الحسناء التى عشقت ابوعظيمات في شارع جليز

ابوعظيمات · 2012-07-15T16:15:11+00:00

اول سفره للمغرب في عام 1998 الموافق اب حزيران من العاشر من غوشت كنت احزم امتعى على امل السفر مع اصدقائي على اندونسيا التى اعتدنا السفر لها منذ سنوات وفي هذه الاثناء سمعت الجوال يدق يدق ويرن قلت خير ان شاء الله رديت الو مين رد ايوه ابوعظيمات انا صديقك ابو شطبه ومعاى صديقك ساحب على الجنط نبيك ضرورى قلت خير نتقابل الليله بالاستراحه قالوا ماعندنا وقت الحين نبيك دقائق وحنا عندك قلت زين وقفلت الجوال طوط طوط شوى ولا اسمع الدربكه وصوت خيل قصدى سياره توقف عن باب البيت ونا اويق ولا ماكذبو خبر الجماعه ابو شطب وساحب على الجنط ياهلا ياشباب تفضلو مشكور ابوعظيمات ترى مانبي منك غير فنجال القهوه وماشين ورانا شغل ونت ووجهك فاضي انا فاضي يالسلنتح مير ادخلوا الله يحييكم وعجلو علي بعلومكم لاتطول دخلوا وعقب شفطو الدله تنهد ابو شطب وقال يابوعظيمات حنا نبي اخوتك تسافر معنا للمغرب تراها ديره وناسه وطبييعيه وجوهم غير والاهم انهم عرب ويسولفون عربي وتراهم شقرديه وترى المغاربه لاتعاملت معهم معامله رجال تراهم اهله نخوه وفزعه وكرم قلت ياخوى انا طول عمري ديرتى سوهارتو واشكالهم ومالي ومال المغرب ولاعاد تجلس تمدح مانبيب رايح معاكم انا مع خويايي وعقب اسبوع مسافرين ونتم روحو لمغربكم عله عليكم بالعافيه قالواا ترى احنا نحبك فالله قلت ايه الي بعدها ونبي اخوتك انت رجال راعي فله ووناسه وضحك ونبيك تخاوينا المهم جلسوا يمدحون في (عارفين الكلاب نقطه ضعفي)حتى قلت تم قالوا شوف الحين حنا مفلسين ونت عندك دراهم؟ قلت لا قالوا اجل نعطيك حل بدل ماتتسلف ولاشي قالوا انت سيارتك الكرسيدا موديل كم قلت موديل 88 ومدلعها ومرقها ومركب عليها بنت البكار وتونى مغير لها كفرات ابوخط ونقشته الشاهين قالوا اجل نبيعها ونسافر بفلوسها هنا جاتنى صدمه وقلت لهم كلواااا هوااااا اجل ابيع سيارتى قال ابو شطب افهمنى يابوعظيمات احنا راح نبيع سيارتك واذا رجعنا من السفر بنطلع باسمك سياره بالايجار وعلى اعتبار قسطها الشهري الف ريال انا وساحب بنعطيك خمسمائه ريال ونت تدفع خمسمائه وتكشخ بسياره جديده ياسلام ادفع خمسمائه ونت اثنينكم خمسمائه لامابي اتنم غشاشين قال ساحب لاتكون غبي انا اشرحلك احنا بندفع خمسمائه ولانستخدم السياره ونت تدفع خمسمائه وتستخدم شايف كيف انت مستفيد ضحكت بداخلى يوم عرفت انى غاشهم ههههههه ومشينا للحراج وبعنا الموتر 14 الاف ريال عدا ونقدا ورجعنا البيت وجلسنا نقسم الفلوس قال ساحب انا بقسم الفلوس عشان انت ابوعظيمات رسبت في سنه اول بالحساب قلت طيب قال شوف انا وابوشطب ناخذ 5000الاف ونت لك 4000الاف عشان انت راح تستفيد من الكوريلا يوم نطلعها لك بعد نجى من السفر وتكشخ مع الشباب وحنا مساكين بس ندفع ولا نكشخ مثلك هههههههههههه والله فله موافق موافق مادرو الاغبياء انى خاش الف ريال من راتبي ولاعلمتهم فيه المهم طلعنا ان على حراج الصواريخ ونشري بنطلونات وقمصان ونا كشخت عليهم شريت جكت فسفورى حق سهرات لونه اخضر >>مطول ياسبوع الشجره المهم كل يوم نجلس نتفرج على قنوات المغرب خصوصا الدوزيم بس يعلون كبدك بالافلام المدبلجه وهات يافر بالمنتديات وناخذ معلومات وكيذا لين استقرينا نروح مراكش ويوم السفر جمعنا اغراضنا وعلى المطار ونخلص اجراءتنا وندخل صاله المسافرين في انتظار اقلاع الرحله المهم عقب ساعه الا المنادى حق الخطوط يعلن تعلن الخطوط السعوديه عن اقلاع رحلتها رقم م ص ق1234 والمتوجه الى الدار البيضاء على جميع الركاب المسافرين على هذه الرحله التوجه الى بوابه رقم 2 استعداد لصعود الطائره مع تمنياتنا لهم بسفر سعيد المهم انا جالس وخوياى راحو شوى ونهم راجعين وراك ماتقوم يالله لاتفوتنا الرحله قلت مانادو على رحلتنا ذي رايحه الدار البيضاء في ليبيا حنا رحلتنا على كازا بالمغرب قال ابو شطب اجل الدار البيضاء في ليبيا مدرى وش الي ورطنا فيك قم بس قم لاهفك بالسمسونايت الي انت كاشخ فيها من عام جدتي طلعنا الطائره وعقب اقلعت وربطنا الاحزمه وهات ياقران ودعاء السفر وكل ابو الادعيه الي اعرفها وادعيه من عندى وكل ماجابو وجبه قلت مابي ولافكيت الحزام ماغير مشبط بالمقعد وعيونى بتنط من الخلعه وخوياايي ماغير ساحبين نوم عقب 6 و45 دقيقه اعلن قائد الطائره عن ربط الاحزمه وهبوط الطائره في مطار محمد الخامس ونا هنا قلبي بدا يرقع رقيع واطالع من الشباك ولا الارض كلها خضراء ومربعات جميله والطائره كل شي تنزل والغيوم حولنا بيضاء عشان كيذا يسمونها الدار البيضاء نزلت الطائره ونا اصفق الا ابوشطب هابدنى بمخده قال اهجد ياورع بملاهي حنا المهم ماطولنا شوى نزلنا الصاله واصف طابور وش طوله وياثقلهم الي يختمون الجوازات يبطون مع كل جواز المهم عقب طاحت عظامى جانى السرا وعطيتهم جوازى وفيه كرت ابيض عطونيه بالطائره شوى قالي بتتاع الجوازت عللاش ماكتبتي تاريخ الازدياد قلت والله ماعرفت وش المقصود بالازدياد قلت تعبونها انتم اعرف منا قال المقصود بيه تاريخ الميلاد سير سير مشيت من عندهم ماغير الاقي انثين عسكر قالوا مرحبه بيك واخذو يفتشون وقالوا سير مرحب بيك وشوى نخلص الجمارك ونطلع وقال ابو شطب تعالوا نصرف فلوس والا في بنكين جنب بعض قدامك اول ماتطلع من الصاله صرفنا وفي مقهى جلسنا فيه وطلب ابو شطب 3 قهوه نص ونص ومويه جتنا القهوه والمويه مكتوب عليها سيدى علي فطلبت الجرسون يغير لي وحده ابي نساح ههههههههههههه ارتفع ضغط ابو شطب وقال وتاليها معك نساح هنا جرب سيدى علي وراح تعاف تشرب غيرها اخذنا طاكسي كبير وتوجهنا من كازا مباشره الى مراكش مرورااا ببسكوره وبورشيد ووجدنا ناس متجمهرين على الطريق يوقفون السيارات واخوكم راز نفسه بالمقعده الاولى وابو شطب يرفع في يقول شايف شلون استقبال الناس لك ابوعظيمات عاد انا على عادتى كمخه اصدق وسرحت في الخيال اشوف نفسي الملك الاسد وشعبي حولي ووقفنا عن الجمهور الي واقف ياشرون بايديهم وانا ااشر لهم والوح بيدي من داخل السياره وساحب يقول استح ياخي افتح القزاز واطلع لهم وااشر ونا ماكذبت خبر ماغير ااشر وطلع من قزاز الباب على بالي محتفلين بقدومي الميمون ولاتشوف عينك غير النور يوم طلعت خشتي لهم ماغير يتافلون على وبسرعه اقفل القزاز والسواق يصيح علي وابوشطب وساحب فاطسين ضحك علي ونا اسولف مع رضوان السائق ياخوك وش هالتحيه المغربيه ام التفال المبارك قال هذا مش احتفال اليوم في اضراب عام للطاكسي الكبير وزعلانين مني لانى شغال ههههههه وصلنا مراكش وعلى طول حطينا عفشنا بالشقه وطلعنا نتمشى ومن شارع لشارع ومن زنقه لزنقه لين وصلنا حوش كبير فيه ناس كثير متجمعين انا اول مره حسبته مولد وفي بقاله قلت امر اشترى اغراض الفطور حيث ان الليل داهمنا وحنا مانعرف البلد المهم شريت خبز وحلاوه وزيتون ونشبت نشبه المسطى في الشيخه يوم طلبت جبنه لاهم فهمو ولا انا فهمت وجلست احاول معهم ولانى فاهم وش يقولون ولانى فاهم عليهم اخر شي صار الوضع بالاشاره وعطونى جبن بالوزن بس لونه اصفر ونا تذيهنت عليهم واخذت جبنه معلبه ولمن وصلت الدار لقيتها كلها ده هههههههههههههههههههه غير الحساب الي خوفنى فيه يوم قال 800 ونا معاى غير 200 درهم اثره حسابهم بالسنتم مدري بالريال المهم لخبطو مخي ولغتهم صعيبه مره بعد كم وحنا نتمشى في شارع يسمونه جليز ولا اشوف ذيك الشمحوطه التى تسوق سياره ومن يوم شافتنى وهى تصفط يمين وتاشر ابو شطب وساحب كان بتجيهم سكته قلبيه من القهر قلت شفتو تووم كروز السعودى ياتعبانين المهم نزلت البنت الشمحوطه الي كنها خخيل ايش طول وجمال وقفلت سيارتها ونادت على تعال ابيك انا فذيك الساعه جاتنى حاله تعرق وارتباك وبدت ركبي تضرب فبعض وقلت يااااويلييي صدق الى قال الحب من اول نظره سدحتها بجمالي المسكينه وهى تتبسم ونا اسدحها بابتسامه واخنا برههه من الوقت نسدح ابتسامات لبعض حتى قالت تعال قرب منى انا رفضت وقلت انتى قربي احسن فجاتن حطت يدها بجيبها وقربت منى ونا خفت تكون شفاره وبجيبها موسس تجلطني فيه واعبي لها بوقس قلت لو جلطتنى بصكها بالبوقس واحط رجلي المهم يوم قربت وطلعت يدها وفيها عشره دراهم قالت خذ بس غسل السياره مزيان ههههههههههههههههههههههههههههههه نراكم مع التكمله لاحقا اذا ماحد قلدني

ابوعظيمات

المشاركات: 749

تاريخ التسجيل: May 2011

الدولة: ورزازت

2012-07-17, 10:32 PM

المشاركه #15

رد: الحسناء التى عشقت ابوعظيمات في شارع جليز

اقتباس:

المشاركة الأصلية كتبت بواسطة مغربية مغتربة

ههههههههههههههههههههههههه هه ويلي يا هاد المسخوط واش ماكتعيى؟؟؟
نتا فين باغي توصل؟ ناري راه بزآآآآآآآآآف علينا مرة قردونة ومرة حسناء مراكش
هههههههههههههههههههههه اما التقليد ماتخافش تاواحد مايقدر يقلدك
واصلا مانعرفو نقلدوك ههههههههههههههه
ولكن غي بغيت نقول ليك مرة اخى فالجزء القادم حاولت تكتب حلقات حيت الموضوع طوييييييييييييييييييييل
في انتظار الجزء الاخير

ياهلا مغربيه سرنى تواجدك

بغينا نوصل بحال ارسنت همنغواي ههههههههههههههههه

مازال مازال تونا باول الطريق
طمنتينى انو ماحدش راح يقلدني ههههههههههههههههههههههههه هههههههههههههه

الموضوع طويل عشان يكون ماده دسمه بس عادى ممكن نقطعهم حلقات زى البصل هههههههههههه

تشكرات

__________________
يلومني فيك يالمغرب
من لاعذرنا ولا شافك
جاهل ومسكين مستغرب
محروم من روعه اطيافك

« الموضوع السابق | الموضوع التالي »

الذين يشاهدون محتوى الموضوع الآن : 1 ( الأعضاء 0 والزوار 1)

الانتقال السريع

المواضيع المتشابهه للموضوع: الحسناء التى عشقت ابوعظيمات في شارع جليز
الموضوع	آخر مشاركة
شارع جليز	2016-02-16 07:07 PM
سلا الحسناء	2013-07-29 05:58 AM
عشقت المغرب عشق الهبال	2012-07-08 07:03 PM
لو جاك معرس بهالتفكير هل تقبلين به ايتها الحسناء	2012-03-15 07:09 AM
شقق في شارع جليز	2011-08-23 06:29 AM

الساعة الآن 06:35 PM

عروض وحجز الفلل و الشقق

السيارات شركات تأجير السيارات

تقارير سياحية

الاستفسارات سؤال و جواب

الحسناء التى عشقت ابوعظيمات في شارع جليز

روابط سريعه