والله اني تحمست اجيك وحبيت اسويها مفاجاء يالله ساعه واكون باقادير قلت ادام خويي جا اقوم اتسبح واتنشط واخذ له غرفه وهذا اللي صار ابد بحد ماخلصت غرفته وكل شي واستلمتها وحطيت له قهوه وشبيت جمر الشيشه الا هو تحت واخذه بالاحضان لان اخر مره شفته في اغادير ونجلس نضحك ونتقهوى ونشيش لين ما قاموا اخوياي وجو وكملنا ضحكنا طبعا خويي اللي جا الخميس قال خلاص ترا بنصير نسهر بشقتي قلت اللي تبونه ولا على كريم تشرط طلعا خلينا خوينا يرتاح عيا قال ماجيت ارتاح جاي انبس قلنا اجل يالله ونروح المويد ونطلب الكبسه ونتغدا ونروح لدريم وبعدها رجعنا قال خوينا برتاح عشان ورانا هز في مخيطو رحنا وانا نمت بعد جت 10 وقمنا نتجهز جا السواق رحنا لمخيطو وسمرنا وانبسطنا وعشنا الاجواء وبعدها رحنا كملنا السهره في شقه خويي الين جت 9 الينا خلاص طفينا رحنا ونمنا وصحينا مبكرر مره على 12 كلنا صحينا سوا المهم طلعنا واكلنا وشيشنا رجعنا مبكر على 6 قلت فرصه اخلي بنات التنظيف ينظفون يوهم موجودين كلمتهم ودخلوا ينظفون التلفزيون كان يشتغل الحين بقولكم سالفه التلفزيون المهم وانا جالس عند صاحبي الا سمعت دوي انفجار هههه ام المبالغه ههههه لا بس سمعت شي طاح وانكسر طلعت لخووي الثاني الا هو بوجهي قال فيكم شي قلت لا واروح لشقتي الا طلعت وحده بسرعه قلت وش هذا صوته قالت الباب وعلى نياتكم ترزقون نسينا الموضوع انتهى كل شي طلعنا سهرنا يوم جت 3 انتها مخيطوا الا قالو الشباب وين نروح قلت نروح اطلنتيك رحنا سهرنا فيه اول السهره خاوي وبعدين امتلا مبسوطين فالينها وكل شي على مايرام رجعنا سهرنا عند خويي خلصنا السهره الا قلت ابروح ارقد رحت الا حصلت ورقه مكتوب فيه مدير الاستقبال يريد مقابلتك لامر مهم قلت من اصبح افلح ارقد وبعدين اروح صحيت من النوم الساعه 2 رحت اباخذ لي غرض من صاحبي وانا راجع ابي افتح الباب ماينفتح الكرت حق الباب موقف قلت اكيد مدير الاستقبال القدير قفله يبي يقابلني نزلت الا قالت لي حقت الرسيبشن نق 9000 تسع الاف درهم بالكمال ش السالفه قالو التلفزيون انت مستلمه زين والحين خربان قلت الا يشتغل ومتاكد من هالشي وبعد انك خربت الصبغ بالشيشه وبعد انك كاسر جيكه طيب نادوا اللي يبي يقابلني جاني وقال نفس الكلام قلت امش اوريك يشتغل وش زينه يوم شغلته الا هو متهشم متكسر انا عيوني احولت ياناس كان يشتغل استغفر الله انا قلت الطيحه اللي امس يوم حقات النظافه اهو التلفزيون منا منا مافيه فايده قالو نقها قلت اوكي بدفعها لكم المهم كملنا يومنا مثل كل يوم جا اليوم الثاني قالوا يالله جب 7500 تلفزيون 1500 صبغ جدار 500 جيكه المجموع كم 9500 قالت البنت حقت الريسبشن اخوي اصبر لبكره كلم المدير عشان يمكن مو اكيد يطرح لك قلت اوكي وبعد مشا اليوم مثل اي يوم وفله وسعه صدر جا خويي وقام غسل جدارهم وصار انظف من اول يعني طاحت ال1500 باقي جيكه 500 و7500 تلفزيون يعني 8000 كلمته قال ولا سنتيم نطرح لك قلت كثر خيرك رحت لمدير الصيانه رجل في قمه الادب والخلق اسمه سي السعداني قلت مو منطق انا ماكسرتها قال شوف اخوي انا بساعدك نروح السوق تجيب بدل لها غيره مابيدي شي قلت شورك بعد هدايه الله والله ويروح معي ولا حصلنا مثلها لقينا احسن منها ب6500 واشتريتها وجبتها لهم وقالوا خلاص سامحناك بالجيكه لا تدفعها قلت احلفوا بس وسويت شيك اوت ورجت للسعوديه وانا اكلمكم الحين منها وقلبي يعتصر الما لفراق معشوقتي اغادير وقمت بموعد مع نفسي وعمل حجز قبل قليل على الخطوط السعوديه يوم 12 -6 الاثنين حجز الرياض كازا الرياض والعوده يوم 22 واقسم لكم بالله اني اشتقت للاغادير وانا في مطارها ما بعد رجعت فقلت لازم اعوض نفسي برحله اخرى عشان ماتزعل علي نفسي رجع معي صاحبي اللي جا معي وخوي اللي جا الخميس الحين بالطياره وانا اكتب لكم واللي جاني بعدين الحين في اغادير اتصل بي قبل بضع ساعات قالي مخيطوا وجدرانه ماتسوا بدونك قلت ياقلبي انا اللي ما اسوى بدون اغادير دمتم سالمين هذ حكايتي في اغادير ومره اخرى شكرا محمد عاطي من القلب*

ستارة

مزعوط نشيط

المشاركات: 91

تاريخ التسجيل: Mar 2012

2012-04-30, 07:33 PM

المشاركه #11

رد: رحلتي لا اغادير بالتفصيل تقرير من يوم 28 ابريل 2012 + شكرا من القلب محمد عاطي

اقتباس:

المشاركة الأصلية كتبت بواسطة dadescars

الحمد لله على السلامه أخي العزيز ستاره

أتمنى في المره القادمه أن تخلي بالك من أشياء الفندق لأنها مره غاليه

وبارك الله في الأخ محمد عاطي على مجهوده الطيب وهذا من طيبته.

وننتظر منك باقي التقرير أخوي العزيز

تقبل مروري أخوك أبو خديجه رشيد رفيق

هلا ابو خديجه شلونك موب القضيه في غاليه ولا رخيصه يوم انا بكسر شي بدفع قيمته ومشكله في مارينا ويمكن لاحظوها غيري مع انه ممتاز الى ابعد الحدود وانت نايم لا يقل عن مرتين يوميا يدخلون عليك حقين التنظيف المفروض مايدخلون الا اذا معلق ع الباب لان هذ خصوصيه
واقسم لك بالله كل لا يقل عن مرتين يدخلون علي والغلا ياخوي في انفسنا ولا اغراضهم بندفعها لهم

المواضيع المتشابهه للموضوع: رحلتي لا اغادير بالتفصيل تقرير من يوم 28 ابريل 2012 + شكرا من القلب محمد عاطي+ملاحظه مشاركه رقم 40
الموضوع	آخر مشاركة
تقرير : رحلتي الاخيره الى اغادير الحبيبه ( نوفمبر - 2012 ) سوالف و قصص	2016-10-01 10:18 PM
تقرير رحلتي المصور الى اغادير وشكرا خاص لمحمد عاطي ولمنتدى مزاعيط	2014-07-23 03:06 PM
تقرير رحلتي الى اغاديــــر 27 ابريل الى 10 مايو	2013-02-16 01:52 AM
7 ايام في اغادير + شكرا محمد عاطي	2012-03-03 12:08 AM