هلا عزيزي شير طلوى,,,
وحياك الله معنا في منتديات مزاعيط المغرب,,,
بس يالغالي ياليت تقول لي وش معنى اسم معرفك؟
ندخل في صلب الموضوع,,,اخي العزيز لولا اختلاف الاذواق لبارت السلع!!
كل منا له مدينتة ومعشوقتة,,,وكل من له هواه وهذا شي طيب في اختلاف الاذواق مما يعود بالفائدة على الجميع,,,
انا برد على النقاط اللي ذكرتها على حده,,,
اقتباس:
1)الدرك ومشاكلهم وانت طالع من السهره حتى لو انك لحالك يبثرونك ( والناس هنا تختلف بطريقة التعاطي مع الموقف فيه ناس ما تعكر جوه هل ربع ساعه او عشر دقايق ال قعد فيها مع الدرك وفيه ناس مثلي تقفل معه وخصوصا اني وانا متقهوي اكره افكر )
بخصوص موضوع الدرك,,, الدرك الوطني ياغالي مشاكلهم في أغلب المدن وخصوصا كازا ومراكش,,,مع العلم في مراكش أشد وأقوى وخصوصا منطقة النخيل بعد الخروج من السهرات,,,أما أغادير فالوضع من الناحية هذي أمن جدا والنظام هناك فنادق ولا احد حولك مادامك ماشي في السليم,,,
وشلون ماشي في السليم؟ هذي انا بشرحها لك,,,
بعض الناس الله يهدية,,,لما تنتهي السهرة سواء في مرقص او ديسكو,,,يطلع برى ومسوي ملك زمانة!!! ولا همة احد ولا هو معبر احد!!! الطيور على يمناة ويسراة وماشي فيهم ومدرعم بالشارع,,,سواء بسيارتة الخاصة او التاكسي,,,وركب هو وطيورة مع بعض,,,واول مايشوفة الدرك مايصدقون خبر وغنيمة لهم لقو هالاهبل طالع بالشكل هذا!!! على طول يوقفونة ويفككون معة جوة,,,ويجلسون يستبزونة علشان ياخذون منه فلوس,,,وهو بالبداية يسوي بطل زمانة ويجلس يهايط ويكابر عليهم,,,وبالاخير اذا هددوة بانهم ياخذونة للمركز يقمط ام العافية ويدفع لهم اضعاف مضاعفة من الدراهم,,,وبعدها يجينا هنا ويجلس يقول المدينة هذي فكوك وكلها مشاكل ودرك!!!
اخي الكريم,,,الطريقة السليمة انك لما تسهر وتخلص من سهرتك تطلع لوحدك بالتاكسي لا معك احد ولا شي,,,وتروح لشقتك لحالك وتخلي الاحباب يجونك بسيارة ثانية بعدك ب 10 دقائق,,,وهذي الطريقة الصح,,,بس بعض ربعنا الله يهدية يحب يعيش المغامرات والافلام الهندية علشان يصير بطل زمانة!!!
أنا مانكر بعض الاحيان او نادراً حتى لو كنت لحالك يوقفك,,,لكن مادام انت ماشي في السليم خلك هادئ وابتسامة صفراء وتمشي,,,,
عموما بخصوص النقطة هذي ((الدرك)) اشوف ان مراكش اخطر من كازا من هذي الناحية,,,اما بقية المدن لاشي يذكر,,,
اقتباس:
2) الشخاذين الي ما يتصرفون ابد ابد ابد والي امنيتهم انك تتمشكل معهم ويقعدون يلعبون بعصابك حتى تنفجر
الشحاذين في كل مكان ياغالي,,,مو كازا بس,,,
ياخي لو تروح لمراكش وخصوصا ساحة الفناء ياكثرهم هناك,,,وكذلك اغادير على الكورنيش,,,وهي ظاهره في كل مدينة,,,
لكن العيب منا وفينا!!! بعضنا يسوي كريم ويحب يشرهه دراهم,,,ولما يعطي شحاذ واحد تجمعو علية عشرة يبون زي الاول,,,وذيك الساعة ابلش فيهم,,,
المفروض ياغالي اذن من طين واذن من عجين,,,امش ولاتلتفت لهم ولاتكلمهم,,,صح ادري انهم نشبات ولحوحيين,,,لكن لاتعير لهم بال وطنش وشد خطوتك في المشي,,,وكذا بيمل وبيتركك,,,لكن مسئلة انك ترد علية وتجلس تتهاوش معاه هذي احذر منها!!! صحيح انه شحاذ!!! لكن لما تطردة او تتكلم عليه يقلب شمكار وحونشي!!!
المشكلة هذي ياغالي في كل مدينة من مدن المغرب,,,وهي فعلا مشكلة غويصة لكن وش نسوي,,,وعموما انا عندي أغادير ومراكش وخصوصا ساحة الفناء العن شحاذين فيها,,,
اقتباس:
3)قصر الصوت هذي مليت وانا اسمعها بس قل هذي مب بس بكازا لحالها ميخالف بس بكازا التشديد عليها اكثر
حبيبي مسئلة قصر الصوت هذي في كل شقق المغرب,,,سواء بالرباط او اغادير او كازا او طنجة او مراكش,,,مادامك ساكن بشقة بتسمع هالكلمة وهالشي من حقهم ياخي,,,وشي طبيعي انت ساكن بعمارة كلها سكان مغاربة,,,وجاي انت سائح وفاجر على الصوت من الطبيعي الخدامة بتقول لك قصر على الصوت علشان ماحد يسوي شكاية ويجون درك وتبلش,,,
يعني المشكلة هذي ياغالي مو خاصة بكازا بس بكل المدن,,,
ماتبي تسمع الكلمة هذي,,,أرخ الريال وانا اخوك واسكن بفلة فيها ديسكو,,,وساعتها ابن امة يقول لك قصر الصوت,,,اما انك ساكن بشقة ولاتبي احد يقولك لاتطول على المسجل هذي انسها,,,
حتى عندك شقق مراكش بلازا بمراكش وفندق اماديل بأغادير وشقق ميرا ماس يقولون لك قصر على الصوت,,,وشقق بالرباط بيقولون لك هالكلمة,,,
لذلك هذي امر طبيعي,,,واذا هي مضايقتك ياغالي اسكن بفلة وافجر على المسجل ولا احد علية منك,,,
اقتباس:
4) الزحمه الي تضيق الصدر مررررررره طالعين من زحمة الرياض ونلقى زحمه مالها حيله
أي زحمة؟,,,بصراحة على كثر روحاتي لكازا ماوجهتني اي زحمة ياغالي,,,مافيها مقارنة ابد ياغالي بزحمة الرياض,,,
بصراحة في النقطة هذي اسمح لي اقول لك خانك التعبير ياصاحبي,,,
جايها انا بعز الصيف العام الماضي ولا كانت فيها زحمة بالعكس نشغل سيارتنا ومشاورينا زي الحلاوة تكون ساعات زحمة خفيفة جدا ولا تذكر,,,بس اسمح لي مافية اي وجه مقارنة بزحمة الرياض اطلاقاً
اقتباس:
5) بصراحه احس شعب كازا وهلها اتكلم عن الشباب اجلف من غيرهم بباقي المدن واستفزازيين وودوهم يطلعون القرش من عينك
في هذي انا معك اخوي,,,اهل كازا أشد غلاظة من غيرهم وفيهم جلافة,,,لكن انت خلك هادىء ولاتدخل في شد وجذب معهم,,,
كل النقاط اللي ذكرتها ياغالي,,,متوفرة في جميع انحاء المغرب مو كازا فقط,,,ماعدا النقطة الخامسة هي اللي تفرق عنهم,,,
وكازا مدينة حلوة ورايقة بس للي يعرف لها ويكون حذر,,,
وبالعكس ياغالي موضوعك على العين والرأس,,,والمناقشة الفائدة منها نطلع بنتيجة للاعضاء علشان تفيدهم بالمستقبل مهما اختلفت وجهات النظر,,,
وانا احييك على طرحك واشد على يدك على المواضيع الهادفة والصريحة,,,
تحياتي وأشواقي,,,