الناس الاولين قالو ....
قالو الناس الاولين
ناس من ناس و الناس اجناس
ناس فضة و ناس نحاس
ناس ذهب و ناس الماس
ناس كيف التاج فوق الراس
و ناس تحت الساقين تنداس
ناس كيف الملائكة و ناس كيف الوسواس الخناس
ناس تتباس و ناس تستاهل الضرب بالمهراس
سرك خفيه و في اعماق قلبك خبيه
الى عاودتيه لحبيبك يعاودو لحبيبه
تولي فينما مشيتي تصيبو
الى حلفو فيك النسا بات فايق و دير العسة
الي ما يقرا براتو
و يذبح شاتو
و يخيط كساتو
و يطيب عشاتو
موتو حسن من حياتو
ما تعدب راسك الهدرة فيك فيك
واخا تكسيهم و تعمر ليهم الشيك
الفم ما بقات فيه حتى سنة و ما بغا يتهنا
سولوه اش خاصك ا الشارف الهارف
قالهم بغيت الصغيرة مولات السوالف
الصحبة المغشوشة حكها يبان عيبها
اللي يعرف عزو كلام الناس ما يهزو
اللي ما عندو المال في اركانو عندو العسل في لسانو
رضينا بالهم و الهم ما رضا بنا
درناه عند راسنا صبح عند رجلينا
سوق النسا سوق مطيار يا الداخل ليه رد بالك
يوريوك من الربح قنطار و يديولك راس مالك
ديرها في الرجال و ترجاها و ديرها في النسا و ما تنساها
ما تشري حتى تقلب و ما تصاحب حتى تجرب
زين الوجه كيزول
و زين العقل كيطول
و اللي خاف على زينو يذبل يسقيه بالمعقول
الزين زين الوردة
و السعد سعد القردة
و الله يعطينا سعد الخايبات
الا شفتيهم رضاو علينا
عرف حاجتهم فينا
لو كان ما بان لهم فينا
كانو خلاو الواد يدينا
لا خير فيمن يبغي مصلحته
و ملي يسالي بلا بكى يرمينا
شحال قدك طير و تدفع كبير
راه اخرتها قبر صغير
يجمع الغني و الفقير
تما غادي تقول سعدات اللي دار الخير
الله ينجيك من الساكت الى دوا
و من الغدار ادا نوا
و من الجيب ادا خوا
ومن الصداع الا قوا
و من الشيطان الا غوا
المرا تغلبها المرا
و الراجل تغلبه المرا
الزواج بحر ازرق
اللي دخلو يغرق
و اللي ما وصلو يحماق
الفايدة ماشي في الزين و العين
الفايدة في القلب الحنين و التربية و الدين
عيوبه ما يراها و عيوب الناس يجري وراها
تعطيهم عينيك و يطمعو لك في الحجبان
الحر كيبقى حر
و الرجولة راها بحر
و الرجال ماشي بالمظهر
بالكلمة و ماشي تخراج الصدر
و في الشدة هو الاول و مايعطيك بالظهر