----------- اول رحله للمغرب -----------

:yess:اهلن :yess: اهلن :yess:

يالله ان تحيي كل زعطه ومزعوط <== يقاله جايب كلام حلو :D

بصراحه مادري ما احس فيه ذاك التفاعل :( ... حسيت اني من جنبها في التعبير :(

بس اشكر الي للحين مشاركين معي في الموضوع ..

ترى عادي لو تكتب حرفين وتطلع موب لازم تكتب مجلد


طيب وين وصلنا وين ؟؟؟

ايه وصلنا مطار الميسره

من الوناسه الي فيني بخيت اتزحلق بدرج الطياره :D

دخلنا تختيم الجوازات ونفس الحكايه يقولي العسكري الموال

قلت ما معي دراهم قالي اي شي سعودي دولار يورو ين ياباني

وانا الي اطلق الانسان العبيط الي في داخلي واشق له ذيك الابتسامه

الي تشير ان ماعندي سالفه ولا ادري وشهو يقول

واخر شي عطاني الورقه قالي نبغها بلاتيني

<=== يقوللو تبي اكتبها لك بصيني كتبتها يا اخرق :D

قلت له ممكن قلم :D قالي لا مافي هذا قلم ديال العمل

<== حسيت انه وده يذبحني :D

ونا الي افتح شنطة الاب توب وطلع درزن قلامه :D وكتب الي يبي بحروف لاتينيه مع بعض الكلمات الهيروغليفيه :D

:D <== صح يفرعوني انت :D

وحط القلم فوق الطاوله وقوله اذا احد يبغى يكتب في القلم هذا مجاني لهم

و انا الي امشي انا والشباب للجمارك الا ويسحبني ولد خالتي مع فنيلتي حسيت اني بزر بضيع

قال شف الا هذولي لا تميلح معهم بعدين نقعد لين الصبح :ang:

<== يقول حسيت اني لا املك قرار نفسي بالرحله ذي :D

ونا الي اتمشى ما معي الا جوازي العب فيه بطراف اصابعي :D وامر من جنب الجمارك وارمقهم بنظره ساخره

واشم هواء اقادير خلتني اسرح بفكاري وخيالي للحظه حتى انه كان ودي اكتب شعر جاهلي :D

<== يا ذا النجوم الي مقطعتن قلبك يا قيس :D

فجاءه بندر يصدمني بالعربيه حقت الشناط يقولي امش ياروميو :ang:

<==مادري ليش معصب هو وانا فرحان ..

المهم طبعا تهاوشنا مع التكسي لنا ربع ساعه عشان السعر :D

لان اللوحه مكتوب فيها شي وهو معطينا شي ثاني

اقوله شوف شوف مكتوب 300 بالليل يقولي هذي عطلانه

وش الي عطلانه لوحه عطلانه مكتوب فيها 300 درهم لا يكون مكتوبه بالوان زيتيه :D

اخر شي اتفقنا على سعر كان الفرق عن اللوحه 50 درهم بس نبي نروح ننام

ونتوكل على الله الي الفندق :D

طبعا بحكم ان الدنيا لليل ومو اي لليل اخر الليل الساعه اللحين 12

كانت المحلات مقفله ونا الي يضيق صدري قلت راحت الليله علينا

وين بنروح وش بنسوي حرام ساعه تفوتك في المغرب

وصلنا الفندق وقام يوزعنا على الغرف طلعو الشباب كلهم جنب بعض

الا انا راميني في جهه ثانيه ودور ثاني بعد

حسيت اني جاي لحالي موب . وانا الي اعطي راعي الرسبشن نظرت المنكسر اليتيم

وقوله تراني يتيم وما اعرف اتكلم عربي لا تبعدني عن خوياي :D

اصلا الريموت حقي مع ولد خالتي :D لو انقطع الارسال تراني منيب مسؤال عن تصرفاتي :D

قالي اخوي ماكاينش غرف

قلت الا كاين وبورش بعد بس انت دور زين :D

<-- يقول قلم هو مضيعه تقوله دور زين :D

المهم رضيت بالامر الواقع و ادخل الغرفه واخذ دش على السريع واحط راسي ونام بهدواء

وحلم اني على خيل في البر:D .. ترى عادي هذي احلامي كلها خيول وحروب :D

وما دريت الا ذاك الي يشوت في ذا الباب يقولي قم قم

حتى اني تروعت احسب انه غزونا التتار :D وانا الي اطلع السيف حقي من غمده

يوم ركزت شوي اثرني بغرفتي وماسك الفوطه على بالي سيف :D

<== يقول تعرفون توني محلم ان راكب خيل وندمجت :D

المهم طلعنا تقريبا الساعه 9 الصباح نبي نفطر عاد خوي ولد خالتي

المهم رحنا الكورنيش نتمشى وجلسنا في كافي

الغريب اني كل مره اقول لواحد الله يعطيك العافيه كان يقولي

ديالكم مو ديالنا ويضحك اول الوقت احسبها رد للكلمة

مثلا تقول شكرا يقولك عفوا زي كذى بس بعد ما عرفت كلمة ديالنا وديالكم

قلتها لوحده تنظف الغرف في الفندق قالت وهي تضحك العافيه ديالكم مو ديالنا

ونا الي انقز بحلقها تعالي وش عافيتنا ووش عافيتكم وش الفرق

المهم شرحت لي ونا الي تطير عيوني وقول بنفسي كم واحد قالي الله يعطيم العافيه وانا اتمشى في الكورنيش

وانا الي كل ما قالها اصرفه لك ذيك البسمه الساحره وقوله شكرا

المهم انا كنت دايم امشي اخر واحد اذا طلعنا نتمشى مثلا دايم اكون الاخير ولحالي

ودايم اكل مقالب قويه زي مثلا الشحاذين يرحون لشباب اول بعد كذا اتفاجاء انهم جوني كلهم

المشكله انا اشوف ولد خالتي ما عطاهم شي ولا خويه بس فيه سر في الهجوم المرتد بغيت انحاش للفندق اكثر من مره

لدرجه بديت احس اني مانيب انسان حسيت اني علامة دولار :D

بعدها اكتشتف انهم يقولون لهم احنا ما معنا فلوس فلوسنا كلها مع خوينا الاخير

<=== وهذا الي يتوهق ويحجرون لي في زاويه والشباب يقعدون يضحكون علي :D

بس مره ربي انتقم لي منهم :D كنا نمشي في الكورنيش زي العاده انا الاخير :D :D

جاء ثنين من اخوانا المغاربه يمشون ورى ولد خالتي وخويه

المهم ونا صرت امشي وراهم كلهم وفجاءه يتقدم واحد من المغاربه ويواجه ولد خالتي ويقوله اهلن اهلن بندرما عرفتني

بندر طارت عيونه وش ذا الي يقول بندر

<=== قايلكم بندر اشك انه يقرب لي :D

اثرهم كانو يمشون وراهم عشان يسمعون اساميهم :D الشي الحلو قال انت مو ساكن في فندق اماديل

قال ولد خالتي لا انا مو ساكن هناك انا ساكن في اتلنتك

طبعا كل هذا يصير قدامي وانا فجاه طلع لي قرنين وشوكه :D ..وكل واحد من المغاربه محجر لواحد من اخوياي يسولف معه

قلت بندر متى نرجع لفندق اماديل :D :D

:ang: <== في اللحظه ذي بندر اصبح كتله بركانيه قابله للانفجار باي لحظه يبي يفقع وجههي خخخخ :D :D

في الاخير قال ما تبغون تصيرون اصحابنا قال ولد خالتي لا ما نبغى لو سمحت توكل على الله

<== وانا الي اهمس في اذن ولد خالته وقوله اسحبها

قالي بند اسحب ايش ؟؟

قالت له اسحب توكل على الله لا تطلع زي الله يعطيك العافيه ثمن يفقعون وجيهنا :D :D

الا الي يرمقني بنظره تتطاير منها الشرار كنها مكينة لحام :ang:

كانه يقول موب وقت تميلح ذا انت وخشتك :ang:

طبعا ونا الي ابلع العافيه صدق :D ومشي يقالني ما سويت شي :D



انتظرو الجزء الرابع :)

صراحه اعجبتني في اللي يتميلح في المطار
خله يفحط ولاتعطيه درهم

واااااصل ... في الانتظار

هذا الرد للجزء الثاني
هههههههه

جاري قراءت الجزء الثالث

ماعليك والله انك خطططططططططير

واصل ياوحش اسلوبك رائع وجميله هي روحك

معاك حرف بحرف

سلاميـــ...

ماااااااااااالك حل يابوخلود فاله على الآخر

ايش تذكرك هذي الجمله
عاااااااافاك كاين عندك شي درهم
عاااااااااااااااااافاك

ههههههههههه

مستمتع بالتقرير

واااااااااصل ياامييييير

سالميــــ....